ခိဆၧၩ့ချံၪ့ အၪ့လဲၩထၪ့အၥၭဒဲ နဲၩ့ဎီၩ့ဆၧလၩ့အၪ့ယိၪ (၂)

အထီဘဲၫယီၩ ၥံၪ့ကျိၭလဖၪ ဂဲၫလူၬပျီၩခွံၬယူၭနီၪလီၫႉ ၥံၪ့ကျိၭလဖၪ ဂဲၫလူၬပျီၩခွံၬထၪ့အကၠီၩ့ မုမ့ၬအလွ့လဖၪ ဆ့ၭလၩ့ဂၪ့ခိၪဆီၪ့ဆီၪ့လ့ၬအကၠီၩ့ ၦခမျၧးဒဲ ဆၧဖိၪဆၧဎါလဖၪ ဘၪထိးဆၧခိဂ့ၩဘၪဆဲၪ့နီၪလီၫႉ ဆၧခိဂဲၫဆီၪ့ထၪ့အကၠီၩ့ ထံၫလိးခိၪလီၩ့လဖၪ ဖံလၫ့ႇ ၦခမျၧးလဖၪ ဆၧဆူၭဆၧဆၫဂဲၫအၪထၪ့ႇ ဖူၫဆံၫဂူဒဲ ထံၫဎိၩလၩ့လဖၪ ၦခမျၧးၥံၪဘၪထိး နီၪလီၫႉ

ၥံၪ့ကျိၭလဖၪ ဂဲၫလူၬပျီၩ့ထၪ့အကၠီၩ့ ခိဆၧၩ့ချံၪ့ဘၪလၧၩ့အ့ၬႇ ကဲၪထၪ့ လမွဲဘၪအခံၫ့ ဆၧဆၧၩ့နီၪလီၫႉ ဆၧခိဂဲၫဆီၪ့ ထၪ့အကၠီၩ့ ထံၫလူၭဘံၭႇ ထံၫဎိၩလၩ့အခံၪ့ယံၬဒဲ ၦၡၩၥံၪအဆၧဖံၭဆၧမၩအီၪလၧၩ့အ့ၬ ကဲၪထၪ့နီၪလီၫႉ ဘဲၫပယၩ့အဆၧဒီၩ့ လၩ့အီၪဝ့ၫ "ကျွန်း၊ကိုင်းမှီ ကိုင်း၊ကျွန်းမှီ" အၥိၭ ၥံၪ့ကျိၭလဖၪ လူၬပျီၩ့အကၠီၩ့ ခိဆၧၩ့ချံၫ့အၪ့လဲၩထၪ့အၥၭဂီၩ့ ဖူၫဆံၫဂူ ကဲၪထၪ့ ဖံၬခုလၩ့လဖၪ ၦခမျၧးဒဲ ဆၧဖိၪဆၧဎါၥံၪလဖၪ ဘၪထိးဝ့ၫဒၪနီၪလီၫႉ

လခဲၫ ပယၩ့အဆၧချဲၩ့ဒီၩ့အီၪဝ့ၫဒၪ "ဥတုရာသီ တောကိုမှီ၏" အၥိၭ နဲၩ့ဎီၩ့ဒဲ ခိဆၧၩ့ချံၪ့ဆၧအၪ့လဲၩထၪ့အၥၭယီၩ ပကဘၪဆုးဖီၪ့ဂုးခၧၫ့ထၬနီၪ မွဲၦအီၪလၧဂၪ့ခိၪချိၫ့ၦခမျၧးၥံၪလဖၪ အမူၩဒၩလီၫမွဲအ့ၬဧၪႉ ဆၧလၧအဘၪထံၭဆၫ နဲၩ့ဎီၩ့အဎံၫ လၩၥ့ၪလဖၪနီၪ ပကဘၪဂၭဎ့ၬနီၪလီၫႉ ဆၧၥိၩ့လၩ့ၡၩထၪ့ စီၩ့ဂဲးႇ ဆၧမၩလၩ့ၡၩထၪ့ ကၫဘိၫ့ဒဲၫ့အီၭဆဲၭ ပကဘၪဖီၪ့ဂုးမၩဎံၫ လၩထၪ့ထဲၩ့ ပဂၪ့ခိၪနဲၩ့ဎီၩ့နီၪလီၫႉ ပကၥုၪ့လၩ့ထဲၩ့ၥံၪ့ထံၭလဖၪ ပကဖီၪ့ဂုးထၪ့ နဲၩ့ဎီၩ့ဒဲခိဆၧၩ့ချံၪ့ႇ ပကမၩဎံၫလၩထၪ့ထဲၩ့ ပဂံၪ့ဒီၪ့ ဂၪ့ခိၪချိၫ့ယီၩလါဆံၭႉ