ခိဆၧၩ့ချံၪ့ အၪ့လဲၩထၪ့အၥၭဒဲ နဲၩ့ဎီၩ့ဆၧလၩ့အၪ့ယိၪ (၁)

ပခးပယၩ့ဖၧၩ့ယီၩ ခိဆၧၩ့ချံၪ့အီၪဝ့ၫၥၧၫ့မံၩ့မွဲဝ့ၫ ဆၧခိခၫႇ ဆၧဆၧၩ့ခၫဒဲ ဆၧချံၪခၫနီၪလီၫႉ ခိဆၧၩ့ချံၪ့လဖၪၥံၪယီၩ အၪ့လဲၩထၪ့အၥၭကိၭကၠၪဒ့ၭနီၪလီၫႉ ဆၧလဖၪၥံၪယီၩ အၪ့လဲၩထၪ့အၥၭ ဘဲၫယီၩၥိၭအကၠီၩ့ ၦၡၩဒဲ ဆၧဖိၪဆၧဎါၥံၪ ဘၪအီၪ ၥၭမၧၫ့ဒဲ ဆၧဆီၪ့ဆၧချဲၫ့နးဆ့ မွဲအၪ့လဲၩထၪ့အၥၭဆ့လီၫႉ ဘဲၫခိဆၧၩ့ချံၪ့ဂဲၫအၪ့လဲၩထၪ့အၥၭအၥိၭ ၦၡၩဒဲ ဆၧဖိၪဆၧဎါလဖၪ ဘၪထိးနဲၩ့ဎီၩ့အဆၧလၩ့အၪ့ယိၫအၪထၪ့နီၪလီၫႉ ဆၧခိအၪဝ့ၫဒၪ ဆၧခိခၫအထီ ပဘၪထိးဆၧခိႇ ဆၧခိဂဲၫဆီၪ့ထၪ့အကၠီၩ့ ပၫ့လဲၫ့ထံၫအမ့ၬပၫ ဂဲၫထၪ့ဂီၩ့  ဂဲၫကဲၪထၪ့ ထံၫနဲၩ့ထံၭ ဂ့ၫဟၭစန့ၭ ဂၭဂီၩ့ဂၭစၪထၪ့နီၪလီၫႉ ဆၧခိနၭလၨၪအကၠီၩ့  ခိဆၧၩ့ချံၪ့ အၪ့လဲၩထၪ့အၥၭအၥိၭ အရ့ၩဒိၪဝ့ၫဒၪ ဆၧဖိၪဆၧဎါလဖၪဒဲ ဆၧထံၭဆၧဘီၩ့လဖၪ ဂဲၫဂၭဂီၩ့ဂၭစၪထၪ့နီၪလီၫႉ ဘဲၫနီၪအၥိၭ ၦခမျၧးလဖၪ အဆၧဆီၪ့ဆၧချဲၫ့နးဆ့ မွဲဂဲၫဘၪထံၭထဲၭဆ့နီၪလီၫႉ

ဘဲၫဂၪ့ခိၪပခမျၧးဂဲၫအၪထၪ့အၥိၭ စဲၭဒူၭလဖၪနးဆ့ ဂဲၫအၪထၪ့ဝ့ၫဒိၪဒိၪအၪအၪလီၫႉ စဲၭဒူၭလဖၪၥံၪယီၩ ခွံၬၡိၬထၪ့ ဆၧၥလိၪၥလံၬဆၧပိၭဆၧလၫ့ အၪမၬနီၪလီၫႉ လၧစဲၭဒူၭဖၧၩ့ မ့ၫဆၫလဖၪ အၪ့လၩ့ဂူၭဝ့ၫဂီၩ့ ကၫဘိၫ့ဒဲၫ့အီၭစဲၭ ဆၧကဲၪထၪ့ မှန်လုံအိမ်အာနိသင် မွဲဝ့ၫ စီၩ့ဂဲးအဂူၫဂၩလဖၪ ဂဲၫစဲၪ့ထၪ့အၪ့မၬနီၪလီၫႉ စီၩ့ဂဲးလဖၪယီၩ ဂဲၫစဲၪ့ထၪ့ ဘဲၫယီၩၥိၭအကၠီၩ့ ဂၪ့ခိၪအခၪ့ထံၭလံၩအထုၪ့လဖၪ ဂဲၫခိထၪ့ဂီၩ့ ဂဲၫကဲၪထၪ့ ခိဆၧၩ့ချံၪ့ ဆၧအၪ့လဲၩ့ထၪ့အၥၭနီၪလီၫႉ စီၩ့ဂဲးလဖၪဒဲ ဆၧခိၬၡိၬဆၧပိၭဆၧလၫ့ၥံၪအကၠီၩ့ ဂဲၫကဲၪထၪ့ လံၩအထုၪ့ဖၧၩ့ၥလိၪၥလံၬထၪ့ႇ ထံၫလၧပအီၩ့ ဂဲၫလၩ့ၡၩထၪ့ႇ ဆၧအၪ့ဆၧအီၩ့ လဖၪဂဲၫလၩ့ထၪ့ဒဲ ဆၧဆီၫ့ဆၧချဲၫ့အအၧၩ့လဖၪနီၪလီၫႉ ခိဆၧၩ့ချံၫ့ဂဲၫအၪ့လဲၩထၪ့အၥၭအကၠီၩ့ ၦခမျၧးလဖၪ အဆၧဆီၪ့ဆၧချဲၫ့ နးဆ့ ဂဲၫဘၪထံၭနၭထၪ့နီၪလီၫႉ

လၧခဲၫ့ ဆံၫနံၪ့အဖၧၩ့ ဂၪ့ခိၪအလးကိၭစီၪ့ ဆၧအခိနီၪ ကဂဲၫအၪ့ထၪ့န့ အထီဘဲၫယီၩဆၧအခိ ၁.၅ ဒီဂရီ ဆဲလ်စီးယပ် နီၪလီၫႉ အ့ၪဆၧဂဲၫခိဆီၪ့ထၪ့ ဘဲၫယီၩၥိၭအခၫ ဂၪ့ခိၪၦခမျၧး ဖိၭဘိၭ ခွး ၃၅၀ ကဘၪထိး ဆၧခိဆီၪ့ဂီၩ့ ဖီၪ့ထၪ့ဖံၭထၪ့ဆၧမၩအဂဲးကလၩ့ဆါအကၠီၩ့ ပကိၪ့ၥ့ၪလဖၪ ထယၬထၬဝ့ၫဒၪနီၪလီၫႉ ဘၪထွ့ၫလၧ ဆၧခိအၪထၪ့ဘဲၫယီၩၥိၭနီၪ ၦခမျၧးၥံၪလဖၪ ဂဲးဆၧအၪ့ကလၩ့ဆါႇ ဆၧခိဆီၪ့ထၪ့အကၠီၩ့ ထံၫကလၩ့ၡၩဂီၩ့ ဂူၭလ့ၩဆၧဆၫလဖၪကဲၪထၪ့ၥ့ၪဝ့ၫဒၪနီၪလီၫႉ