ထံၫနီၪ ၥိၩ့ထၪ့ဘဲၫ ထီး ဆံၭ (၄)

လၧအဖီၩ့ခွံၬဆံၫနံၪ့အထီဒၪအိၩ ဂၪ့ခိၪထၧၫ့ဘံၪ့ယၫ ထံၫကန့အဂး ဖၧၩ့ၥၭအဂ့ၩလဖၪ လ့ၩထၪ့လ့ၩထီၫ့နးဆ့ ၡၩအဆၧဝံဆၧနၬ ဖိၬဘိၭ ခွး ၁၀၀၀နီၪ ထံၫလၧပအီၩအဆံၫ့အဖျ့ၪလန့ဒံၭဘၪဒဲ အီၪထး ဖိၬဘိၭ ခွး ၂၅၀၀နီၪနးဆ့ ဂ့ၩလၧဆၧဆီၪ့ဆၧချဲၪ့အဂးထံၫအဂ့ၩလဖၪ လန့ဒံၭဘၪအကၠီၩ့ ဆၧဆီၪ့ဆၧချဲၪ့ကိၪ့ၥ့ၪလဖၪ လီၩထၬဝ့ၫဒၪလီၫႉ လကၭဒံၭဘၪ ထီၩ့နံၪ့ ၂၀၂၅နံၪ့ ခိၬနီၪ ဂၪ့ခိၪၡၩအဆၧဝံဆၧနၬဖိၬဖၫ့နီၪ ကဘၪဒၪဎီၩ့ဆၧၫ့ယၫ အီၪဂဲၫကဲၪထၪ့လၧထံၫဆၧဆူၭဆၧဆၫၥံၪအကၠီၩ့ ၦကိၪ့ၥ့ၪအၪ့ဎၬဆၧလဖၪလီၩထၬဝ့ၫလီၫႉ နံၪ့ ၂၀၃၀ထၪ့ဘၭခိၬနီၪ လၧဂၪ့ခိၪချိၫ့ယီၩ ဆုးလ့ၩထၪ့ထီၪ့ဝ့ၫဒၪလးကျဲၩ့လဖၪ ထံၫကလိၫဝ့ၫ ၅၀ယၩဒူၩဘျဲၪအကၠီၩ့ လီၩထၬဝ့ၫဒံၭနီၪလီၫႉ

အထီလၧယၫ ကဘၪဒၪဎီၩ့ဆၧၫ့ယၫဆၧဒုၭၥုၭနီၪ လမွဲဘၪ ထံၫဂဲးခးဂဲးဒဲ ကဂဲၫကဲၪထၪ့လၧ ထံၫပအီၩ ကန့အဂးအကၠီၩ့ အၪ့ဎၬထယါထၬကၠၭဝ့ၫဒၪလီၫႉ ၡၩအဆၧဝံဆၧနၬဂဲၫအၪထၪ့နီၪဆ့ မွဲထံၫလၩ့ၡၩအခၪ့ထံၭခၪ့ဎၧၩ့ ကမံၩ့ဆ့နီၪလီၫႉ ၦလၧဘၪဒၪဎီၩ့ဆၧၫ့ယၫထံၫၡၩအဆၧကၪဆၧဂဲၩ ဆုးလ့ၩထၪ့ထီၪ့ထံၫခးလဖၪၥံၪနီၪ ထၪ့ဘၭ နံၪ့ ၂၀၅၀ခိၬနီၪ ၡၩအဆၧဝံဆၧနၬ ဖိၬဘိၭ ၃၅၀၀နီၪ ကဘၪဒၪဎီၩ့ဆၧၫ့ယၫ ထံၫၡၩဒဲ ထံၫလန့လၧၩ့ဘၪ အဆၧကၪ ဆၧဂဲၩအကၠီၩ့ ဂၪ့ခိၪကုလၭၥၭပဂၭခရၧၫ့ဒိၪ ထယါထၬနီၪလီၫႉ

ပယၩ့အဆၧချဲၩ့ဒီၩ့အီၪဝ့ၫ ရေအသက်တမနက် ထမင်းအသက်ခုနစ်ရက် ဆၧချဲၩ့ဒီၩ့ယီၩအၥိၭ ထံၫလအီၪဘၪ ဆၧအၥၭၥံၪလဖၪထီးအလူၬ မွဲကမၧၫ့န့နးမံၩ့လၧၩ့အ့ၬနီၪလီၫႉ လၧခးပယၩ့ယီၩ ၡၩအဆၧဝံဆၧနၬ ၇၀ယၩဒူၩဘျဲၪနီၪ မွဲၦလၧလအီၪဘၪဝံးနီၪလီၫႉ

ၦလၧနၩ့နၩ့လီၩကၠၭဝ့ၫဒၪ ကမိၥိၩ့ထီး ဘဲၫၥိၭ ထံၫ စွါဘဲၫႉ ၦလၧအလီၩဆၧလဖၪၥံၪယီၩ ကမွဲ လထီၩ့ယံၫ ယဘၪ ထံၫၡၩအလးနီၪလီၫႉ ထံၫယီၩအ့ၪမွဲၡၩတၡါအလးနီၪ ထီးအီၪနးဆ့ ကဘၪအၪ့ဎွ့ၩကကၪ ဘၪလီၩ့ဎွါကၪ ဝ့ၫဒၪ ဆၧၫ့ထီဘဲၫယီၩ ၥိၩ့ထၪ့ထံၫ ဘဲၫထီးအကၠီၩ့ လၧဆၧအဲၪကွံၩဎိၩဒိၪအဖၧၩ့ မိဖ့ၪလၫ့ဘၪနၥံၪ ဆၧထုၪ့ၥုၪ့ထုၪ့ၥၭ နီၪလီၫႉ