ကဲၪဆၧအဲၪတၩ့အထီ အဲၪဘိၩ့လိၬၥၭနီၪ ဆၧလၩ့ဆၫ့အီၪမန့လဲၪ?

မုဆၫကနံၩယီၩ ဆၧအဲၪတၩ့ၥံၪအကျၩ ကဂၩဒဲကဂၩ ဆၧတီၩဆၧလီၩ့ လၩ့ၡၩဝ့ၫဒၪ အၪမၬယူၭနီၪ ပဒၪဘၪလီၫႉ ကအဲၪဘိၩ့အဆၧအဲၪတၩ့အဂး အၥၭယီၫဝ့ၫဒၪ ၦလဖၪနီၪ စံၭယံၩ ယါဝ့ၫ ပကဲၪဆၧအဲၪတၩ့အထီဒံၭလီၫ ပအဲၪဘိၩ့လိၬၥၭနီၪဘၪန့လဲၪႉ လၧပမိအၪ့န့လဂၩနီၪ ပရွံ ထၪ့န့ဘိၩ့ဒံၭနဲၪႉ စံၭယံၩယါကၠၭဝ့ၫ ဘဲၫယီၩအၥိၭနီၪလီၫႉ

ဆၧနီၪအကၠီၩ့ အဆိၪထုၬပကဘၪၥ့ၪယၫနၪၥ့ၪထၬနီၪ ပကဲၪမုၪမွဲဂ့ၩ ခွၫမွဲဂ့ၩ ပဆၧအဲၪ တၩ့အီၪထၬခဲခဲ အ့ၪပကအဲၪဘိၩ့ ပဆၧအဲၪတၩ့နီၪဘိၭ  ပဝ့ၫၥံၪယီၩ မီၪ့ဎီၩ့ ပလီၩဖ့ၪနဲၪလၩ့ပၥၭ ယၧၩနီၪမွဲၡၩဆၫ့ဖၨၪလူ့အောက်တန်းစားလီၫယါဧ့ႉ ဘဲၫနီၪအၥိၭလီၫႉ ဆၧအဲၪဘိၩ့ဆၧယီၩ လၩ့ မ့ၬမဲအဂဲး လၥ့ၪဘၪဝ့ၫ နၪဝ့ၫလၥ့ၪဘၪနီၪဆ့ အဝ့ၫၥံၪအဂး ဖျီၪလၩ့ယၫ့ၥၭနၬမၬလ့ၬႉ

ပကကဲၪထၪ့ မၫအဂ့ၩလဂၩ ဝၩအဂ့ၩလဂၩအဂးနီၪ စၭထၪ့လၧ ပကဲၪဆၧအဲၪတၩ့အထီ ပကဘၪအီၪက့ၪဒိၪ ပဆၧအဲၪတၩ့ႇ လၧပဆၧအဲၪတၩ့အလးခဲၫ့ ပကဘၪအီၪလၧ ဆၧလၩဆၧဖၩ့ ဖၧၩ့ လၧဆၧတီၩဆၧလီၩ့အဖၧၩ့နီၪလီၫႉ ဆၧအယီၩနီၪ မွဲလၧပအဲၪပဆၧအဲၪတၩ့လၧဆၧလၩဆၧဖၩ့ အဖၧၩ့နီၪလီၫႉ

ယအဲၪနၧၩ ဆၧချဲၩ့အလးခဲၫ့နီၪ ဆၧမွဲဆၧတီၩအီၪႇ ဆၧယူၭယၪ့အီၪႇ ၥၭဆၧဒူၩဆၧယး အီၪႇ ပကဘၪအၪ့န့ မူၩဒၩလဖၪ ပၫထဲးဎုၬဝ့ၫ ဘဲၫယီၩအၥိၭနီၪလီၫႉ မူၩဒၩလဖၪယီၩ အ့ၪပအၪ့န့ လန့ဘၪနီၪ ကြၨၭပအဲၪၦၡၩနးဂၩအ့ၬႉ ပအဲၪၦၡၩနီၪဂီၩ့ အဝ့ၫအဖၫ့ခိၪ ပအီၪက့ၪထၬ ဆၧမွဲဆၧ တီၩနီၪ မွဲလၧပအၪ့န့မူၩဒၩကမံၩ့အကၠီၩ့တၭ ၦလၩဖၩ့အီၪလဖၪနီၪဘိၭ ဆၧအဲၪတၩ့အထီမွဲဂ့ၩ ထၧၫ့မၫဝၩအထီမွဲဂ့ၩ အီၪက့ၪဒိၪအဆၧအဲၪတၩ့လဖၪ လဆိၩၡၩနီၪလီၫႉ

ၦအလၩအဖၩ့လအီၪဘၪလဖၪနီၪဒီၭ ဆၧအဲၪတၩ့အထီမွဲဂ့ၩ ထၧၫ့မၫဝၩအထီမွဲဂ့ၩ ကအဲၪ ဘိၩ့ဒၪဆၧ ကဆိၩၡၩဆ့နီၪလီၫႉ ဆၧအယီၩနီၪမွဲလၧ ၡၩဆၫ့ဖၨၪဒဲ ၦအီၪလၩအီၪဖၩ့လဖၪ ဆၧလလၩ့ဎိၭဘၪနီၪလီၫႉ ဆၧနီၪအကၠီၩ့ ပကမိကဲၪၡၩဆၫ့ဖၨၪဧၪ အ့ၪလမွဲဘၪဘိၭ ပကမိကဲၪ ၦလၩဖၩ့အီၪလဖၪဧၪနီၪ ရွံထၪ့န့ဒၪပၧၩလါဆံၭႉ Credit to original writer