အ့ၪနမိအဲၪဘိၩ့ဆၧယူၭစွါဘဲၫ (၁)

မုဆၫကနံၩယီၩ ပကဒၪဘၪထၧၫ့မၫဝၩၥံၪ အဲၪဘိၩ့လိၬၥၭဂဲၫအၪအၪ့အၪအၪလ့ၬလ့ၬနီၪလီၫႉ အဝ့ၫၥံၪနီၪ မွဲဆၧမ့ၬမဲလအီၪကၠၭလၧၩ့ဘၪနီၪလီၫႉ ဆၧနီၪအကၠီၩ့ကနံၩယီၩ ဘၪထွ့ၫလၧဆၧအဲၪဘိၩ့လိၬၥၭအဂဲးနီၪ ယမိလီၩၥ့ၪ ယၫအ့ၪဘၪနၥံၪ ၡါဖိၪကယွ့နီၪလီၫႉ လၧကကၠၪအိၩ ၦဎွၩကဂၩနီၪ ရွံထၪ့ၦမုၪလၧအဂ့ၩထုၬလဂၩနီၪဂီၩ့ ထံၭလၫ့ဝ့ၫ လၧနးဎွၩမုၪအလးနီၪလီၫႉ  ကနံၩတၭ ၦအဘၪအၪ့ဖီၪ့အ့ၪၦဎွၩယီၩမ့ၩအွံၪၥုၪ့ဆၧၫ့လဂၩနီၪ ဒၪဘၪနးဎွၩမုၪနီၪအထီ နးဎွၩမုၪအဆၧဎံၪဆၧလၩနီၪ မၩဝၭထိၬအဝ့ၫအၥၭဒိၪဒိၪလ့ၬနီၪလီၫႉ စၭထၪ့လၧမုနံၩနီၪအဝ့ၫယီၩအၪ့ထံၩ့အၪ့ဖီၪ့အခၫ အၥၭအီၪစိၩဒၪလၧ နးဎွၩမုၪနီၪအအီၪအကၠီၩ့ အၥၧၫ့လဖၪနီၪ အအွံၪအဆၧၫ့လဘၪလၧၩ့ဘၪနီၪလီၫႉ ၦဎွၩယီၩအၪ့မ့ၩ အခၫ ၥၧၫ့ၥံၪလဖၪနီၪ အအွံၪအဆၧၫ့လအီၪလၧၩ့ဘၪအဂဲး ထုၪ့အၥၭချုၭအကၠီၩ့ ထၪ့ဘၭ၇ၥၫ့ကကၠၪ အၪ့စၪ့ၦအအီၪ ဖီၪ့ဆၧနီၪ ဘဲၫယီၩနအၪ့ဖီၪ့ဆၧလဖၪ အအွံၪအဆၧၫ့အီၪလၧၩ့အ့ၬနဲၪ နဆၧကၪဆၧဂဲၩအီၪမန့လဲၪ လီၩအ့ၪယၧၩတီၩ တီၩနးထံၪ ၦဎွၩအၪ့စၪ့ဘဲၫနီၪကကၠၪ အဝ့ၫယီၩ စံၭဆၧၫ့ထဲၩ့ၦဎွၩ အဝ့ၫကမိမံၫလၧနးဎွၩမုၪနးနၩအဂဲးနီၪလီၫႉ အနီၪ ဘိၭ ၦဎွၩနီၪဆ့ လၧအၥုၪ့ဒိၪၥၭဒိၪဖၧၩ့ မွဲယူၭ အ့ၪမွဲဘနီၪဘိၭ ကနၩယီၩ၉နၩရံၫအခံၫ့ ယကအၪ့မၧၫ့ ယနးဎွၩမုၪနီၪ လ့ၩဆီးနၧၩ စံၭထဲၩ့ဝ့ၫဘဲၫနီၪလီၫႉ

ၦအၪ့ဖီၪ့ဆၧနီၪ လၧဆၧၥုၪ့ဎွံၪၥၭယီၫအဖၧၩ့ ထဲၩ့ခိၭနးဎွၩမုၪနီၪ လၧအဝ့ၫအဒူၭဖၧၩ့နီၪလီၫႉ ၉နၩရံၫဘၪအခၫ နးဎွၩမုၪနီၪ ဂဲၫဒိၪထိၬအဝ့ၫအတရၫ့နီၪလီၫႉ လၧအစူၪဖၧၩ့ ဂဲၫဆိၬန့ထဲး ထံၫခွၭ၅ခွၭဂီၩ့ ထံၫခွၭလဖၪနီၪဘိၭ ၦၡၩဖိၭ လိၭန့ထၬလၧ စ့ၩႇ ထီၫႇ ထီးဘၩ့ႇ ကီၫဒဲ လၧၡၬလဖၪနီၪလီၫႉ နးဎွၩမုၪယီၩ အၪ့မၧၫ့ၦအၪ့ဖီၪ့ဆၧနီၪ အီၩထံၫလဖၪ နီၪလီၫႉ ၦအၪ့ဖီၪ့ဆၧနီၪ အီၩဝံၭထံၫလဖၪဂီၩ့အခၫ လီၩဘၪနးဎွၩမုၪ လၧကမိမံၫဎုၬဝ့ၫအဂဲးနီၪလီၫႉ

ကဲထၧၫ့ဖုဝဲၥံၪယီၩ ဆၧအဂဲးယီၩအီၪထးထီၫလ့ၬဒံၭအကၠီၩ့ မုကနံၩယီၩနီၪဘိၭ ပကအီၪပထုၬထၬ လၧအ လးထယီၩဂီၩ့ အီၪထးဝ့ၫဒၪဆၧအဂဲးလဖၪနီၪ လၧခဲၫ့နးနွံၫဒိၭမၬ ယကဆုးထဲၩ့ရၩလၩ့န့အ့ၪဘၪ နၥံၪအကၠီၩ့ အီၪခိၭ ခိၭနၪဘၪလါဆံၭနဲၪ ႉ မွဲယွၩယိထဲၩ့ခွါထဲၩ့နၥံၪကိၭဂၩဒ့ၭလါဆံၭႉ