ကဂၩဎးလီၫ လါနၫ့ဆၧလၩ့စဲၪအီၪအ့ၬႉ

     အ့ၪမွဲနၥံၪဒၪ ၦၡၩအီၪလဂၩဎးလီၫဘဲၫနီၪအခၫ နၥံၪကစီၪဘၪလၧ ၦၡၩအနီၪဘၪအီၪထးန့ၫလဂၩလီၫဘဲၫနီၪၥ့ၪဝ့ၫလီၫႉ အၡါမၪနီၪ ဘဲၫနၥံၪစီၪအၥိၭ အဝ့ၫၥံၪနီၪ ဘၪအီၪထးန့ၫလဂၩလမွဲဘၪလီၫႉ အဝ့ၫၥံၪဒၪအဝ့ၫ ရွံထၪ့ဝ့ၫလၧကအီၪဒၪဝ့ၫ လဂၩဎးအဂးနီၪလီၫႉ ၦဘဲၫနီၪၥိၭလဖၪနီၪ ကလ့ၩလၧဆၧကယူကစူၩအလးဂီၩ့ အ့ၪမွဲမိဖီလံၬစွါဘဲၫကဖီဝ့ၫႇ ထၩ့လၫ့ထၬ နါထိၭလၧအနါဖၧၩ့ဂီၩ့ အ့ၪမွဲမိခိၭနၪဆၧၥၭအွံၪစွါဘဲၫ ကခိၭနၪဝ့ၫႇ လၧအဝ့ၫၥံၪအဲၪဒိၭဝ့ၫလဖၪနီၪကမၩဝ့ၫဒၪဂီၩ့ ကမုၬၥုၪ့မုၬၥၭ ဒၪအဝ့ၫၥံၪလီၫႉ

        ဂီၩ့နီၪကဆၧၫ့နၩ့အီၪလၧ ဆၧအနိၫ့ကနိၫ့ဂီၩ့ ကလီၩ့ယိထၪ့ၦၡၩလဖၪ ဆၧထံၭဆၧဘီၩ့လဖၪဂီၩ့ ကနံမွံၫထၪ့ဒၪဝ့ၫႇ ကအီၪလၧၦၡၩကျၩအလးနီၪအဝ့ၫၥံၪယီၩ ကအီၪလၧၦၡၩအယဲၩ့ဂီၩ့ ယိစိၩဘၪၦၡၩလဖၪနီၪ အဝ့ၫၥံၪယီၩအဲၪဒိၭဝ့ၫနၬနီၪလီၫႉ အ့ၪမွဲလ့ၩစဲၪထၪ့လၧခီၫ့ဆ့ ၦၡၩအီၪအၪအၪလးလဖၪနီၪ ဂၭဎ့ၬလ့ၩဝ့ၫဒၪလီၫႉ လၧဆၧဖံၭဆၧမၩဖၧၩ့ဒဲ အ့ၪမွဲဘၪအီၪလၧ ၦၡၩအၪအၪအကျၩစွါဘဲၫ ဘၪချဲၩ့ဘၪနံဝ့ၫလါနၫ့ အဝ့ၫၥံၪအဂးဆၧမုၬအၥၭလအီၪဘၪလီၫႉ

        အဝ့ၫၥံၪယီၩကကျ့ၭစၨၭအီၪဒၪကဂၩဎးလၧဆၧကယူကစူၩအဖၧၩ့နီၪလီၫႉ ၦၡၩအီၪအၪဝ့ၫဒၪအလးလဖၪနီၪ ဖ့ၪလၫ့ အဝ့ၫၥံၪဆၧမုၬၥၭလန့ဘၪလီၫႉ အဝ့ၫၥံၪယီၩမွဲလအဲၪဒိၭဘၪဆၧမုၬဆၧလၩအ့ၬႉ ဘၪအီၪကဂၩဎးလီၫနီၪအဝ့ၫၥံၪအဂး မွဲအမုၬ ထုၬအကၠီၩ့နီၪလီၫႉ အဝ့ၫၥံၪအဂး အဝ့ၫၥံၪမၩထၪ့ထၬဆၧမုၬဆၧလၩမၬအီၪဝ့ၫဒၪအၪမၬလီၫႉ အဝ့ၫၥံၪအဆၧထိထီၫနီၪ မွဲဝ့ၫဒၪလၧ I’m alone. But not lonely ကဂၩဎးလီၫလါနၫ့ ဆၧလၩ့စဲၪလအီၪဘၪ စွါဘဲၫႉ