ထီးဖျါလုဘၪဖိၪဒံၪလဖၪအၥၭလုထီးလူၬလဂ့ၩ

ထၧၫ့ဖုဝဲထံၩၥိၭထီးလူၬၥံၪဧ့ႇ မုကနံၩယီၩလၧမုၬလၩၥၭဎွံၫဂံၪ့ဒီၪ့ဆံၫ့ဎံၪ အဆၧထံၫလၩ့ဒီၪလၩ့ဖၧၩ့ယအဲၪဒိၭလီၩၥ့ၪယၫအ့ၪဘၪနၥံၪနီၪ ယဖီထၬဘၪလၧ သင်သိအပ်သောသင့်ဘဝ လံၬစီၩ့ဖၧၩ့ မိဖါလဖၪနီၪဖျါလုထၬဖိၪလဖၪအၥၭလုထီးလူၬလန့ဘၪအဂဲးနီၪလီၫႉ လၧပယၩ့ခီၫနီၪဘိၭ ပကဘၪစံၭဝ့ၫလၧ သားသမီးကို အလိုမလိုက်ပါနှင့် အဂဲးနီၪလီၫႉ

မုဆၫကနံၩယီၩဖိၪအအၧၩ့အၥၫ့လဖၪအကၠီၩ့ မိဖါၥၭၡါလၧဘၪဒၪခီၩ့ဆၧၫ့ယၫ ဆၧၡၪ့ဆၧနၭလဖၪအီၪဝ့ၫအၪအၪဒ့ၭနီၪလီၫႉ မိဖါအဆၧချိၩ့လဖၪနီၪ လခိၭနၪဘၪဝ့ၫဂီၩ့ လၧမိဖါၥၭၡါ လဖၪအဖၫ့ခိၪလအီၪက့ၪထၠလၧၩ့ဘၪဆၧယူၭယၪ့လဖၪဒဲ ရၧးစၧးဝ့ၫဂ့ၩဘၪစဲၪ့ၥၭဘၪ့လဖၪပိၪဒံၪလဖၪအီၪဝ့ၫ ဎံၩ့ဎီၩ့ဒ့ၭနီၪလီၫႉ ကနၩ့နၩ့ဂၭဖၬလၧ ၥၭၡါလဖၪအမ့ၬယၫ ကယဲးထဲးဝ့ၫမၩဆဲဆဲလီၫ ၥၭဘၪ့မုၪခွၫ ဘဲၧနီၪၥိၭ ပဒၪဘၪကိၭမၪခိၭမၪနီၪလီၫႉ

ဖိၪလံၩၥံၪလဖၪဘၪကဲၪထၪ့ဘဲၫယီၩၥိၭနီၪဘၪန့လဲၪႉ  ပဖိွပလံၩလဖၪဘၪကဲၪထၪ့ဘဲၫယီၩၥိၭနီၪ ဘၪထွ့ၪလၧဆၧအဂဲးနံၫမံၩ့ယီၩနီၪလီၫႉ အဆိၪထုၬကမံၩ့နီၪလၧပဖိၪပလံၩအဆံၭဆံၭအထီအိၩကယဲအဝ့ၫၥံၪအဲၪဒိၭမၩနးမံၩ့ ပမၩလၧၫ့ဎွၩထၪ့အ့ၪအဝ့ၫၥံၪထီးလူၬ ပဖျါလုထၬအဝ့ၫၥံၪအၥၭလုဂ့ဘၪစဲၪ့အကၠီၩ့နီၪလီၫႉ နံၫထံၪကထံၪနီၪဘိၭ လၧပဖိၪပဒံၪအဆံၭဆံၭအထီအိၩ ပကဲၪမိဖါလဖၪကဂၩဒဲကဂၩပဂဲၫဆဲၩ့အီၪအၪ့လၧပဖိၪပဒံၪအမ့ၬယၫဘဲၫၥ့ၪလဲၪနီၪလီၫႉ စံၭမၬချၭ-ပကဲၪမိဖါနံၫဂၩနီၪ ကနံၩဘၪကနံၩပကဎၪလိၬဎၪဆံၫ့လိၬၥၭ ပကဒိၪထးလိၬၥၭ ပကစံၭၥိၭလၩ့ဂၩလိၬၥၭ ကဂၩဒဲ ကဂၩပယူၭယၪ့လီၬၥၭအ့ၬအဂဲးပဖၪနီၪအ့ၪမွပကမၩနဲၪအ့ၪပဖိၪပဒံၪလဖၪစွါဘဲၫ ပဖိၪပဒံၪယီၩဆ့ မွဲကလီၩ့မၩဒီၩ့ပၧၩဂီၩ့ကကဲၪထၪ့ၦလၧအရၧးစၧးလဖၪနီၪလီၫႉ

ဘဲၫနီၪအၥိၭ ပဖိၪပဒံၪလဖၪနီၪ ပအူၪၡိၫထၬ မၩနၧၩ့မၩစၪအထံၩၥိၭလါနၫ့ပအဲၪ့ဆံၫ့အ့ၬပဖိၪမၬပဖိၪပၥီၪ့ၥၫ့အဝ့ၫၥံၪအ့ၬ ပဖိၪပဒံၪလီၩ့လံၬလန့ဘၪအကၠီၩ့ ရၧးစၧးအကၠၩ့ ရၧးဆၧးအကၠၩ့ ဆၧရၫဆရၫမုၪလဖၪအဲၪ့လိၬအဲၪ့ဆံၫ့အဝ့ၫၥံၪထးအဝ့ၫၥံၪအခၫ ပကဲၪမိဖါလဖၪပဘၪပၥၭအ့ၬပလ့ၩလီၩ ၡိၫထဲၩ့ဆရၫမုၪလဖၪ ပကမၩပၥၭ ဘဲၫနီၪအၥိၭစွါဘဲၫမွဲပကန့ဘၪဖိၪလၧအဂ့ၩအဘွၩလဖၪအ့ၬပကန့ထဲၩ့ဘၪဒၪ ဖိၪလၧအရၧးစၧးလဖၪအအၧၩ့အၥၫ့ဖၪအၡါၡါနီၪလီၫႉ

ဆၧနီၪအကၠီၩ့ ဘဲၫဆၧချဲၩ့ဒီၩ့အီၪဝ့ၫ ဖိၪလဂ့ၪဘၪ မိဖါခိၪဎွံၫအၥိၭ မိဖါၥံၪဧ့ အ့ၪမွဲနဖိၪနဒံၪ လဖၪကအၧၩ့ၥၫ့နီၪ မွဲကထီၩ့လၫ့ဒၪလၧနခိၪဎွံၫဖၫ့ခိၪနီၪလီၫႉ ဆၧနီၪအကၠၩ့ အ့ၪမွဲနၥံၪအဲၪဒိၭန့ဘၪ ဖိၪလၧ အဂ့ၩအဘွၩလဖၪစွါဘဲၫစၭထၪ့ဆၧအဝ့ၫၥံၪ အဆံၭဆံၭနီၪ ထီးမၩလၧၩ့ဎွ့ၩထၪ့အ့ၪဘၪ အဝ့ၫၥံၪအၥၭလုထီးလူၬလဂ့ၩႉ လၧအကြၨၭအဘၪအလးနီၪမၭဖျါလုဒၪလါဆံၭႉ မိဖါလဖၪနီၪမွဲလၧ ဖိၪလဖၪအနွၩအကၠီၩ့တၭဖ့ၪနဲၪ့ထၪ့ဘၪဖိၪလံၩလဖၪ ဆၧဒီၩ့ဆၧထ့ၬအဂ့ၩအဘွၩလဖၪလါဆ့ၭႉ