ၦမၩဎွ့ၩထၪ့ပၩရမံၫ (2)

၆ႉ ဆၧအွံၪၥၭဆၧၩ့ဆၧ ဆၧအွံၪၥၭဆၧၩ့ယီၩ အ့ၪပလီၩနီၪယီၫလါနၫ့ ပကမၩထၪ့အဂးနီၪ မွဲကၪဂဲၩဝ့ၫအၪမၬလီၫႉ လါနၫ့ လၧဆၧအဲၪတၩ့ဖၧၩ့ၥၭထၧၫ့ဖျီၩ့ယၫအဖၧၩ့ ဘၪဂဲၫထဲၩ့ဒၪဆၧကၪဆၧဂဲၩ ဆၧဂ့ၩဆၧအၧၩ့ကိၭမံၩ့အဖၫ့ခိၪ အွံၪၥၭဆၧၩ့ဝ့ၫဂီၩ့ ကဂၩဒဲကဂၩ ၥၭလလၩ့ဖၭဘၪဒဲ ထဲၩ့မၩထၪ့ဆၧဖံၭဆၧမၩလၧအခိးအတၩအီၪလဖၪန့ဝ့ၫဒၪထၧၫ့အထုၬစွါဘဲၫ အယီၩနီၪမွဲၦမၩဎွ့ၩပၩရမံၫလဖၪ အၥုၪ့အၥၭနီၪလီၫႉ

၇ႉ အဆၧအုၩ့လၩ့ဂုးခၧၫ့ ပၩရမံၫ ဆၧဖံၭဆၧမၩနီၪ မၩထၪ့ဝ့ၫ တီၩတီၩလီၩ့လီၩ့လီၫႉ ဎွ့ၩမၩဝ့ၫန့နီၪ မၩထၪ့ဝ့ၫလီၫႉ အဝ့ၫမၩလန့ဘၪအဂး ချဲၩ့ဎိၩအနိၭလအီၪဘၪဒဲ လီၩ့ဖ့ၪလၫ့ပျီၩၦဂူၫဂၩဆၧယိလါဧၪအ့ၬႉ ဘဲၫအဝ့ၫမၩန့အၥိၭအဝ့ၫယီၩလီၩဝ့ၫဒၪ မၩဝ့ၫဒၪ တီၩတီၩလီၩ့လီၩ့လီၫႉ

၈ႉ ဆၧခွံၬလၩ့ၥၭ ဂုးခၧၫ့ဝ့ၫဒၪ ပလီၩထၬလၧပကဖ့ၪလၫ့နီၪ ပကဘၪဖ့ၪလၫ့ႇ ပမၩအ့ၪလန့ဘၪဆၧအဂဲးကမံၩ့အဖၫ့ခိၪ ပကဘၪချဲၩ့ပဒၩ့ဂ့ၩဂ့ၩဘၪဘၪ ဘဲၫအဝ့ၫကအီၪအၪ့ဘၪဂ့ၩဂ့ၩအဂး ပမၩထၪ့အ့ၪကန့နီၪ ပခွံၬလၩ့ထၬပၥၭ ဂုးဂုးခၧၫ့ခၧၫ့န့မၬ ကအီၪဘၪနီၪလီၫႉ

၉ႉ အီၪက့ၪထၬ ဆၧအဲၪဆၧကွံၩ မုလါဝ့ၫအဆၧအဲၪတၩ့အီၪဘၪအၪ့ဘၪဂ့ၩဂ့ၩဘၪဘၪဂီၩ့ ဘဲၫမုလါဝ့ၫအၥိၭ လီၩ့မၩလၧၫ့ဎွ့ၩထၪ့အ့ၪဝ့ၫနီၪ ပကိၭဝ့ၫလၧ မၩဎွ့ၩထၪ့ပၩရမံၫလၧဆၧအဲၪဆၧကွံၩနီၪလီၫႉ

၁၀ႉ ယိဖၭခွံၬဆၧ ၥ့ၪဝ့ၫဒၪ ဆၧယိဖၭခွံၬတၡါနီၪ ဆၧဒၪအဂ့ၩအီၪမၬ ကအီၪဘၪလီၫႉ ဘၪကဲၪဒိၪအခၫမွဲဂ့ၩ ဘၪလၩ့ၡၪ့လၩ့ယၬအခၫမွဲဂ့ၩႇ လၥၭအုၭလၧၩ့ဘၪဝ့ၫႇ ဘၪထိးအၪ့ကီၫဆ့ လၥုၭအုၭလၧၩ့ဘၪႇ ဘၪထိးအၪ့အူၭဆ့ လကဲၪဘၪအၥၭနးမံၩ့နီၪမၬ ပကိၭဝ့ၫလၧ ဆၧယိဖၬခွံၬနီၪလီၫႉ ဘဘ

ပၧၩယီၩ အ့ၪပစီၪလၩ့ထၬပၥၭလၧ ၦမၩဎွ့ၩပၩရမံၫစွါဘဲၫ ပဆၧအဲၪတၩ့နီၪ အီၪပၧၩမွဲဂ့ၩ မ့ၬလဲၩပၧၩမွဲဂ့ၩ ပကဘၪမၩအ့ၪအဝ့ၫအီၪလဖၪနီၪ ပကဘၪမၩအ့ၪလီၫႉ နဆၧအဲၪတၩ့နီၪ အ့ၪမွဲဘၪထွ့ၫလၧ ပၩရမံၫ၁၀မံၩ့ယီၩစွါဘဲၫ အဝ့ၫနီၪနစံၭလၧ ၦအမၩဎွ့ၩအ့ၪနၧၩ ပၩရမံၫလဂၩန့ယူၭလီၫႉ