ၦမုၪလၧအလူဒိၪဎွ့ၩဒိၪလဖၪ

ပကဲၪၦမုၪမီၪ့ဎီၩ့လါနၫ့ ဆၧကိၪ့ဘၪကိၪ့ၥ့ၪအီၪ မီၪ့ဎီၩ့အ့ၬႉ ဆၧဒၪခီၩ့ခၫ့ဖျီၫ့မီၪ့ဎီၩ့အ့ၬႉ ဆၧၥိၭဆၧကီၩ့အဒီၩ့မီၪ့ဎီၩ့အ့ၬႉ လူၥ့ၪချဲၩ့ၥ့ၪမီၪ့ဎီၩ့အ့ၬႉ အၪ့အီၪလ့ၩထဲၩ့မီၪ့ဎီၩ့လိၬၥၭအ့ၬႉ အနီၪဘိၭ ပဂၩဘၪကဂၩအဆၧၥၭမၧၫ့ မီၪ့ဎီၩ့အ့ၬႉ ဆၧၥၭမၧၫ့လမီၪ့ဎီၩ့ ဘၪအကၠီၩ့ ၥုၪ့ၥၭမီၪ့ဎီၩ့အ့ၬႉ ၥုၪ့ၥၭလမီၪ့ဎီၩ့ဘၪအကၠီၩ့ ဆၧၥၭမၧၫ့အဖၨၪအထီၫ မီၪ့ဎီၩ့လၧၩ့အ့ၬႉ ဆၧၥၭမၧၫ့အဖၨၪအထီၫ လမီၪ့ဎီၩ့ ဘၪအကၠီၩ့ အလူအဎွ့ၩဆ့ မွဲလမီၪ့ဎီၩ့လၧၩ့ဘၪလီၫႉ ဆၧၥၭမၧၫ့အဖၨၪအထီၫနီၪ လမွဲဘၪလၧ ဆၧကဲၪဒိၪကဲၪမုတၭ မွဲဘၪထွ့ၪ ဒၪလၧ ၥုၪ့ၥၭနီၪလီၫႉ ပဆၧဖံၭဆၧမၩကိၭမံၩ့ဒ့ၭနီၪ အီၪဂဲၫကဲၪထၪ့လၧ ပၥုၪ့ၥၭဖၧၩ့ဒဲ လဘၪထွ့ၪဘၪလၧကျိၪစ့ၩနီၪလီၫႉ

အ့ၪပၥုၪ့ၥၭဂ့ၩဘွၩနီၪ ပကန့ဘၪဆၧအဂ့ၩႉ အ့ၪပၥုၪ့ၥၭၥံၫနီၪ ပၧၩမွဲပကကဲၪထၪ့ၦအၥံၫလဂၩဒဲ အ့ၪမွဲပၥုၪ့ၥၭ အုၪဘဲၩ နီၪ ပနးခီၫ့မိၡါမွဲ ကအုၪဘဲၩဆ့နီၪလီၫႉ မွဲလၧပၥုၪ့ပၥၭအကၠီၩ့ ပၧၩယီၩ ပမွဲၦၡၩဘဲၫၥ့ၪလဲၪနီၪ အီၪဂဲၫကဲၪထၪ့ဝ့ၫဒၪလီၫႉ ဆၧနီၪအကၠီၩ့ ၦၡၩကဂၩဒဲကဂၩ ဆၧအဖၨၪအထီၫၥံၪ ဆၧလူဒိၪဎွ့ၩဒိၪၥံၪ လမီၪ့ဎီၩ့ဘၪလိၬၥၭနီၪ မွဲလၧ ၥုၪ့ၥၭလမီၪ့ဎီၩ့ဘၪ လိၬၥၭအကၠီၩ့နီၪလီၫႉ

လၧခးပယၩ့ဖၧၩ့ယီၩ ၦမုၪလဖၪအဆၧဝံဆၧနၬနီၪအီၪအၪနဲၪ့ ၦခွၫအဆၧဝံဆၧနၬ နံၫခွးဘျဲၪနီၪလီၫႉ ဆၧနီၪအကၠီၩ့ ၦမုၪၥံၪအီၪဝ့ၫဒၪ အၪအၪဒ့ၭ လါနၫ့ ၦမုၪလၧအလူဒိၪဎွ့ၩဒိၪအီၪဝ့ၫဒၪလဖၪနီၪ  လၩ့ၡၩဝ့ၫဒၪယူၭနီၪလီၫႉ အ့ၪမွဲပကအီၪအၪ့ ဘဲၫၦၡၩအၥိၭနီၪဘိၭ ပကကဲၪထၪ့ခိၭၦၡၩအၥိၭႉ အ့ၪမွဲပကမိကဲၪထၪ့ ၦမုၪလၧ အလူဒိၪဎွ့ၩဒိၪအီၪကဂၩနီၪဘိၭ ပကဘၪကျ့ၭ စၨၭအီၪ လၧဆၧလူဒိၪဎွ့ၩဒိၪအဖၧၩ့နီၪလီၫႉ

ရသစာပေပျိုးခင်း