ၥၭဘၪ့လဖၪလ့ၩထၪ့လ့ၩထီၫလန့ဘၪနီၪ ဘၪနီၪလဲၪ?

ၥၭဘၪ့လဖၪ လ့ၩထၪ့လ့ၩထီၫလန့ဘၪနီၪ ဆၧဘၪထွ့ၪအီၪဝ့ၫဒၪ အၪမံၩ့နီၪလီၫႉ လၧဆၧလဖၪနီၪအဖၧၩ့ အဆိၪထုၬ မၩဂၭဂီၩ့ၥၭဘၪ့လဖၪအဆၧၥၭမၧၫ့ကလ့ၩထၪ့လ့ၩထီၫကမံၩ့နီၪ မွဲလၧဆၧကိၪ့ဘၪကိၪ့ၥ့ၪကၠီၪ့ဖျီၩ့အမၪဘၪနီၪလီၫႉ ခးပယၩ့ ဆၧကိၪ့ဘၪကိၪ့ၥ့ၪအဖၧၩ့ ဆၧထိၪတွၭအၪ့ဎၬဆၧ ဆၧကိၪ့ၥ့ၪဒဲ အတဲၩ့ကဲၪထၪ့ဆၧအၥၫ့ဆၧကိၪ့ၥ့ၪနီၪ မွဲလထံၭလၩ့ထဲးဘၪဝ့ၫ အကၠီၩ့ ခးပယၩ့ၥၭဘၪ့လဖၪယီၩ ဘၪထွ့ၪလၧဆၧအဂဲးလဖၪနီၪ အီၪထးလၧထံၪခးဂူၫဂၩ ၥၭဘၪ့လဖၪအလးခဲၫ့ ယဲၩ့ယိၬ နီၪလီၫႉ

 လခဲၫ့ နံၫမံၩ့ကမံၩ့နီၪ ဘၪလီၩ့ဖိၬမိဖါၥံၪအၥၭလၨအကၠီၩ့ ၥၭဘၪ့လဖၪလ့ၩထၪ့လ့ၩထီၫလန့ဘၪနီၪလီၫႉ စံၭမၬချၭ ဖိၪနီၪအၥၭဆုးလီၩ့ဝ့ၫဒၪလၧ ၦၥုၪ့ဆၧလါနၫ့ မိဖါခီၫ မုလါအဖိၪနီၪ ကဲၪထၪ့ၥံၪ့ဎွံၪဆရၫလဂၩ ဆၧနီၪအကၠီၩ့ အၪ့မၧၫ့အဖိၪကဲၪ ၥံၪ့ဎွံၪဆရၫနီၪလီၫႉ ကဲၪထၪ့ဘဲၫနီၪၥိၭအခၫ လခဲၫ့ထုၬၥၭဘၪ့ယီၩ ကဲၪထၪ့ဝ့ၫဒၪၥံၪ့ဎွံၪဆရၫကဂၩလါနၫ့ ဆၧမၩအနီၪမွဲအဝ့ၫ လဘၪဘၪအၥၭအကၠီၩ့ အၥၭဆုးလီၩ့အီၪဖိၭဘိၭအ့ၬဘိၭ မၩဒိၭဝ့ၫဒၪထၧၩ့အမူၩဒၩထီၩ့လၫ့ထၪ့ဘၭစိၩနီၪလီၫႉ အဝ့ၫယီၩ ဘဲၫ အၥၭဆုးလီၩ့အၥိၭ အ့ၪမွဲကကဲၪထၪ့ဘၪ ၦလီၩ့ၥုၪ့ဆၧလဂၩစွါဘဲၫ အဆၧမၩနီၪ ကအဲၪဝ့ၫအၪနဲၪ့အယီၩ ကခိးဂဲးခိးဘၭဝ့ၫ အၪနဲၪ့အယီၩဂီၩ့ ကလ့ၩထၪ့လ့ၩထီၫအၪနဲၪ့အယီၩနီၪလီၫႉ ပမၩဆၧမၩ ဎွ့ၩပမူၩဒၩထီၩ့လၫ့ထၪ့ဘၭစိၩလီၫနီၪ လၧပဂးဆၧလ့ၩ ထၪ့လ့ၩထီၫ မွဲအီၪလန့ဘၪနီၪလီၫႉ

လခဲၫ့ကမံၩ့နီၪမွဲလၧမိဖါလဖၪနီၪ ထိးဆၧၫ့ထၬဖိၪလဖၪ ကိဆၧၫ့ထီအကၠီၩ့ ဖိၪလဖၪယီၩ ၥၭလိၭဖၭဒဲ ၥၭလၧအကျ့ၭ စၨၭလအီၪဘၪနီၪလီၫႉ ဖိၪလဖၪယီၩအဆၧဖံၭဆၧမၩလအီၪဘၪနးမံၩ့လါနၫ့ ထံၭလၫ့ဒုၭအၪ့ထၬဝ့ၫလၧဂံၪ့ဖၧၩ့ ဂ့ၩဂ့ၩဘၪဘၪ အကၠီၩ့ ဖိၪလဖၪယီၩ ပနၫ့ဆါဒၪပၧၩ မိခိးဂဲးခိးဘၭနးမံၩ့လၧၩ့အ့ၬႉ ဆၧနီၪအကၠီၩ့ ပၥၭဘၪ့အၪဒၪဆၧနီၪ မွဲလ့ၩထၪ့လ့ၩထီၫ လန့ ဘၪနီၪလီၫႉ ဘဲၫပကလ့ၩထၪ့လ့ၩထီၫအဂးနီၪ ပကဘၪကျ့ၭစၨၭဒၪပၧၩဂီၩ့ မိဖါလဖၪနီၪဆ့ မွဲကဘၪၥိၫ့ထၪ့ဖိၪဒံၪၥံၪလၧ ဖၧၩ့ၥၭ အကၠီၪ့အဖျီၩ့ အတီၩအဘၪဖၧၩ့ကလိၪဝ့ၫတၡါဆ့နီၪလီၫႉ

နးအဲၪဖီၫဘွၩ