(ၥၭဘၪ့ဒဲ တခ့ၭဖဝၭ)

ဆၧလၧၥၭဘၪ့နီၪ မွဲထိးၥီၪ့လိၪပၥၭန့ဘူၫန့ယီၫအထီနီၪလီၫႉ အ့ၪမွဲပၥီၪ့လိၪဖ့ၪနဲၪလၧဖၧၩ့ၥၭအဂ့ၩကကဲၩ့ခီၫဆ့ အဝ့ၫ ၥံၪမွဲကလီၩ့မၩဖိၬဝ့ၫဒၪအခံၫ့နီၪလီၫႉၥၭဘၪ့အထီအ့ၪမွဲပအီၪအၪ့လၧတခ့ၭဖဝၭအဂ့ၩဖၧၩ့မၬ ပကဲၪထၪ့ၥၭၡါကကၠၪ မွဲပကဘၪထိး ယူၭယၪ့ပၭကၩပၥၭနီၪလီၫႉ

တခ့ၭဖဝၭလဂ့ၩဘၪအကၠီၩ့ ကဲၪထၪ့ၥၭၡါမၬ အ့ၪမွဲပကၥီၪ့လိၪနဲၪထဲၩ့ တခ့ၭဖဝၭအဂ့ၩအဂဲးနီၪ မွဲကန့လၧၩ့အ့ၬႉ ဘဲၫတခ့ၭ ဖဝၭကဂ့ၩအဂးနီၪ စၭထၪ့လၧၥၭဘၪ့အထီ မွဲပကဘၪၥီၪ့ၥၫ့ထၬနီၪလီၫႉ

ဆၧလၧၥၭဘၪ့ကမံၩ့နီၪ ထီလၧယၫအဂး မွဲဆၧဆူၪလၩ့အဂ့ၩအဘၪထုၬလဖၪနီၪလီၫႉ လါနၫ့ကနံၩယီၩ ပခးပယၩ့ဖၧၩ့ယီၩ ၥၭဘၪ့လဖၪအထီလၧယၫနီၪ ဘၪထိးဘိၭခါအၥၭနီၪလီၫႉ ၦအဘိၭခါၥၭဘၪ့ဖိၪၥံၪအယိၬနီၪ မွဲၦၥၭၡါလၧတခ့ၭဖဝၭလဂ့ၩဘၪ လဖၪနီၪလီၫႉ ၦၥၭၡါလဖၪယီၩ မွဲအတခ့ၭဖဝၭအဂ့ၩ လအီၪဘၪအကၠီၩ့ လီၩ့ဘိၭခါၥၭဘၪ့ဖိၪၥံၪအယိၬ လၧရၧးရၧးစၧးစၧး အၧၩ့အၧၩ့ ၥၫ့ၥၫ့အဖၧၩ့နီၪလီၫႉ

တခ့ၭဖဝၭအဂ့ၩလအီၪဘၪ ၥၭၡါအအၧၩ့အၥၫ့လဖၪနီၪ လီၩ့ဘိၭခါထၬၥၭဘၪ့ဖိၪလၧ အတခ့ၭဖဝၭအီၪ ဂ့ၩဂ့ၩဘွၩဘွၩ လဖၪအယိၬနီၪ ကြၨၭလကဲၪထၪ့ဘၪနးဆံၭနီၪလီၫႉ တခ့ၭဖဝၭဂ့ၩဝ့ၫဒၪၥၭဘၪ့လဖၪယီၩ အလူဒိၪဎွ့ၩဒိၪအီၪအၪနဲၪ့ ၦၥၭၡါလအိၭ ထိၭဘၪဆၧလဖၪ အၪမၬနီၪလီၫႉ ဆၧနီၪအကၠီၩ့ ဘဲၫပထံၪခးယီၩ ကလ့ၩထၪ့လ့ၩထီၫလၧယၫအဂး လိၪဘၪၥၭဘၪ့လၧ အတခ့ၭ ဖဝၭဂ့ၩဝ့ၫဒၪလဖၪအၪမၬနီၪလီၫႉ

မုဆၫကနံၩယီၩ တခၩပကဘၪဒၪဆၧၫ့ယၫလၧ ဆၧအၪ့ထၩနးမံၩ့ ဆၧမၩနၧၩ့မၩစၪနးမံၩ့ အကၧၩ့ဒိၪထုၬ ပၥၭဘၪ့လဖၪ မွဲပကဘၪကျ့ၭစၨၭအီၪမၧၫ့ပၥၭလၧ တခ့ၭဖဝၭအဂ့ၩကကဲၩ့ခီၫနီၪလီၫႉ အ့ၪပတခ့ၭဖဝၭဂ့ၩနီၪ မွဲပကန့ထဲၩ့ဘၪ ဆၧအဂ့ၩအဘွၩ လဖၪနီၪလီၫႉ လဖ့ၪလၫ့ဘၪၥၭဘၪ့ၥံၪအလး ထံၪခးကခးနီၪ မွဲလ့ၩထၪ့လ့ၩထီၫ လန့ဘၪနးဆိၭနီၪလီၫႉ ပထံၪခးယီၩ ဘဲၩ့ကဖီၩ့ ဖျ့ၭထၪ့လၧရၬမ့ၪဖၧၩ့ယီၩအဂး ပၥၭဘၪ့ဖိၪၥံၪကိၭဂၩ လၧပမၩန့ဝ့ၫအလးလဖၪနီၪ  မွဲပကကျ့ၭစၨၭထၪ့ကၠၭဒဲ ပကအၪ့ကံၩ့ဘၩဆိၪ ဖၪလၧယွၩအီၪ ကိၭနံၩဂၫဂီၩလါဆံၭႉ