ၥၭဘၪ့ဒဲထီလၧယၫ

ၥၭဘၪ့ဒဲထီလၧယၫ

ၥၭဘၪ့လဖၪနီၪ မွဲၦလၧကဘၪဆုးထဲၩ့လ့ၩခိၪလ့ၩနါထဲၩ့ ထီလၧယၫဆၧဖံၭဆၧမၩလဖၪအကၠီၩ့ ၥၭဘၪ့ဖိၪ ကိၭဂၩဒ့ၭအထီလၧယၫနီၪ မွဲအရ့ၩဒိၪဝ့ၫဒၪအၪမၬနီၪလီၫႉ

ၥၭဘၪ့ကဂၩဘၪကဂၩ အဆၧၥၭဆုးလီၩ့ အဆၧရွံထၪ့လဖၪနီၪ ဆၧဘၪထွ့ၪအီၪလၧ ထံၪခးအဆၧလ့ၩထၪ့ လ့ၩထီၫ ထံၪခးအဆၧလၩ့ဆ့ၭလၩ့ယွၩ ဒဲ ထံၪခးအဆၧလၩ့ၡၪ့လၩ့ယၬ ဆၧကဲၪဒိၪကဲၪမုလဖၪနီၪလီၫႉ အရ့ၩဒိၪဝ့ၫ ဒၪဘဲၫယီၩၥိၭၥၭဘၪ့လဖၪယီၩ ဘဲၫၥိၭရွံထၪ့ဆၧကဘၪလၧဖၧၩ့ၥၭအတီၩအဂးနီၪ ဆၧဘၪထွ့ၪအီၪလၧ ထံၪခးအဆၧ ကိၪ့ဘၪကိၪ့ၥ့ၪအဖၫ့ခိၪအၪမၬနီၪလီၫႉ

ပမၩဒိၪထၪ့ထီၫထၪ့ ထံၪခးဆၧကိၪ့ဘၪကိၪ့ၥ့ၪကန့အဂးနီၪ ဆၧဘၪထွ့ၪအီၪလၧ ထံၪခးခီၫ့ၡၩအဂဲးလဖၪႇ ဆၧဆီၪ့ဆၧချဲၫ့ဒဲ ထံၪခးဖၧၩ့အထၧးအလၧးလဖၪအၪမၬလီၫႉ ထံၪခးခီၫ့ၡၩ ဆၧဆီၪ့ဆၧချဲၫ့ဒဲ ထံၪဂဲးခးဂဲးအ့ၪမွဲ ဆၧမုၬဆၧၡူၪအီၪမၬ လၧဆၧၥုၪ့ခိၥၭဝီၩဖီၩ့ဖီၩ့အဖၧၩ့ ပမၩဒိၪထၪ့ထီၫထၪ့ ဆၧကိၪ့ဘၪကိၪ့ၥ့ၪအနိၪ့ယီၩကန့နီၪလီၫႉ

လါနၫ့မုဆၫကနံၩယီၩ ၦအအီၪလၧခးပယၩ့ဖၧၩ့ ၥၭဘၪ့ဖိၪလဖၪ အထီလၧယၫနီၪ မွဲအီၪခလဲၪႉ ၥၭဘၪ့ လဖၪအထီလၧယၫနီၪ ဘၪဒၪဆၧၫ့ယၫလၧဆၧအၪ့ထၩဖၭဒိၪအကၠီၩ့ လၩ့ၥၭအုၭဝ့ၫဒၪနၭမၬနီၪလီၫႉ ၥၭဘၪ့လဖၪအ ထီလၧယၫနီၪ လၧခးပယၩ့ဖၧၩ့ ပကဘၪလ့ၩလီၩ့ဎွါထဲၩ့အလးခလဲၪႉ