အ့ၪမွဲနမိလ့ၩထၪ့လ့ၩထီၫနီၪ ဂၪ့အံၪဂၪ့ဆီးလၧ ဆၧပွံၭဆၧထၩ့ယၥၭနီၪလဂ့ၩ

(ဆၧပွံၭဆၧထၩ့ယၥၭထဲနီၪ) ၂ အ့ၪမွဲပကဂၪ့အံၪဂၪ့ဆီး ဘဲၫနီၪအၥိၭ ခိၬမၬခိၬမၬစွါဘဲၫ ဒံၩ့ပကဘၪ လၩ့ပွံၭလၩ့ထၩ့ ဒံၭနီၪလီၫႉ ဘၪန့လဲၪ ဆၧပွံၭဆၧထၩ့ပၥၭကကၠၪ ပကဂၪ့အံၪကကၠၪစွါဘဲၫ ဆၧအယီၩနီၪကဲၪထၪ့ မီၪ့ဎီၩ့ ပထိးဆၧၫ့ပဆၧပွံၭ ဆၧထၩ့လဖၪအၥိၭနီၪလီၫႉ

ဘဲၫနီၪအၥိၭ အ့ၪမွဲပကဂၪ့အံၪ ယထီးအီၪအ့ၬ ခိၬမၬခိၬမၬစွါဘဲၫ ပထီးကအီၪအ့ၬ အၡါမၬနီၪလီၫႉ အ့ၪမွဲ ပကဂၪ့ အံၪ ယအီၪမုၬအ့ၬ စွါဘဲၫ မွဲပကအီၪမုၬအ့ၬတၡါလီၫႉ အ့ၪမွဲ ပကဂၪ့အံၪ ဘၪထွ့ၪလၧ ဆၧအဲၪဆၧကွံၩနီၪ ယဆၧဘိၪ့ဂ့ၩအ့ၬ ဘနီၪစွါဘဲၫ မွဲပကဒၪဆၧၫ့ယၫဘၪလၧ ၦလဂ့ၩဘၪလဖၪနီၪလီၫႉ ဘဲၫ ပလီၩအၥိၭ ဘၪကဲၪထၪ့ဝ့ၫနီၪ ဘၪန့လဲၪစွါဘဲၫ ကယဲဆၧဂဲၫကဲၪထၪ့လၧ ပအီၪလဖၪနီၪ လၧပၥၭဖၧၩ့ ပခိၪနုၬဖၧၩ့ မွဲပထိးဆၧၫ့ထၬ ဂ့ၩဘၪစဲၪ့အကၠီၩ့နီၪလီၫႉ

ၦၡၩကိၭဂၩဒ့ၭနီၪ ဆၧပွံၭဆၧထၩ့အၥၭၥ့ၪကိၭဂၩနီၪလီၫႉ ကနၩ့နၩ့နီၪအနးခီၫ့မိၡါဆၧပွံၭဆၧထၩ့ၥၭႇ ကနၩ့နၩ့နီၪ အၥၭ ဆၧပွံၭဆၧထၩ့ၥၭ ကအီၪနီၪလီၫႉ အရ့ၩဒိၪဝ့ၫကမံၩ့နီၪ ထီးကမွဲဆၧပွံၭဆၧထၩ့နးမံၩ့ ထိးဆၧၫ့ထၬယံၭယံၭလဂ့ၩႉ ၦလၧအကျ့ၭ စၨၭကလ့ၩထၪ့လ့ၩထီၫအဂးလဖၪနီၪ တွၭလၧၩ့ ဆၧပွံၭဆၧထၩ့လၧၩ့အ့ၬႉ လါနၫ့ဎိၭထံၪဎိၭဒီၪလၩ့ အဆၧပွံၭဆၧထၪ့လဖၪ ၥ့ၪဝ့ၫ ဒၪ ဂ့ၩဘၪစဲၪ့အကၠီၩ့နီၪလီၫႉ အ့ၪလမွဲဘၪဘဲၫနီၪစွါဘဲၫ အဝ့ၫၥံၪအဆၧဆီၪ့ဆၧချဲၫ့ဘၪထံၭၥ့ၪဝ့ၫဒၪအကၠီၩ့နီၪလီၫႉ

ပနးခီၫ့မိၡါယီၩ အ့ၪမွဲစံၭပၧၩ ကြၨၭနအီၪပွံၭဘၪယူၭ စွါဘဲၫ အီၪပွံၭဝံၭအလၧၫ့အဎွ့ၩလါဆံၭႉ အ့ၪမွဲဆၧပွံၭဆၧထၩ့ ပၥၭနီၪ အီၪပွံၭႉ အ့ၪမွဲပအီၪပွံၭဘျဲၩဘိၭ ပကမၩထဲၩ့ဆၧမၩႉ အီၪပွံၭခီၫမၩခီၫ အီၪပွံၭခီၫ မၩခီၫ ပကဘၪမၩဝ့ၫဒၪ ဘဲၫနီၪအၥိၭ နီၪလီၫႉ အနီၪမၬပဆၧဆီၪ့ဆၧချဲၫ့ဆ့ မွဲလဘၪထံၭလၧၩ့ဘၪနီၪလီၫႉ ဆၧပွံၭဆၧထၩ့ပၥၭနီၪ ပအီၪပွံၭအ့ၬဂီၩ့ အီၪဒၪမွဲ ပကဂၪ့ အံၪဂၪ့ဆီးလီၫစွါဘဲၫ ဆၧအယီၩပဂးဆၧအဂ့ၩမွဲကအီၪထၪ့နးမံၩ့အ့ၬနီၪ ပကဘၪနၪၥ့ၪထၬနီၪလီၫႉ ဆၧနီၪအကၠီၩ့ ဆၧပွံၭဆၧ ထၩ့ပၥၭအဂဲး ဂၪ့အံၪဂၪ့ဆီးဘၪလဂ့ၩအဂးနီၪ ယမိဖ့ၪဘၪနၥံၪ ဆၧထုၪ့ၥုၪ့ထုၪ့ၥၭနီၪလီၫႉ

နးအဲၪဖီၫဘွၩ