အ့ၪပမိမၩထၪ့ခီၫ့ၡၩကမံၩ့မံၩ့စွါဘဲၫ လိၪဝ့ၫဒၪအကၧၩ့ဒိၪထုၬလဖၪနီၪ မနီၪလဲၪ?

မုဆၫကနံၩယီၩ ပကဒၪဘၪၥၭဘၪ့ဖိၪခီၫ့ၡၩဆါလဖၪအၪအၪနီၪလီၫႉ အဝ့ၫၥံၪယီၩ လၧအၥၭဆံၭဆံၭအဖၧၩ့ ဘၪလ့ၩထၪ့လ့ၩထီၫဎွ့ၩနီၪလ့ၬနီၪ ဘၪမနီၪလဲၪႉ

အဝ့ၫၥံၪယီၩ အ့ၪမွဲကမိမၩထၪ့ ခီၫ့ၡၩကမံၩ့မံၩ့ယူၭစွါဘဲၫ ဒၪၦၡၩမၩအကၠီၩ့ လီၩ့မၩဖိၬၦၡၩအခဲၫ့ လမွဲဘၪတၭ မွဲလၧ ၦၡၩၥံၪလိၪမနီၪလဲၪ အဝ့ၫၥံၪယီၩ ကမိဖ့ၪလၫ့အ့ၪၦၡၩမနီၪလဲၪႉ အဝ့ၫၥံၪကမိမၩထၪ့ဆၧမၩအယီၩနီၪ ဘၪနီၪ လဲၪအဂဲး အဝ့ၫၥံၪအအီၪ ဆၧထံၪဆၧဆၭအီၪဝ့ၫဒၪကိၭမံၩ့အကၠီၩ့ အဝ့ၫၥံၪယီၩမိမၩဝ့ၫဒၪခီၫ့ၡၩကမံၩ့နီၪ မၩထၪ့ဝ့ၫ ဒၪလီၫႉ ဆၧနီၪအကၠီၩ့ အဝ့ၫၥံၪယီၩ စၭထၪ့မၩဝ့ၫဒၪဒဲ ကျ့ၭစၨၭထၪ့ဝ့ၫၡီၫၡီးအခၫအဝ့ၫၥံၪအခီၫ့ၡၩနီၪ လထဲၩ့လၩ့ဘၧၩ့ ဘၪဂီၩ့ ဆုးထဲၩ့လ့ၩထၪ့လ့ၩထီၫနီၪလီၫႉ ဆၧနီၪအကၠီၩ့ အ့ၪမွဲပကမိမၩထၪ့ခီၫ့ၡၩ ဆၧမၩကမံၩ့မံၩ့စွါဘဲၫ ပကဘၪ အၪ့ဎၬအဆိၪထုၬနီၪ ဆၧအယီၩမွဲၦၡၩၥံၪအဂး လိၪဧၪ လလိၪဧၪ အ့ၪမွဲၦၡၩၥံၪအဂး လိၪဝ့ၫဒၪတၡါနီၪဘိၭ စၭထၪ့မၩမၪဆံၭႉ လါနၫ့ နၧၩဒၪနၧၩဆ့ မွဲနကဘၪၥ့ၪယၫလၩ့နၥၭ နဘၪမၩထၪ့ခီၫ့ၡၩယီၩနီၪ ဘၪန့လဲၪအဂဲးနီၪလီၫႉ လၧခီၫ့ၡၩလးဝၩ့ဖၧၩ့ အ့ၪမွဲနမိလီၩ့ဎွါထီးနီၪ နကန့ဘၪထီး အ့ၪမွဲနကမိန့ဘၪ ဆၧမၩနၧၩ့ခၪ့ဖျီၫ့နီၪ နကန့ဘၪအဂဲး ခီၫ့ၡၩဆါကနၩ့နၩ့လီၩယံၩယါဝ့ၫနီၪ ပထီးနဲၪ့ထၬဘၪနီၪလီၫႉ အကၧၩ့ဒိၪထုၬနီၪ  လၧပဆၧဖံၭဆၧမၩအဖၧၩ့ မွဲပက ဘၪထံၭလၩ့ထဲး ဆၧတီၩဆၧလီၩ့ဒံၭနီၪလီၫႉ ပကမၩထၪ့ခီၫ့ၡၩအဂး လၧခဲၫ့အရ့ၩဒိၪလိၪဝ့ၫဒၪဆၧကမံၩ့နီၪဘိၭ မွဲလၧ ကျိၪစ့ၩနီၪလီၫႉ အီၪစၭထၪ့လၧဆံၭခိၬဖိၪဂီၩ့ ထဲၩ့ကျ့ၭစၨၭထၪ့ ထၧၩ့ကဲၪထၪ့ဆၧဖၭဒိၪလါဆံၭႉ