အီၪက့ၪဒိၪနၥံၪအမိအဖါနီၪလါဆံၭ

ဘဲၫပမိပဖါအီၪဒံၭအထီယီၩ အီၪက့ၪဒိၪအဝ့ၫၥံၪဂီၩ့ ဖ့ၪလၫ့ဘၪအဝ့ၫၥံၪအခံၫ့နီၪလါဆံၭႉ ပမိပဖါလဖၪ ယိလါန့ ထဲၩ့ဝ့ၫလၧပအီၪနီၪ အီၪဒၪပကဖ့ၪလၫ့အ့ၪအဝ့ၫၥံၪပအခံၫ့လဖၪဂီၩ့ ပကချဲၩ့ဂၧၩ့အဝ့ၫၥံၪနီၪလီၫႉ

ၦၡၩလၧအမံၩ့ဎိၩၥၪဖျီၪကနၩ့နၩ့နီၪ လၧအဝ့ၫၥံၪအမိအဖါအီၪဒံၭအခၫအိၩ လီၩ့မုၬလီၩ့လၩလၧအထံၩအၥိၭ ၥိၩ့ၥံၪမၧၩ့ ပၠိၭဂီၩ့မၧၩ့လၧၩ့မၧၩ့ၥၧၫ့ဂီၩ့ ဖ့ၪလၫ့အမိအဖါအခံၫ့ချူၭအ့ၬႉ ယိထဲၩ့ခွါထဲၩ့အမိအဖါချုၭအ့ၬႉ လၧခဲၫ့အဝ့ၫၥံၪယီၩ န့ထၪ့ထဲၩ့ဆၧနီၪ့ ယါဂီၩ့ အီၪဂ့ၩအီၪဘွၩလၩ့ထဲၩ့အၥၭ ကျ့ၭစၨၭထၪ့ထဲၩ့အဆၧအီၪမၧၫ့ ကလ့ၩထၪ့လ့ၩထီၫကကၠၪဒီၭတၭ ဖ့ၪလၫ့အမိအဖါၥံၪအခံၫ့ န့အ့ၬႉ အမိအဖါၥံၪနီၪ ၥံၫဒၪခွံၬအဝ့ၫၥံၪကကၠၪမၬ မီၪ့ဘၪထဲၩ့မိဖါ မိဒၪထဲၩ့မိဖါ မိအီၪထဲၩ့လၧမိဖါအဂူၪလၬ မိချဲၩ့ဒုၪ့ထဲၩ့မိဖါ  ဒၪထၪ့ထဲၩ့မိဖါအဆၧအဲၪဆၧကွံၩနီၪလီၫႉ လါနၫ့ အခံၫ့လဖၪနီၪ ဖျီးခွံၬယူၭအကၠီၩ့ အဝ့ၫၥံၪယီၩန့ထဲၩ့ဘၪဆၧနးမံၩ့လၧၩ့အ့ၬႉ

အဝ့ၫၥံၪယီၩန့ထးဒၪ မွဲဆၧနီၪ့ယါအဎိၩအဒိၪကမံၩ့ဎးနီၪလီၫႉ ပဆၧမုၬဆၧလၩလၧပၥိၩ့ၥံၪမၧၩ့ပၠိၭ ပအီၩဂၬထံၫဂၬနီၫ့ လဖၪဒဲ ပဆၧကဲၪဒိၪကဲၪမုလဖၪယီၩ ပကဘၪအၪ့လဲၩလၧ ပဂံၪ့ဒီၪ့ဖိၪၥံၪ ပမိပဖါၥံၪနီၪ မကြၨၭမၬဧၪႉ ဆၧနီၪအကၠီၩ့ နၥံၪယီၩ အ့ၪမွဲနၥံၪအမိအဖါအီၪဒံၭစွါဘဲၫ ဖ့ၪနဲၪထၪ့ဘၪနၥံၪအဆၧအဲၪလၧမိဖါအဖၫ့ခိၪနီၪလါဆံၭႉ ဆၧကဲၪဒိၪကဲၪမု ဆၧမံၩ့ဎိၩၥၪဖျီၪ လဖၪနီၪ အရ့ၩဒိၪဝ့ၫဒၪလါနၫ့ ဆၧအရ့ၩဒိၪထုၬနီၪ အီၪဝ့ၫကမံၩ့ဒံၭနီၪလီၫႉ အနီၪနီၪ မွဲလၧပမိပဖါဒဲ ပဂံၪ့ဒီၪ့ဖိၪၥံၪနီၪလီၫႉ ဆၧနီၪအကၠီၩ့ အီၪက့ၪဒိၪအဝ့ၫၥံၪဒဲ ကျ့ၭစၨၭဖ့ၪလၫ့အဝ့ၫၥံၪအခံၫ့လဖၪလါဆံၭႉ