အီၪက့ၪထၬဒၪ ၥၭနၧၩ့ထၧၫ့ခလူၬ

ယၧၩယီၩ ယဆၧဘိၪ့ဂ့ၩထဲနးဆံၭဖိၪအ့ၬ အ့ၪပကစီၪလၩ့ပၥၭဘဲၫနီၪစွါဘဲၫ အနီၪစီၪထၬမၬ နဆၧဘိၪ့ဂ့ၩ အ့ၬယူၭလီၫႉ ယၧၩယီၩမွဲကကဲၪၥ့ၪအ့ၬပစီၪလၩ့ပၥၭဘဲၫနီၪစွါဘဲၫ ၦၡၩအနီၪ ကဲၪထၪ့န့လၧၩ့နးဆိၬလၧၩ့အ့ၬႉ ကမၩယိ ဝ့ၫအဂးအၥၭမွဲအီၪအ့ၬနီၪ ကဲၪထၪ့ကန့လၧၩ့ဧၪႉ ယၧၩယီၩကကဲၪၥ့ၪဒံၭဘ့ၩ ပစီၪလၩ့ပၥၭဘဲၫနီၪစွါဘဲၫ အၡၩထုၬ ကဘျၩ့နီၪၦၡၩအနီၪကကျ့ၭစၨၭထၪ့ယိဝ့ၫဒံၭလီၫႉ ဆၧနီၪအကၠီၩ့အဝ့ၫယီၩ ကကဲၪထၪ့ၥ့ၪဒံၭလီၫႉ ယၧၩယီၩယကဲၪ ထၪ့ဒံၭအ့ၬခီၫဘ့ၩစွါဘဲၫ ၦၡၩအနီၪ ကကျ့ၭစၨၭထၪ့ယိဝ့ၫ နံၫဘျၩ့ ၃ဘျၩ့နီၪလီၫႉ အနီၪစွါဘဲၫကကဲၪထၪ့အဂး လၩ့ဘူၭအၪမၬယူၭလီၫႉ ယၧၩယီၩယကဘၪကဲၪထၪ့တၡါလ့ၬ အ့ၪပအီၪက့ၪထၬပၥၭဘဲၫနီၪစွါဘဲၫ ၦၡၩအနီၪကဲၪဘိၩ ကကဲၪလီၫႉ အဝ့ၫယီၩနီၪ ကကျ့ၭစၨၭထၪ့ဝ့ၫကဘျၩ့ဂီၩ့ကဘျၩ့ ထၧၩ့အဝ့ၫကဲၪထၪ့ကကၠၪနီၪလီၫႉ အဝ့ၫအီၪနီၪ ၥၭနၧၩ့ထၧၫ့အီၪနီၪလီၫႉ အ့ၪမွဲပမိကဲၪထၪ့ကဲၪထီၫနီၪ ပကဘၪအီၪက့ၪထၬ ၥၭနၧၩ့ထၧၫ့နီၪလီၫႉ

ပလၩ့ထံၩဖါကိၭဘျၩ့ဒ့ၭနီၪအ့ၪမွဲပကၥၭမဲၪဆၧစွါဘဲၫ ဖိၪၥၪလဖၪနီၪ မွဲဂၬဖၭကၥ့ၪလၧၩ့နးဂၩလၧၩ့အ့ၬႉ အ့ၪမွဲ ပၥုၪ့ပၥၭလၩ့ဆ့ၭလၩ့ယွၩအခၫ လၧယဆံၭဆံၭဒံၭအထီအိၩ ယလၩ့ထံၩဖါယံၩယါခိၭမၬခိၭမၬ လါနၫ့ယဂဲထုၪ့ လၫ့ထဲၩ့အကၠီၩ့ ယဂၬဖၭၥ့ၪထၪ့လီၫနဲၪ အၪ့ဎၬထဲၩ့ဘဲၫနီၪဂီၩ့ အၪ့န့ထၪ့ထဲၩ့နဂဲးလါဆံၭႉ

နမၩခီၫဆၧနးမံၩ့အ့ၬ နဆၧၫ့နၩ့အီၪပျီၩပျီၩဂီၩ့ အီၪက့ၪထၬဆၧယိလါလဂ့ၩႉ မွဲဆၧကကဲၪထၪ့နးမံၩ့အ့ၬႉ အ့ၪမွဲပကမိမၩဆၧမၩပၥၭအီၪနီၪ ဆၧမၩအီၪဝ့ၫအၪမၬလီၫႉ အ့ၪမွဲဆၧမၩလအီၪဒံၭဘၪနီၪဘိၭ ဖီလံၬႉ ပဖီလံၬနီၪပဆၧ ၥၭမၧၫ့အဂးမွဲန့ခိးန့တၩအၪမၬနီၪလီၫႉ ပဂးအခွးအယၬလအီၪဒံၭဘၪအခံၫ့နီၪ ပလိၪဝ့ၫဒၪဆၧကိၪ့ၥ့ၪကိၪ့ဘၪ ဆၧၥ့ၪဆၧဘၪလဖၪနီၪ မွဲပကဘၪမၩလၧၫ့ဎွ့ၩထၪ့ထၬနီၪလီၫႉ အ့ၪမွဲပကအီၪက့ၪတဲၩဝဲၩ့ဆိၫထၬပၥၭဘဲၫနီၪစွါဘဲၫ အခွးအယၬဂဲၫထီၩ့ဝ့ၫကထံၪဎး မွဲပမၩန့အခွးအယၬနီၪကန့အထံၪဎးနီၪလီၫႉ