အီၪက့ၪထၬဆၧၥၭခ့ၬလၧၦဂူၫဂၩအဖၫ့ခိၪလဂ့ၩ

လၧကကၠၪအိၩ ကဲၪဒိၪကဲၪမုဝ့ၫဒၪ ၦမနံၬထၪ့မျါခွါၡါအီၪဝ့ၫဒၪကဂၩနီၪလီၫႉ ၦလၧကမိမၩအၪ့ဖံၭအၪ့လၧမနံၬထၪ့မျါ ဆၧမၩလဖၪနီၪဂဲၫၥီၪ့လိၪအၥၭဆၧၥ့ၪယၫနၪၥ့ၪလၧအဝ့ၫအီၪ အီၪဝ့ၫဒၪအၪမၬနီၪလီၫႉ ၦအၪဒၪဆၧနီၪ ဂဲၫထိးၥီၪ့လိၪအၥၭထၪ့ ဘၭ၂နံၪ့ဂီၩ့ ထဲၩ့မၩအၪ့ဖံၭအၪ့ဆၧမံၭဆၧမၩလဖၪနီၪလီၫႉ လါနၫ့လၩ့ဆၫ့ဒၪဆၧ ၦနံၫဂၩနီၪ လထဲၩ့ဒံၭဘၪဒဲ ဆုးထဲၩ့မၩလိၪဆၧမၩ လိၪလၧဖူၫခွါၡါနီၪအအီၪ ဖိၭဘိၭဆံၫနံၪ့နီၪလီၫႉ ထၪ့ဘၭဆံၫနံၪ့အခၫအဝ့ၫၥံၪအၥိၭနံၫဂၩယီၩ ထဲၩ့ထဲၩ့လၧအထံၪအခးဂီၩ့ထဲၩ့ မၩထၪ့ခီၫ့ၡၩနီၪလီၫႉ

အဝ့ၫၥံၪအၥိၭနံၫဂၩယီၩ ထဲၩ့မၩဆၧမၩထၪ့ဘၭ၅နံၪ့အခၫ လ့ၩထဲၩ့လၧအဆရၫအီၪဒဲ လ့ၩကလိၭလၫ့ထဲၩ့အဆရၫ လၧလၬဆီၪ့လဖၪနီၪလီၫႉ အဝ့ၫၥံၪယီၩလ့ၩကၠၭလၧ ပလဲၪ့ၥိၪယလဲၪ့ၥိၪဒဲ လၬဆီၪ့လဖၪနီၪလီၫႉ အဝ့ၫၥံၪလ့ၩထီၩ့လၧနီၪအခၫ အၥိၭနံၫဂၩနီၪ ဒၪဆုးဆ့ၭလိၬၥၭနီၪလီၫႉ အခၫနီၪ အဲၪချံၫ့အလဲၪ့ၥိၪဒဲအလၬဆီၪ့ၥံၪလဖၪနီၪ ဂ့ၩန့အၪန့ထံၫမၧၫ့အလဲၪ့ၥိၪဒံၭ အဂဲး ထံၫမၧၫ့ယီၩထုၪ့အၥၭနီၪလီၫႉ အဲၪချံၫ့နီၪ ဒၪထဲၩ့ဘၪအၥိၭထံၫမၧၫ့အကၠီၩ့ အၥၭဎွံၪဝ့ၫဒၪဒဲချဲၩ့ဒုၪ့စိၩထံၫမၧၫ့လီၫ ထံၫမၧၫ့ဆ့ ချဲၩ့ဆၧၫ့ထဲၩ့အဲၪချံၫ့ဆ့လါနၫ့ အၥၭဖၧၩ့နီၪ စီၪဘၪမၪအဆရၫ ဆရၫအိၩ ပၥိၭနံၫဂၩလီၫမၬၥီၪ့အ့ၪပၧၩဆၧၥ့ၪဆၧဘၪမီၪ့ဎီၩ့အ့ၬ ၥီၪ့အ့ၪအဲၪချံၫ့အဆၧၥ့ၪဆၧဘၪလဖၪအၪန့ယၧၩ ဆၧနီၪအကၠီၩ့အဲၪချံၫ့ယီၩ ကဲၪဒိၪကဲၪမုနၭန့ယၧၩ ဆီၪ့မီၫ့ဝ့ၫဘဲၫနီၪလီၫႉ

အဝ့ၫၥံၪယီၩလ့ၩထီၩ့လၧအဆရၫအီၪအခၫ ထံၫမၧၫ့ယီၩစံၭအဆရၫ ဆရၫနၧၩဝ့ၫ နၥီၪ့အ့ၪအဲၪချံၫ့ နဆၧၥ့ၪဆၧဘၪ လဖၪ အၪနဲၪ့ယၧၩဒံၭဘိၭ အဲၪချံၫ့ယီၩ လ့ၩထၪ့လ့ၩထီၫအၪန့ယၧၩဒံၭႉ လါနၫ့အဆရၫနီၪလစံၭဆၧၫ့ထဲၩ့ဘၪအဝ့ၫနးမံၩ့ဒဲ လ့ၩကိၭန့အဝ့ၫၥံၪလၧ ခိၭထံၭကထံၭအဖၫ့လၬဂီၩ့ အၪ့မၧၫ့အဝ့ၫၥံၪလ့ၩအၪ့မၩခိၭၥၪကဂၩကဖျိၪ့နီၪလီၫႉ ဂီၩ့နီၪအၪ့မၧၫ့ဝ့ၫထဲၩ့ၥုၪ့ လၩ့ကၠၭ လၧပဂံၪ့ယဂံၪ့နီၪလီၫႉ အဝ့ၫၥံၪအၥိၭနံၫဂၩနီၪဆ့ ထဲၩ့ၥုၪ့လၩ့ထၬဝ့ၫနီၪလီၫႉ အီၪထၪ့ဘၭ၅နံၪ့ကကၠၪ ဆရၫနီၪ အဆိၪထုၬလ့ၩဂၭကွ့ၭစိၩလၧ ထံၫမၧၫ့အဂံၪ့ဂီၩ့ ဒၪဘၪခိၭထံၭနီၪမွဲအၥၪလအီၪဘၪနးဖျိၫ့တၭ အၪ့စၪ့ဝ့ၫ နခိၭထံၭယီၩ ၥၪနးကၠၪ ဒံၭအ့ၬဧၪ ဘဲၫနီၪအခၫ ထံၫမၧၫ့စံၭဆၧၫ့ထဲၩ့ မွဲဆရၫဧ့ ယခိၭထံၭယီၩအီၪ၅နံၪ့ယူၭလါနၫ့ၥၪန့နးကၠၪဒံၭအ့ၬ ဘၪန့လဲၪ ပၥ့ၪယၪ အ့ၬႉ

ကဲ အ့ၪမွဲဘဲၫနီၪ ဂဲၫပကလ့ၩထဲၩ့လၧ အဲၪချံၫ့အဂံၪ့ဂီၩ့ ပကလ့ၩယိထၪ့အဝ့ၫအခိၭထံၭနီၪနးထံၪ မွဲၥၪယူၭဧၪၥ့ၪ ယၫအ့ၬႉ အဝ့ၫၥံၪလ့ၩထီၩ့အခၫ အဲၪချံၫ့နီၪအၪ့ဂၬထိးဆၧၫ့အဝ့ၫၥံၪ ဆၫအၪ့ဆၫအီၩအအွံၪအဆၧၫ့လဖၪနီၪလီၫႉ ဂီၩ့အဝ့ၫၥံၪလ့ၩ ယိထၪ့ခိၭထံၭနီၪအခၫ ဒၪဘၪဝ့ၫလၧ ခိၭၥၪလဖၪၥၪထၪ့အၪမၬနီၪလီၫႉ အနီၪအခၫ ဆရၫနီၪအၪ့စၪ့အဲၪချံၫ့ နခိၭထံၭယီၩ အၥၪမဂ့ၩမၬလဲၪ နမၩအ့ၪပန့လဲၪၥံၪလဲၪအခၫ အဲၪချံၫ့ယီၩစံၭဆၧၫ့ထဲၩ့ ခီၫလၧယဂဲၫထဲၩ့န့ခိၭၥၪကဖျိၫ့ဂီၩ့နီၪ ယလီၩ့ယိလၧ အလးဂ့ၩအလးဘၪဂီၩ့ ယၥၪ့လၩ့ထၬခိၭထံၭယီၩ ဂီၩ့နီၪယထံၭလၩ့အ့ၪအဝ့ၫအဆၫ ယၡီၫ့အ့ၪထံၫကိၭနံၩဘိၭ အၥၪဆ့ဂဲၫၥၪ ထၪ့အၪအၪဒ့ၭလီၫဆရၫဧ့ႉ

အနီၪအခၫဆရၫယီၩ စံၭဘၪထံၫမၧၫ့ ထံၫမၧၫ့ဧ့ လၧအဖီၩ့ခွံၬယဲနံၪ့ဒၪအိၩ နစံၭယၧၩ ယၥီၪ့အ့ၪအဲၪချံၫ့ဆၧကိၪ့ၥ့ၪကိၪ့ ဘၪအၪနဲၪ့နၧၩနဲၪႉ အယီၩယိနးထံၪ နၧၩလၧအဝ့ၫ နၥံၪမၩဆၧဖံၭဆၧမၩနီၪ မွဲလမီၪ့ဎီၩ့ဘၪလီၫႉ နၧၩဝ့ၫ နခိၭထံၭနီၪ နၥုၪ့လၩ့ထၬ မၩဘဲၫနီၪလီၫ ဖံၭဂ့ၩလဂ့ၩနယိအ့ၬ ဆၧခိဘၪလဘၪနယိအ့ၬ နဘူၩရူၫဘူၩဆူၫအဝ့ၫနးမံၩ့အ့ၬဘိၭ နခိၭထံၭနီၪ ၥၪထၪ့န့နးကၠၪ ဒံၭအ့ၬႉ မွဲယၥီၪ့အ့ၪနၥံၪဆၧကိၪ့ဘၪကိၪ့ၥ့ၪအအၪအၡၩအီၪအ့ၬႉ လါနၫ့ဘၪထွ့ၫဒၪလၧနၥံၪလီၩ့မၩဖိၬထွ့ၪကၠီၩ့ဖျီၩ့နီၪလီၫႉ

ပယိထၪ့ဆၧအဂဲးယီၩဂီၩ့ ပန့ဘၪဆၧမၩလိၪနီၪ ဆၧဖံၭဆၧမၩကမံၩ့နီၪ ပမၩၥ့ၪယူၭလါနၫ့ မွဲလလၧၫ့ဎွ့ၩဒံၭဘၪလီၫႉ ပမၩကဘၪၥ့ၪဝ့ၫဒၪဒံၭလၧ ကၠီၩ့ဖျီၩ့ဘၪဘၪအဖၧၩ့ဒံၭနီၪလီၫႉ လကၭဒံၭဘၪ ၦၡၩအ့ၪလ့ၩထၪ့လ့ၩထီၫအၪန့ပၧၩဆ့ ပဘၪၥၭခ့ၬ အဝ့ၫ မွဲဆၧအလးလအီၪဘၪလီၫႉ ပၧၩဒၪပၧၩ ပကလ့ၩထၪ့လ့ၩထီၫအဂး ပကဘၪကျ့ၭစၨၩမၩ ပဆၧဖံၭဆၧမၩလဖၪလၧ ကၠီၪ့ဖျီၩ့အတီၩအလီၩ့ဖၧၩ့အဂဲး ပန့ဘၪဆၧမၩလိၪဘဲၫနီၪအၥိၭနီၪလီၫႉ

Credit>TNN life