လီၩ့ဎွါဆၧအဲၪနီၪလဂ့ၩ

လီၩ့ဎွါဆၧအဲၪလဂ့ၩႉ အ့ၪမွဲပကလီၩ့ဎွါဆၧအဲၪစွါဘဲၫ ဒံၩ့ပကယဲၩ့ထၪ့လၧဆၧအဲၪလီၫႉ  အ့ၪပကကျ့ၭစၨၭ ဘဲၫပကဘၪထိးအဲၪပၥၭအၥိၭနီၪဘိၭ ဆၧအဲၪနီၪကစဲၪ့ထၪ့ခွံၬလၧပအီၪနီၪလီၫႉ

ဆၧအဲၪဆၧကွံၩကမံၩ့ အ့ၪမွဲပၥၭလိဖၭကနၭလၨၪနီၪ ပဘၪထံၭကဆၫဝ့ၫနီၪလီၫႉ ထီးမုကနံၩယီၩ ပအဲၪယံၩ ယါဂီၩ့ယူၭႉ ဆၧအဲၪအဂးပဂီၩ့လၫ့စၪလၫ့ဂီၩ့ယူၭႉ ပၥၭထ့ဖၭမွဲဂီၩ့ယူၭႉ ဆၧနီၪအကၠီၩ့ ဆုးထဲၩ့လီၩ့ဎွါဆၧအဲၪနီၪဒံၭ လဂ့ၩႉ ဆၧအဲၪဆၧကွံၩအဂဲးနီၪ လခဲၫ့မၬလီၩမၬဆံၭႉ ထီးဘဲၫယီၩ ပကဘၪကျ့ၭစၨၭအီၪနီၪ ကျ့ၭစၨၭထၪ့ဒၪလူၬႉ ပကဘၪမၩဆၧအီၪနီၪ မၩထၪ့ဒၪလူၬႉ အကၧၩ့ဒိၪထုၬနီၪ လီၩ့ဎွါထၬကျိၪစ့ၩလၧၫ့လၧၫ့ဎွ့ၩဎွ့ၩလါဆံၭႉ

အ့ၪမွဲပဆၧၥၭမၧၫ့ယီၩ အီၪဘၪနီၪ ဆၧအဲၪနီၪကဂဲၫဆီးဒၪပၧၩလီၫႉ လၧပၥၭဆံၭဒံၭအခံၫ့ယီၩ ပကဘၪ ကျ့ၭစၨၭလီၩ့ဎွါထၬဒၪကျိၪစ့ၩလီၫႉ ပၥၭဆံၭဒံၭအခံၫ့ ပဒၪဘၪဆၧအဲၪကအီၪအၪမၬလီၫႉ လါနၫ့ဆၧအဲၪလဖၪနီၪ အၪဒၪဆၧ လတီၩလီၩ့ဘၪဒဲ မွဲဒၪဆၧအဲၪအဘျၪလဖၪနီၪလီၫႉ ဆၧနီၪအကၠီၩ့ ပၥၭဆံၭဒံၭအထီနီၪ ထီးဖ့ၪဆိၫဂုဘၪ ဆၧအဲၪနီၪလဂ့ၩႉ

နးအဲၪဖီၫဘွၩ