ရွံထၪ့ဘၪ ပမၫပဝၩလၧ ဆၧယီၫယီၫဖၧၩ့လဂ့ၩ

ၥၭဘၪ့မုၪမွဲဂ့ၩ ခွၫမွဲဂ့ၩ ပရွံထၪ့ ပမၫပဝၩအခၫ ပရွံထၪ့ဝံၩ့ရွံထၪ့ဝၩ့ယီၫယီၫလန့ဘၪဒဲ ပယိထၪ့ဆၧအဲၪကမံၩ့လီၫဂီၩ့ ပရွံထၪ့မွဲလန့ဘၪနီၪလီၫႉ ပကဘၪဖ့ၪလၫ့အဝ့ၫယီၩ ပဆၧၥၭမၧၫ့ထၧၫ့ဖျိၪ့ယၫအကၠီၩ့ ဘဲၫပဎွ့ၩဆၧပိၭဆၧလၫ့ကမံၩ့အၥိၭ အ့ၪမွဲပလဘၪလၧၩ့ဘၪပၥၭစွါဘဲၫ မွဲပအၪ့လဲၩထဲၩ့လန့ဘၪနီၪလီၫႉ ဆၧနီၪအကၠီၩ့အ့ၪမွဲပရွံထၪ့ ပမၫပဝၩအခၫ ပကဘၪထိၪတွၭ ယိထဲၩ့လၧဆၧအဂဲး၅မံၩ့ယီၩ ကလိၪဝ့ၫဒၪနီၪလီၫႉ ၁ႉ ပယိထၪ့အမ့ၬဎံၫယၪဘွၩလန့ဘၪလီၫႉ ဆၧအနီၪၥံၪနီၪ မွဲဂုးခၧၫ့လဆိၩယၫလန့ဘၪအကၠီၩ့ ပကဘၪယိထၪ့ဒၪ အဝ့ၫယီၩအဲၪပၧၩဎွ့ၩပၥ့ၪလဲၪ လၧပဂးထိးဆၫအၥၭ နၧၩ့ဎွ့ၩပၥ့ၪလဲၪနီၪလီၫႉ 2. ၦလၧပဖံၭထံၩဖံၭၥိၭ ဘဲၫထံၩၥိၭအၥိၭန့ဂီၩ့ မၩနံပၧၩန့ဝ့ၫၦလဖၪနီၪမၬ ရွံထၪ့လါဆံၭႉ ပကဲၪၦၡၩလဖၪယီၩ ဘၪကကၠၪကၠၪ ပၥၭနၪ့ခွံၬ ၦအအီၪလၧပနဲၩ့ထံၭလဖၪနီၪဂီၩ့ ပလီၩ့ဎွါအၪ့န့ထၪ့ၡါ ၦအယဲၩ့ၥ့ၪနီၪလီၫႉ လၧဆၧမၩခွါယိဖၧၩ့ ပအီၪဘဲၫထံၩၥိၭလိၬ န့ဝ့ၫဒၪၦလဖၪနီၪ အဂံၪ့ဒီၪ့ကဂုးခၧၫ့လဆိၩယၫအဂး ဆၧထံၪဆၭအီၪအၪဝ့ၫနီၪလီၫႉ ၃ႉ ပအဲၪလိၬၥၭအကၠီၩ့ ပကဘၪအၪ့န့ထၪ့ၡါလိၬၥၭတၡါဒ့ၭ ဆၧထိၪတွၭနီၪ ထီးအၪ့ဎၬဘၪလဂ့ၩႉ ဘၪန့လဲၪနီၪ ပၥိၭနံၫဂၩယီၩ ဆၧဘၪလၩ့ဎိၭလအီၪဘၪအဂဲး ပၥ့ၪယၫခဲၫခဲး ပကရွံထၪ့အဝ့ၫဒံၭစွါဘဲၫ ဆၧအယီၩ ကြၨၭလကဲၪထၪ့ဘၪ နးဆံၭနီၪလီၫႉ ၄ႉ အဲၪဘိၩယီၩ အၪ့န့ဘိၩယီၩနီၪ ထီးမၩဘၪလဂ့ၩႉ ပအဲၪၥၫ့လိၬၥၭအကၠီၩ့ ကဂၩဒဲကဂၩ မွဲပဒၪထၪ့လိၬၥၭ အဆၧမၪ လန့ဒံၭဘၪလီၫႉ ဆၧနီၪအကၠီၩ့အၡၩထုၬခိၭယိထၬလိၬၥၭ ဖိၭဘိၭ၃နံၪ့ဂီၩ့ အဝ့ၫနီၪအ့ၪမွဲတီၩလီၩ့လၧပဖၫ့ခိၪ ပၧၩဆ့ ပအဲၪဘၪ လိၬၥၭလၧအဝ့ၫနီၪ အ့ၪမွဲအီၪဘၪဆ့မၬ ထၪ့ၡါလၧအဝ့ၫမၬဆံၭႉ ၅ႉ ပကဘၪလီၩ့ဎွါၦလၧအၥုၪ့အၥၭဘၪလၩ့ဎိၭလၧပၧၩနီၪလီၫႉ ပမၩပျၩ့ခွံၬဆၧကၪဆၧဂဲၩအခၫ ကဂၩနီၪ မၩပျၩ့ဝ့ၫၥ့ၪ လၧဆၧၡူၪၡူၪဘၩဘၩအဖၧၩ့ဂီၩ့ လခဲၫ့ကဂၩနီၪအ့ၪမွဲ မၩပျၩ့ဝ့ၫၥ့ၪလၧ ဆၧၥုၪ့ထၪ့ၥၭထၪ့စွါဘဲၫ ပၥိၭနံၫဂၩယီၩ ပကထဲၩ့အီၪ မၧၫ့ဎုၬလဆိၩယၫ မွဲကန့အ့ၬႉ ဆၧနီၪအကၠီၩ့ ၥၭဘၪ့ဖိၪၥံၪဧ့ အ့ၪမွဲနၥံၪကရွံထၪ့ အမၫအဝၩယူၭစွါဘဲၫ ထီးၥၭနၪ့ဘၪဆၧအဂဲး၅ထံၪယီၩလဂ့ၩနဲၪႉ ပဆၧအဲၪတၩ့လၧ ပၧၩယီၩ ဆၧဘၪလၩ့ဎိၭအီၪလအီၪနီၪ ယိထၪ့ဘၪထံၪထံၪဆၭဆၭဂီၩ့ အ့ၪမွဲပၥိၭနံၫဂၩအဆၧဆုးကျိၭယီၩ ဆၧမုၬဆၧၡူၪအီၪမၬ ရွံထၪ့အဝ့ၫနီၪလါဆံၭအဂဲး မုကနံၩယီၩယအဲၪဒိၭရၩလၩ့န့အ့ၪဘၪနၥံၪဆၧအဂဲးယီၩနီၪလီၫႉ