ယွၩလၧအအဲၪကွံၩဆၧကၧၩ့ဖျိၪ့ထၪ့ၥၭလဖျိၪ့ဎးနီၪ ဖ့ၪဒၪဎီၩ့ပၥိၭနံၫဂၩယီၩနီၪလီၫႉ

ပဂံၬဎွံၪလခဲၫ့ကဘီၩ့နီၪ ကဲၪထၪ့ဝ့ၫဒၪလၧနၧၩလီၫႉ ယဆၧၥၭမၧၫ့ဖၧၩ့ ဆၧအဲၪတၩ့ကဂၩလီၫနီၪ လၧၫ့ဎွ့ၩဝ့ၫဒၪဂ့ၩ ဘၪစဲၪယူၭလီၫႉ ယအခံၫ့အၪဒၪဆၧနီၪ ယမိမၩလူၬခွံၬဒၪလၧအဝ့ၫနီၪလီၫႉ အခံၫ့ဘဲၫယီၩဒဲ ထီၩ့လခဲၫ့ထုၬအခံၫ့နီၪ ယမိခၫ့ဂၬ ခွံၬဒၪလၧနၧၩလီၫႉ

ဖီၩ့မၬလၧယဆၧအဲၪတၩ့နီၪ ယဝဲၫ့ဒိၭချိၫ့ထၬၦၡၩအဂူၫဂၩနီၪလီၫႉ စူၪလၧယဖီၪ့ထၬယီၩနီၪ ယမိဖ့ၪလၫ့အ့ၪ ဆၧမုၬဆၧ ၡူၪအၪမၬဒ့ၭနီၪလီၫႉ လၧလံၬဆံၫ့ဎံၪဖၧၩ့ၥီၪ့ၥၫ့ထၬဝ့ၫ ပဆၧၥၭမၧၫ့ထၧၫ့ဖျီၩ့ယၫအဂး ပကဘၪအီၪဒၪလၧ ပမၫပဝၩလဂၩဎး အဂးနီၪလီၫႉ ယဆၧၥၭမၧၫ့အဂး လဂၩဎးဒဲလခဲၫ့ထုၬဆၧအဲၪတၩ့နီၪ မွဲဒၪလၧနၧၩနီၪလီၫႉ ဆၧအလိၪအီၪအၪဝ့ၫဒၪ ဂၪ့ခိၪချိၫ့ဖၧၩ့ လခဲၫ့ဆၧအဲၪအၥၫ့မွဲလလိၪလၧၩ့ဘၪလီၫႉ ပဘၪအီၪန့ၫလဂၩအထီ ထီးလီၩ့ဎွါထၪ့ဘၪ ဆၧမုၬဆၧလၩလဆိလလး အဂးနီၪ လဂ့ၩႉ

လံၬဆံၫ့ဎံၪဖၧၩ့စံၭထၬဝ့ၫ ဆၧအဲၪဆၧကွံၩနီၪ ဆၧအဘျံၭအဘျၪဆၧအဲၪဘိၩ့လအီၪဘၪနီၪလီၫႉ ၦလၧအအဲၪယွၩလ ဂၩနီၪ ဖီၩ့ဖျ့ၭလၧဆၧအဲၪဘိၩ့လဖၪနီၪလီၫႉ နဘၪအဲၪဖ့ၪနဲၪယၧၩဎိၩဎိၩဒိၪဒိၪလိၫအ့ၬ ယယိထၪ့နဆၧဖံၭဆၧမၩလဖၪဂီၩ့ နအဲၪ ယၧၩ နလအဲၪယၧၩနီၪ မွဲယၥ့ၪယၫထၪ့ဂ့ၩဘၪစဲၪနီၪလီၫႉ လၬဆီၪ့လၧအနံၪ့ဎိၩဎိၩဒိၪဒိၪလဖၪနီၪလိၫအ့ၬ လိၪဒၪလၧ နကဘၪ ခိၭနၪယွၩအလူဒဲ ယလူလီၫႉ

ဘဲၫကန့ထၪ့ဘၪဆၧအဲၪဆၧကွံၩတၡါအဂး ၦၡၩအၪ့ကံၩ့ဘၩဆိၪဖၪလီၫႉ ပဖီၪ့ထၬၦၡၩအစူၪယီၩ ကဂၭကွဲၪလၫ့ ဒၪပၧၩနီၪ ပအၪ့ယိၫခဲၫ့ကံၭကၠၭလီၫႉ ၦလအအဲၪဆၧၥ့ၪအၪမၬအအီၪနီၪ ဆၧအဲၪဖိၪလၧအလၩ့အဲၪဝ့ၫဒၪအီၪလဂၩနီၪလီၫႉ အနီၪမွဲဒၪလၧနၧၩနီၪလီၫႉ မွဲလၧၫ့ဎွ့ၩဒၪဝ့ၫလၧ ဆၧအဲၪတၩ့လဂၩ ဆၧအဲၪကမံၩ့လါဆံၭႉ