ဘၪကကၠၪကၠၪ ပအီၪက့ၪထးခွံၬနီၪဆ့ မွဲလၧဆၧအဲၪဆၧကွံၩဆ့လီၫ

            ဘၪကကၠၪကၠၪ ပအဲၪလိၬၥၭအဘိၩ့ဘၭ ပဘၪစဲၪ့ထၪ့ခွံၬလၧအဝ့ၫအနဲၩ့ထံၭ မွဲအီၪၥ့ၪဆ့လီၫႉ ပစဲၪ့ထၪ့ခွံၬနီၪဆ့ မွဲလၧ ပအဲၪအဝ့ၫအကၠီၩ့ဆ့လီၫႉ ပအဲၪအဝ့ၫလါနၫ့ အဝ့ၫနီၪ အ့ၪမွဲလအဲၪလၧၩ့ဘၪပၧၩအခၫ အ့ၪမွဲအလိၪလအီၪလၧၩ့ဘၪပၧၩအခၫ ပအဲၪအဝ့ၫလူၬၥၭလါနၫ့ ပမၩန့နီၪ အီၪဒၪပစဲၪ့ထၪ့ခွံၬလၧအဝ့ၫအဂဲးနဲၩ့ကမံၩ့လီၫအကၠီၩ့လီၫႉ

          လၧပဂးၦလဂၩဂၩအၥၭကဘၪၡၪ့နီၪ ပမိကဲၪအ့ၬႉ ဆၧအၪ့န့အလးနီၪ ပအဲၪဒၪအဝ့ၫလၧ ဆၧဖ့ၪဆၧၫ့လီၫႉ ပလအီၪ ဘၪလါနၫ့ အ့ၪမွဲအဝ့ၫအၥၭမုၬစွါဘဲၫ မွဲပမံၪ့ၥုၪ့မံၪ့ၥၭလီၫႉ အကၧၩ့ဒိၪနီၪမွဲဒၪ ၦလၧပအဲၪဝ့ၫလဂၩ အၥၭကမုၬအဂးလီၫႉ ဆၧလၧဆၧအဲၪကမံၩ့နီၪ ပအဲၪလါနၫ့ အဝ့ၫအ့ၪမွဲအဲၪပၧၩမၬကအဲၪမၬဆံၭမွဲအ့ၬဧၪႉ ဆၧနီၪအကၠီၩ့ ဆၧအဲၪဆၧကွံၩလဖၪ အ့ၪမွဲ လဘၪလၩ့ဎိၭဘၪနီၪ ပဂၬဖၭလၫ့ဒၪ ပဖၧၩ့ၥၭ ယဖၧၩ့ၥၭနီၪ မွဲအဂ့ၩထုၬလီၫႉ ကဎုၬဒၪအဖၧၩ့ ပဒၪဘၪလၧအဝ့ၫနီၪ မွဲပမံၪ့ၥုၪ့ မံၪ့ၥၭယူၭလီၫႉ ဆၧနီၪအကၠီၩ့ ပစဲၪ့ထၪ့လါနၫ့ ဆၧစဲၪ့ထၪ့အယီၩနီၪ မွဲဆၧအဲၪဆၧကွံၩလူၬခွံၬ လမွဲဘၪလီၫႉ ဆၧစဲၪ့ထၪ့ဂၬဎ့ၭခွံၬ လနၩ့နၩ့နီၪ မွဲလၧဆၧအဲၪနီၪလီၫႉ 

နူးနူးအောင်