ပၧၩယီၩ ၦမွဲလၧ ၦအၥၭမဲၪဆၧၥ့ၪ ၦမုၪလဂၩဧၪ?

ပကဲၪၦမုၪကိၭဂ့ၩဒ့ၭနီၪ မွဲပၥၭမဲၪဆၧၥ့ၪဝ့ၫဒၪကိၭဂ့ၩနီၪလီၫႉ ဂီၩ့နီၪ ၦမုၪလဖၪနီၪ ၥၭမဲၪ ဆၧၥ့ၪန့ၦခွၫလဖၪဒံၭနီၪလီၫႉ လါနၫ့ပကဒၪဘၪၦခွၫကနၩ့နၩ့နီၪဘိၭ ၥၭမဲၪဆၧၥ့ၪနၬန့ ၦမုၪလ ဖၪဘဲၫနီၪမွဲအီၪဆ့ႉ           ၦမုၪၥံၪလဖၪဘၪထွ့ၫလၧဆၧၥၭမဲၪဆၧယီၩ ပကဘၪခၫ့ဂၬခွံၬဝ့ၫဒၪပၥ့ၪ လဲၪနီၪ ဖၠိၩဖၠိၩအီၫ့ လီၩထၬဝ့ၫဒၪ အီၪဘဲၫယီၩအၥိၭနီၪ ယမိအၪ့နၩ့လၩ့ထဲၩ့အ့ၪဘၪနၥံၪနီၪလီၫႉ အဝ့ၫယီၩလီၩထၬဝ့ၫ ဆၧ၃မံၩ့နီၪလီၫႉ

ဘဲၫပခၫ့ဂၬခွံၬ ဆၧၥၭမဲၪဆၧကန့အဂးနီၪ အဆိၪထုၬပကဘၪထိးဆၧၫ့ ဆၧယံၩ ယါနီၪလီၫႉ  ဆၧၥၭမဲၪနီၪ မွဲအီၪလၧပၧၩကဂၩအအီၪလီၫ လမွဲဘၪတၭ ၦၡၩကိၭဂၩအအီၪနီၪ ဆၧၥၭမဲၪအီၪဝ့ၫဒၪကိၭဂၩအဂဲး ၦမုၪၥံၪလဖၪကဘၪထိးဆၧၫ့ထၬနီၪလီၫႉ ဂီၩ့နီၪဆၧအယီၩ မွဲလၧဆၧကဲၪထၪ့ယံၩယါကမံၩ့အဂဲးပကဘၪနၪၥ့ၪလီၫႉ ၦခွၫလဖၪဆ့ လၧအဝ့ၫၥံၪအအီၪနီၪ ဆၧၥၭမဲၪအီၪဆ့အဂဲးပကဘၪၥ့ၪယၫထၬလီၫႉ

လခဲၫ့နံၫမံၩ့ကမံၩ့နီၪ ပၥၭမဲၪဒၪလါနၫ့ ပကဘၪဆုးထဲၩ့မၩနီၪလီၫ

အ့ၪမွဲပၥၭမဲၪဆၧအခၫ ပကဲၩ့ဖၭၥၭနံၫမံၩ့နီၪလီၫႉ အဆိၪထုၬကမံၩ့နီၪ ပၥၭမဲၪဆၧအကၠီၩ့ ဆၧဖံၭဆၧမၩအနီၪ ပဆုးထဲၩ့မၩလၧၩ့အ့ၬဂီၩ့ ပအီၪပထုၬခွံၬႉ အနီၪအခၫ ဆၧကဲၪထၪ့နးမံၩ့လၧၩ့ အ့ၬႉ လခဲၫ့ကမံၩ့နီၪဒီၭ ပၥၭမဲၪဆၧလါနၫ့ ဆၧၥၭမဲၪအနီၪ လူၬဘံၭခွံၬ ပမိမၩထၪ့ဆၧ ၥၭနီၪ လန့ ဘၪလီၫႉ အနီၪတၭ ပကဘၪမၩထၪ့ဆၧမၩယီၩအဂးပၥၭမဲၪလါနၫ့ ပဆုးထဲၩ့မၩဒၪဆၧႉ ပမၩ ထၪ့ယိအခၫ ဘဲၫအဂုအိၩ ပစီၪထၬအၥိၭ လလၩ့ၥၭမဲၪဘၪအဂဲး ပဂဲၫၥ့ၪယၫထၪ့လီၫႉ ဆၧနီၪ အကၠီၩ့ ပဆုးထဲၩ့မၩထၪ့ဂီၩ့ လခဲၫ့ထုၬပဆၧထိစိၩနီၪ လၧၫ့ဎွ့ၩထၪ့လီၫႉ ပကဘၪၥ့ၪယၫထၬ ကမံၩ့နီၪ ပၥၭမဲၪဝ့ၫဒၪဆၧအဂဲးလဖၪ ၈၀ယၩဒုၩနီၪ မွဲလကဲၪထၪ့ဘၪနီၪလီၫႉ

လခဲၫ့ထုၬ ၃မံၩ့ကမံၩ့နီၪ ပကဘၪဝံထၪ့ ၅၄၃၂၁ဘဲၫနီၪဂီၩ့ ပကဘၪ ဂဲထုၪ့မၩဆၧမၩ ကထံၪဎးနီၪလီၫႉ ပဝံထၪ့ဆၧဘဲၫနီၪနီၪ မီၪ့ဎီၩ့ပဖ့ၪလၫ့ထၬ ပခိၪနုၬဆၧမၩဂီၩ့ ဆၧၥၭမဲၪဆၧနီၪ မွဲပကၥၭနၪ့ခွံၬလီၫႉ အ့ၪမွဲပကအီၪလၧ ဆၧအၪ့ဎၬဖၧၩ့ယံၭယံၭနီၪ ပကၥၭမဲၪဆၧအၪအၪလီၫႉ ဆၧနီၪအကၠီၩ့ အီၪလၧဆၧအၪ့ဎၬဖၧၩ့နီၪလဂ့ၩဂီၩ့ အၪ့ဎၬထၪ့မၬ ဆၧကဲၪထၪ့န့အဂဲးလဖၪနီၪလီၫႉ ပကကဲၪၥ့ၪဧၪ ဆၧအၪ့ဎၬနီၪ ထီၩ့အၪ့ဎၬဘၪနးဆိၭ နးဆိၭလဂ့ၩႉ လၧနကမိမၩနီၪ ဂဲၫထုၪ့မၩကထံၪဎးဆံၭႉ

ပၧၩယီၩအ့ၪမွဲ ပၥၭမဲၪဆၧၥ့ၪဒိၪဒိၪစွါဘဲၫ မၩယိထၪ့ဆၧအဂဲး ၃မံၩ့ယီၩလါဆံၭႉ အနီၪစွါဘဲၫ ဆၧယံၩယါ ကအီၪထၪ့ၡီၫၡီၫဖိၪဂီၩ့ လၧအဂုအိၩ ပကမၩထၪ့အဂး ပၥၭမဲၪဆၧအကၠီၩ့ ပအီၪပထုၬထၬ ဆၧဖံၭဆၧမၩလဖၪနီၪ ပမၩထၪ့ထဲၩ့မွဲကဘၧၫ့ဒူၩဒူၩနီၪလီၫႉ