ပမဲၪပၥွၫ

ပမဲၪပၥွၫမွဲဆၧလူဒိၪဎွ့ၩဒိၪလၧပဂးနီၪလီၫႉ လၧပမဲၪပၥွၫ အီၪအကၠီၩ့ ပအၪ့ဘၪအီၩဘၪဆၧၥ့ၪဝ့ၫလၧ ပကအီၪမၧၫ့အီၪဂဲၩဘၪအဂးနီၪလီၫႉ ဘဲၫၥိၭပမဲၪပၥွၫ အလၧၩ့လဖၪထီးစူၭဆၫလဂ့ၩအဂး အကၧၩ့ဒိၪဝ့ၫလၧ ပကဘၪယိထဲၩ့ခွါထဲၩ့ဝ့ၫ ဂ့ၩဂ့ၩဘၪဘၪနီၪလီၫႉ

ထီးပအၪ့ဆၧအီၩဆၧကိၭမံၩ့ဒ့ၭအ့ၪဂီၩ့နီၪ ပကဘၪထူၭဆံၫ့ခွံၫပနိၭ ဒဲပမဲၪပၥွၫႇ မိၩဎွ့ၭၡီၩ့ၡိၭပနိၭနီၪလီၫႉ ပကမံၫထီဒဲပနၪ့ထၪ့ထဲၩ့ပၥၭဒၪလ့ၬနီၪ ပကဘၪထူၭဆံၫ့ပမဲၪပၥွၫနီၪလီၫႉ ဆၧအၪ့အဘုၭအဘၩ့အ့ၪအီၪထး ပမဲၪပၥွၫအဆူၭဖၧၩ့တၭကဲၪထၪ့ဆၧစူၭဆၧဆၫလၧပဂးၥ့ၪဝ့ၫလီၫႉ

ပကဘၪဂၭဎ့ၬဆၧအဲၪ့ဆၧအနီၩ့ ဒဲဆၧအၪ့ဆၧအဆၧၫ့အၪနဲၪ့ဆၧကြၨၭအၪ့ဝ့ၫနီၪဆ့လီၫႉ ဆၧလဆံၫ့ဘၪလဖၪ ထီးဒုၭနုၬဘၪလၧပနိၭဖၧၩ့နးမံၩ့လဂ့ၩႉပကဘၪအၪ့ဆၧဖံၭဆၧယၪလၧအဆံၫ့ဝ့ၫႇ ဆၧဒိၭဆၧလၪႇ ဆၧၥူၪဆၧၥၪလၧအဂ့ၩဒဲၥံၪ့ဆ့ၭလဖၪနီၪလီၫႉ

ပအ့ၪလပၭကၩဘၪပမဲၪပၥွံလဖၪတၭႇ ဆၧစူၭဆၧဆၫမိနုၬလၩ့မၩဂၭဂီၩ့ခွံၬဝ့ၫနီၪလီၫႉ ထီးပမဲၪပၥွၫစူၭဆၫနီၪ ပလီၩ့မိခိႇ ပအၪ့ဆၧလန့ဘၪႇ ပဂဲးပဘၭမိလၩ့ၡၩႇ ပၥွၫအလၧၩ့ၥံၪမိစူၭဆၫဒဲ ပကျိၪပစ့ၩ ပဆၧၫ့ပထီမိလူၬ ပျီၩဝ့ၫလီၫႉ ဆၧမၩလိၪဖိၪလၧအန့ဘၪဆၧမၩနၧၩ့လဂၩဒၪလ့ၬ မိစၪခွံၬလၧအဆၧမၩလိၪအဖၧၩ့တၬႇ ၦလၧအၥၭဆုးလီၩ့လၧဆၧလိၬကွ့ၩအဖၧၩ့လဖၪ မိစၪခွံၬလၧအဆၧအၪ့ထၩအဖၧၩ့နီၪလီၫႉ

အထံး- ၦဖျိၩ့ၡိ အလံၬဖီႇ ဆၧမၩလိၪနံၫဆၫ့အဂး

Add new comment

2 + 14 =