ပမိပဖါအီၪဒံၭစွါဘဲၫယိထဲၩ့ခွါထဲၩ့ကၠၭဆံၭ

ပဖါနီၪဒၪဘၪပအီၪဘၪပအၪ့ဘၪဂ့ၩဂ့ၩဘၪဘၪစွါဘဲၫဆၧမုၬအၥၭ မံၫ့ၥၭဝ့ၫအၪမၬလီၫႉ ပမိနီၪအ့ၪဒၪဘၪပအီၪလၧ တၨၭၥံၪစွါဘဲၫအၥၭဎွံၫအၪမၬလီၫႉ လၧပဆံၭဆံၭဒၪအိၩ ပစူၪလထီၩ့စိၩဘၪအလးနီၪ ပမိမိမၩန့အ့ၪပၧၩလီၫႉ မိဖါလဖၪနီၪ ဖိၪမုၪဖိၪခွၫဒဲၩ့အၪမၬလါနၫ့ ဖျါခွံၬအဖိၪအဆၧဒဲၭဘၭန့ဝ့ၫလီၫႉ ပကဲၪဒိၪကဲၪမုလၫ့ကနံၩကိ ၥၭနၪ့ဘၪမိဖါၥံၪ အခိးအတၩဒဲ အဆၧအဲၪလဂ့ၩႉ အ့ၪပဆၧၥၭမၧၫ့လ့ၩထၪ့လ့ၩထီၫဂီၩ့ ပန့ဘၪအလးကစီၪ့စီၪ့ယူၭစွါဘဲၫထီးခွံၬၡိၭထၬဘၪမိဖါလဂ့ၩႉ နဲၩပဂူၫဂၩအဆၧချဲၩ့ဂီၩ့ စီၪဘၪမၪမိဖါၥံၪလဂ့ၩႉ လၧပဆံၭဆံၭဒၪအိၩ ပမၩဘၪဆၧအဂ့ၩမွဲဂ့ၩ ဆၧအအၧၩ့မွဲဂ့ၩ နၪၥ့ၪအ့ၪပၧၩကိၭမံၩ့ဂီၩ့ လၧပဖၫ့ခိၪ အၪ့ဎၬအ့ၪပၧၩအဂ့ၩကိၭမံၩ့နီၪ မွဲဒၪမိဖါနီၪအဂဲး အီၪနၪ့ထၪ့ထဲၩ့လါဆံၭႉ မွဲဆၧနီၪအကၠီၩ့ စီၪဘၪမၪမိဖါၥံၪလဂ့ၩႉ

လၧနဂးမိဖါလဖၪနီၪမွဲဝ့ၫဒၪ မူၭခိၪဒဲ လၩစွါဘဲၫ ႉ အ့ၪအဝ့ၫၥံၪ အၥၭၡါလၫ့ ဒိၭနဲၩ့အၥၭၦၡၩလအီၪလၧၩ့ဘၪအခၫ လၧဖိၪလဖၪအဖၫ့ခိၪကအီၪက့ၪထၬအဆၧယိလါ ဘဲၫလၩကဖျိၪ့အၥိၭလီၫႉ ပဆံၭဆံၭဒၪအိၩလၧဆူၬပၪအဖၫ့ခိၪပမိမိထိၪဝၭပၧၩဂီၩ့ ပအီၪလၧပမိမိကၠၧၫ့ကၠၧၫ့လီၫႉ ဘဲၫယီၩပဎိၩထၪ့ကကၠၪ ပဘၪအီၪလၧပမိကၠၧၫ့ကၠၧၫ့နီၪပၥၭလူၬယူၭဧၪႉ လၧပဆံၭဆံၭဒၪအိၩ ပဂဲၫထဲၩ့အီၩထၬ ပမိအနူထံၫနီၪ ပၥၭနၪ့ပၥၭယူၭဧၪႉ ပဖါနီၪ ပဂးမွဲၦဒူၩဖိၪလီၫႉ ပဆံၭဆံၭဒၪအိၩ ပကဆိၫ့ကၩပျီၩအဂး ပကအၪ့အီၩအဂး ပဖါလီၩ့ဎွၬထီး အထီ ဂၪ့အံၪဂၪ့အူၭလၧ ဆၧပွံၭဆၧထၩ့အၥၭအဂဲး ပနါဂၧၫ့ယူၩယါဧၪႉ ပလီၩ့ဎွါ ထီးန့ကကၠၪ ပဘၪၥိၫ့အ့ၪမိဖါနီၪ ပၥၭၡၪ့ယူၭဧၪႉ ပဖါနီၪဖိၪဒံၪလဖၪ စၪခွံၬအခံၫ့ ဖါၥံၪယီၩ လစံၭဘၪဝ့ၫ ဖိၪဒံၪၥံၪအဆၧမၪတၭ ဆူနဲၩဝ့ၫလၧဖိၪၥံၪလဖၪကန့ထဲၩ့ဘၪဆၧအနၧၩ့့ဒံၭအဂဲးလီၫႉ

အ့ၪပလ့ၩထၪ့လ့ၩထီၫယူၭကကၠၪ ၥၭထၪ့ထီၫဘၪလဂ့ၩႉ ပကဲၪဒိၪကဲၪမုလါနၫ့ ထီးၥၭနၪ့ခွံၬပဆၧအီၪမၧၫ့လဂ့ၩႉ ဆၧမၩနၧၩ့ခၫဖျီၫ့ဒဲ ဆၧမုၬဆၧလၩယီၩ အီၪထၪ့လၧပအီၪနီၪ မွဲဝ့ၫဒၪ မိဖါအခိးအတၩအကၠီၩ့လီၫႉ ပလအီၪလၧၩ့ဘၪကၠၧၫ့ကၠၧၫ့လၧမိဖါကကၠၪစွါဘဲၫပကနၪ့ထၪ့ထဲၩ့ဘၪမိဖါအခိးအတၩလီၫႉ ပထီၩ့လၧမိဖါအလးကကၠၪစွါဘဲၫပကၥ့ၪယၪထဲၩ့ဘၪဖါအခိၥွ့ၫဒဲ မိအနူထံၫအခိးအတၩဎိၩဒိၪဝ့ၫဒၪဘဲၫၥ့ၪအဂဲးနီၪလီၫႉ ပမိပဖါအီၪဘၪအၪ့ဘၪဂ့ၩဂ့ၩဧၪနီၪ ခ့ၬယိထဲၩလါဆံၭႉ ပမိပဖါ အၪ့ဘၪအီၩဘၪလလၧၫ့လဎွ့ၩဘၪနီၪ အ့ၪပလမိဒၪဘၪစွါဘဲၫပမိပဖါအီၪဒံၭအထီယီၩ ပကဘၪလီၩ့ဎွါမၩဘုၪလၩ့လီၫႉ ပမိပဖါအၪ့အီၩနၧၩ့အထီ ပကဘၪဖ့ၪအၪ့ဖ့ၪအီၩလီၫႉ မိဖါအၪ့အီၪလန့လၧၩ့ဘၪမၬန့ထဲၩ့ဆၧနီၫ့ယါလဂ့ၩႉ ပမိပဖါအီၪအထီ ပအီၪလၧအနဲၩဖၭဂီၩ့ ပကဘၪယိထဲၩ့ခွါထဲၩ့လီၫႉ ပအီၪဘၪလၧပမိပဖါကၠၧၫ့ကၠၧၫ့နီၪ မွဲဆၧလူဒိၪဎွ့ၩဒိၪအီၪအၪန့ ပအီၪဘၪအၪ့ဘၪလၧၫ့လၧၫ့ဎွ့ၩဎွ့ၩဒံၭနီၪလီၫႉ