ပဘၪထိးအဲၪဘိၩ့ပၥၭအခၫ

ထၧၫ့ဖုဝဲထံၩၥိၭထီးလူၬၥံၪဧ့ မုဆၫကနံၩယီၩနီၪ ပကဒၪဘၪထၧၫ့မၫဝၩၥံၪအကျၩ အ့ၪလမွဲဘၪဘိၭ လၧဆၧအဲၪတၩ့ဖိၪၥံၪအကျၩ ဆၧအဲၪဘိၩ့လိၬၥၭဘဲၫနီၪ အၪအၪဒ့ၭနီၪလီၫႉ ကနၩ့နၩ့ဂဲၫထဲၩ့ အဲၪထၬလိၬၥၭအီၪလၧအနံၪ့၁၀ဘျဲၪဂီၩ့မၬ မွဲလၧဆၧအဲၪဘိၩ့လိၬၥၭအကၠီၩ့ လၧခဲၫ့ထုၬ ဘၪလၩ့ ဖၭခွံၬလိၬၥၭနီၪလီၫႉ  ပဘၪဒၪဆၧအဂဲးလဖၪယီၩနီၪ ပၥၭဘၪအုၭ ဒိၪဒိၪဒ့ၭ နီၪလီၫႉ  ၦၡၩကနၩ့နၩ့ဒီၭ ၦၡၩအဆၧအဲၪတၩ့နီၪမၬ ကမိအဲၪဝ့ၫ ၦၡၩအမၫအဝၩနီၪမၬ ကမိမၩဝ့ၫ ၦၡၩဘဲၫယီၩၥိၭလဖၪနီၪနးဆ့ကၪနၬလ့ၬႉ ပကယိထဲၩ့ကကဲၩ့ခီၫဒီၭ ပဆၧအဲၪတၩ့အီၪခဲခဲ ပမၫ ပဝၩအီၪအခဲခဲ ပမိလီၩအဲၪထဲၩ့ၦဂူၫဂၩ ပမိလီၩအၪ့န့ထဲၩ့ၦဂူၫဂၩ လၧပဆၧအဲၪတၩ့အဖၫ့ခိၪ လၧပမၫပဝၩအဖၫ့ခိၪ ပအီၪက့ၪထၬဆၧတီၩဆၧလီၩ့န့လၧၩ့အ့ၬ ၦဘဲၫနီၪလဖၪဆ့ ဂဲၫအၪထၪ့ဝ့ၫ အၪမၬနီၪလီၫႉ ဆၧအယီၩဆ့ဆၧဘၪထွ့ၫအီၪလၧ ဆၧၫ့ထီအလ့ၩထၪ့လ့ၩထီၫဆ့ဘီၪနဲၪႉ အ့ၪမွဲ ပစူၪလီၩ့ ခွ့ၩဒီၪနါအီၪနးဖျိၪ့စွါဘဲၫ တခၩပကမိမၩဆၧနးမံၩ့ ပမၩန့ထီးလူၬယူၭနဲၪႉ

ဆၧနီၪအကၠီၩ့ မုကနံၩယီၩယအဲၪဒိၭရၩလၩ့စိၩအ့ၪဘၪနၥံၪ အ့ၪမွဲပဘၪထိးအဲၪဘိၩ့ပၥၭ ယူၭစွါဘဲၫ ပကြၨၭမၩဝ့ၫဘဲၫၥ့ၪလဲၪအဂဲးနီၪလီၫႉ

ပဘၪထိးအဲၪဘိၩ့ပၥၭအခၫ ဘၪမၩယၧၩဘယီၩထၪ့နီၪ ဘၪန့လဲၪႉ မယဘၪမၪမန့လဲၪႉ ဆၧအဂဲးဘဲၫယီၭၥိၭလဖၪနီၪ ပဘၪအၪ့ဎၬထၪ့ ခိၪမၬခိၪမၬလလိၫဘၪလီၫႉ အဝ့ၫနီၪ အဲၪဒၪ ယၧၩဒံၭ ကမွဲဒၪအၥၭစဲၪ့ဝံၩ့စဲၪ့ဝၩ့ဒၪကဆိကလးလီၫဘ့ၩႉ ပကဲၪၦၡၩကမံၩ့နီၪ ကကၠၪကဆါနီၪ ပဘၪမၪယံၩယါဘ့ၩႉ လီၩ့အၪ့ဎၬဘဲၫနီၪဂီၩ့ နကဖျါခွံၬအဂးဆ့ စီၪဘၪလဂ့ၩႉ

နကဘၪမၩဝ့ၫဒၪ ကမံၩ့ဎးနီၪ အီၪဒၪနကဘၪဖျါလၩ့ခွံၬလီၩ့နီၪလီၫႉ ပအဲၪအဝ့ၫနီၪ အၪမၬလါနၫ့ ပဆၧဆူနဲၩၥံၪအ့ၪမွဲဂၭဂီၩ့ဆိၫ့ခွံၬကကၠၪ ဘဲၫအခီၩ့အိၩဆၧအဲၪ ဆၧကွံၩလၧၫ့ဎွ့ၩဝ့ၫ ဒၪဆၧဆုးကျိၭနီၪ မွဲကန့ထဲၩ့လၧၩ့အ့ၬနီၪ နဲၩလါဆံၭႉ အဎဲၩ့လၫ့အီၪထၬဝဲၩခွၭ ဖျုၩအထ့ၬလၧ ပဘၪဆုးထၬထဲၩ့နီၪ ဆၧဎံၪဆၧလၩမအီၪန့ဧၪႉ လၧဆၧဆၧနဲၩလအီၪလၧၩ့ဘၪအဖၧၩ့ ၦၡၩနံၫဂၩ ယီၩ ကဆုးကျိၭထဲၩ့လိၬၥၭကန့ဂ့ၩဂ့ၩဘၪဘၪနီၪ နစီၪၩဧၪႉ ပၥၭအီၪၡုၪၡုၪဘၩဘၩလန့ဘၪ အလးနီၪ နမိအီၪမၩလဲၪႉ ခိအဂဲးအ့ၪမွဲပၥ့ၪယၫနီၪ ဖျါလၩ့ခွံၬဂီၩ့ ဘၪထံၭဘၪနဲၪ့ၥ့ၪအဂဲး အ့ၪပ နၪၥ့ၪနီၪ ကြၨၭပဆုးလ့ၩဘွၫထၪ့လၧအမ့ၬယၫလၧၩ့အ့ၬ မွဲအ့ၬဧၪႉ ဘဲၫဆၧချဲၩ့အိၩအၥိၭ ဂၪ့ခိၪချိၫ့ ဖၧၩ့ ၦလၧလအဲၪဘိၩ့ဘၪဆၧအီၪဒၪလါနၫ့ ၦလၧအဲၪဘိၩ့ယံၩယါဆၧကကၠၪလီၫ ဘဲၫနီၪ အီၪအ့ၬ စွါဘဲၫ မိလီၩဝ့ၫနီၪ ၦၡၩကဂၩနီၪအဲၪဘိၩ့ဆၧၥ့ၪကကၠၪယူၭစွါဘဲၫ လၧခဲၫ့နီၪမွဲကဆုးထဲၩ့အဲၪဘိၩ့ ဆၧဒံၭနီၪလီၫႉ

ၥၭဘၪ့မုၪခွၫကိၭဂ့ၩဒ့ၭ ၦလၧအထၪ့ၡါထၬဂီၩ့ဝ့ၫဒၪကိၭဂၭဒ့ၭ ဖီၩ့ဖျ့ၭဒၪဝ့ၫလၧ ဆၧအဲၪအဘျၪဒဲ ဆၧအဲၪဘိၩ့လိၬၥၭလဖၪနီၪလါဆံၭႉ