ပကဘၪအီၪ န့ၫလဂၩအဂး ဆၧဒူၩဆၧယၪ့အီၪဒၪဝ့ၫဆံၭႉ

ဆၧလၧပဘၪအီၪန့ၫလဂၩနီၪ ပဘၪအီၪပၧၩကဂၩလီၫအခံၫ့လမွဲဘၪတၭ ပအီၪပၥိၭနံၫဂၩလါနၫ့ ကဂၩဒဲကဂၩ အ့ၪမွဲ ပၥၭယဲၩ့ထၪ့လိၬၥၭစွါဘဲၫ အနီၪမွဲ မီၪ့ဎီၩ့ပဘၪအီၪန့ၫလဂၩဆ့နီၪလီၫႉ ပဂံၪ့ဒီၪ့ဖိၪၥံၪလအီၪဘၪအကၠီၩ့ ပဘၪအီၪန့ၫလဂၩ လမွဲဘၪတၭ ပဂံၪ့ဒီၪ့ဖိၪၥံၪအီၪဒၪလါနၫ့ ကဂၩဒဲကဂၩအ့ၪမွဲ အီၪလၧဆၧမ့ၬလဲၩ့ၥၭဂဲၫ့လဖၪ အ့ၪမွဲပၥၭလဘၪဎိၭလၩ့ဘၪ လိၬၥၭအခၫ အ့ၪမွဲပအဲၪလၩ့ကၠၭဒၪန့ၫပၥၭလီၫအခၫ မွဲပဘၪအီၪန့ၫလဂၩဆ့နီၪလီၫႉ

ပထံၩၥိၭလအီၪဘၪနီၪ မွဲပကိၭဝၫ့ ပဘၪအီၪန့ၫလဂၩအ့ၬႉ ပထံၩၥိၭၥံၪအီၪအၪဝ့ၫဒၪလါနၫ့ ကဂၩဒဲကဂၩ ဘၪပြၧၩ့လိၬ ၥၭႇ ဆၧဖံၭထံၩဖံၭၥိၭအဘျၪလဖၪအကျၩ ပဘၪအီၪအၪ့ကၪကၪဂဲၩဂဲၩနီၪဆ့ မွဲပကိၭဝ့ၫလၧ ဘၪအီၪန့ၫလဂၩနီၪလီၫႉ ပအီၪဘၪ လၧၦၡၩအၪမၬအကျၩလါနၫ့ အ့ၪမွဲၦၡၩလထံၭလၩ့ဘၪပၧၩစရၫ့ဖၧၩ့ႇ ပဆၧဖံၭဆၧမၩလဖၪႇ ပဆၧကိၪ့ဘၪကိၪ့ၥ့ၪလဖၪနီၪ အ့ၪမွဲ ၦၡၩလထိးဆၧၫ့ဘၪအခၫ မွဲပဘၪအီၪန့ၫလဂၩနီၪလီၫႉ

ဆၧနီၪအကၠီၩ့ ထီးစီၪလၩ့ဘၪပၥၭလၧ ပဘၪအီၪန့ၫလဂၩနးဆိၭလဂ့ၩႉ ခီၫခီၫ ပကဘၪအီၪလၧ ပနဲၩလန့ဘၪၦၡၩ လဖၪအကျၩႇ ခီၫခီၫ ပကဘၪအီၪလၧ ၦၡၩလဒၪထၪ့ဘၪ ပဆၧအဲၪအလူအဎွ့ၩလဖၪအကျၩႇ ခီၫခီၫ ပကဘၪအီၪလၧ ၦအလီၩ့ပြၧၩ့ဆၧလၧပၧၩလဖၪအကျၩႇ ခီၫခီၫ ပကဘၪအီၪလၧ ၦအလိၫအီၪမၬၥ့ၪယၫပၧၩဂီၩ့ အ့ၪမွဲလလိၫလၧၩ့ဘၪပၧၩအခၫ ခွံၬ ၡိၬထၬပၧၩလဖၪအကျၩႇ ခီၫခီၫ ပကဘၪအီၪလၧ အ့ၪမွဲပကဲၪဒိၪကဲၪမုအခၫ ဂဲၫမၩထံၩမၩၥိၭပၧၩဂီၩ့ အ့ၪမွဲပလၩ့ၡၪ့လၩ့ယၬအခၫ လၥ့ၪယၫလၧၩ့ဘၪပၧၩလဖၪအကျၩနီၪ ပကအီၪဒၪပၧၩဂီၩ့ ပကအီၪလၧန့ၫလဂၩအဖၧၩ့ လၧဆၧဒူၩဒူၩအဖၧၩ့နီၪလါဆံၭႉ ဆၧၥၭ မၧၫ့လမီၪ့ဎီၩ့ဘၪနီၪ မွဲပၥံၫမၬအ့ၬႉ ပၥၭမၧၫ့ဂီၩ့ အ့ၪမွဲကဂၩဒဲကဂၩ ပၥၭလမီၪ့ဎီၩ့ဘၪႇ ပတခ့ၭဖဝၭလမီၪ့ဎီၩ့ဘၪႇ ပဆၧထိၪတွၭ အၪ့ဎၬ လမီၪ့ဎီၩ့ဘၪအခၫဆ့ ကဂၩဒဲကဂၩနီၪ မွဲပဆၧၥၭမၧၫ့လမီၪ့ဎီၩ့လၧၩ့ဘၪဒဲ ဆၧၥၭမၧၫ့ယဲၩ့ထၪ့ဝ့ၫနီၪလီၫႉ

ဆၧနီၪအကၠီၩ့ အီၪဒၪန့ၫလဂၩဒူၩဒူၩလါဆံၭႉ

Credit