နံၪ့ထၪ့ၥၫ့ မုနံၩမုၬမုၬ

ကကၠၪအိၩတၭ ဝံးကဝံးနီၪ လၧမၫဆမံၭဖၧၩ့ ၦလၧအဘၪဒၪခီၩ့ဆၧၫ့ယၫဆၧၡၪ့ဆၧနၭၥံၪအဂး ဎိၭဒီၪထၪ့ထၬဝ့ၫ ဆၧထိးထဲၩ့တၩ့ထဲၩ့ခရၧၫ့နီၪလီၫ မွဲဝ့ၫခရၧၫ့နီၪ ၦလၧအၥုၪ့ဆီၪ့ၥၭဆီၪ့ ၦလၧအၥုၪ့ဒူၩၥၭဒူၩ ၦလၧအဝါချံၫန့ဂ့ၩဂ့ၩ ဒဲၦလၧအမိမၩဆၧၩ့ဆၧအၥၭအီၪမၬ ရွံထၪ့ဝ့ၫနီၪလီၫ ကနံၩနီၪတၭ မွဲခရၧၫ့နီၪဆၧပရၧၫ့န့ဝ့ၫဒၪလမံၩ့နီၪလီၫ လၧအဝ့ၫၥံၪ အီၪအလး ဝံးဒဲလယဲၩ့နၭဘၪမၫဆမံၭဖၧၩ့နီၪ ကဘၩ့ယါကဖျိၪ့ ဂၭဂီၩ့ဝ့ၫဒၪလီၫ ဆၧနီၪအကၠီၩ့ မွဲဝ့ၫခရၧၪ့နီၪဆၧပရၧၫ့န့ဝ့ၫဒၪလထံၪဎး ကလ့ၩထိးထဲၩ့တၩ့ထဲၩ့ အဝ့ၫၥံၪနီၪအကၠီၩ့ စၭထၪ့စဲၪ့ထၪ့လ့ၩဝ့ၫဒၪနီၪလီၫ အဲၪကွံၩဘၪထၧၫ့ဖုဝဲၥၭဘၪ့ဖိၪၥံၪဧ့ ချံၫလ့ၩစဲၪ့ထၪ့ဝ့ၫအၪအၪလ့ၬလါနၫ့ လဖုၬလကၠၭလၩ့ဝ့ၫ လပီၩဎိၩဝ့ၫ အနၬထုၬနီၪတၭ ချံၫအၪဖးိၪ့နီၪ ဆုးလ့ၩလဘၧၫ့လၧၩ့ဘၪလီၫ လါနၫ့ မွဲဒၪၥၭဘၪ့ဖိၪအချံၫလဖျိၪ့နီၪ ဆုးလ့ၩဝ့ၫဒၪထၧၩ့အထီၩ့နီၪလီၫ မွဲၥၭဘၪ့ဖိၪချံၫလဖျိၪ့နီၪ ဘၪလ့ၩကိၭဝ့ၫ ၦလၧအလၩ့အုၭလၩ့ယွၩၥံၪနီၪ ၡၪ့ၡၪ့ယါယါတၭ အစူၪၡၫခၪ့ၡၫထၪ့ဒဲ ဆၧပွံၭဆၧထၧၩ့ၥၭ နၭထၪ့ဝ့ၫအၪအၪလ့ၬအကၠီၩ့ လခဲၫ့ထုၬနီၪ ချံၫဆါ ၥၭဘၪ့ဖိၪၥံၪထီးလူၬ အဂဲးအဘၭလူၬဒဲဂၭစဲၪ့ဂၭဖၭ လန့လၧၩ့ဘၪအကၠီၩ့ မံၫလၩ့ချုၭဝ့ၫဒၪလၧၡၬနိၭဖဲၩ့ နီၪလီၫ

အီၪလဆိ ချံၫဆါခိၪနါၥၭဘၪ့ဖိၪလဂၩနီၪ လၧၥၭလမုၬဘၪအဖၧၩ့စံၭထၪ့ဘၪဝ့ၫ ၦဝ့ၫၥံၪယီၩ ပမၩန့ဂ့ၩထုၬမၬဧၪ ပကျ့ၭစၨၭ လူၬၥုၪ့လူၬၥၭန့ဂ့ၩဂ့ၩဘၪဘၪဧၪ အဝ့ၫနီၪ မ့ၬလၩ့ဖ့ၬဂီၩ့အၪ့စၪ့ထၪ့ဝ့ၫလၧဆၧၥုၪ့ဘၪထံၭ ၥၭဘၪထံၭ ၥၭဘၪထံၭအဖၧၩ့ နီၪလီၫ ဆၧဘဲၫနီၪၥိၭအကၬီၩ့ တဝၫ့ခိၪနါလဖၪၥံၪဆ့ စံၭဆၧၫ့ ထဲၩ့ဘၪဝ့ၫ အိၩ နၥံၪမၩဝ့ၫန့ အဂ့ၩထုၬလီၫ နၥံၪခိးဂဲးခိးဘၭန့ ထီးအလူၬလီၫ နၥံၪအချံၫနီၪ ထိးထဲၩ့တၩ့ထဲၩ့ဝ့ၫန့ ၦခမျၧးအၥၭ (၂၇)  ဂၩနီၪလီၫ

အဲၪကွံၩဘၪထၧၫ့ဖုဝဲမုၪခွၫထံၩၥိၭၥံၪထီးအလူၬဧ့ ဆၧအဂဲးယီၩ လလၩ့ဆၫ့ဘၪလါနၫ့ အ့ၪပဆီၫ့မီၪ့ထၪ့ထဲၩ့ ထံၫထံၫဆၭဆၭကကၬၪ လၧပဖၫ့ခိၪ အစၩ့ထံၫအီၪဝ့ၫ အၪအၪလ့ၬလီၫ ဘ  ဲၫၥိၭၥၭဘၪ့ဖိၪ အၪ့စၪ့ဆၧအၥိၭ ပကြၨၭအၪ့စၪ့ထဲၩ့ဒၪပၥၭလၧအဖီၩ့ခွံၬဎရံၬနံၪ့ (၂၀၂၀)  နံၪ့အလံၩအိၩ ပမၩဝ့ၫန့ အဂ့ၩထုၬဧၪ အခွးအတၩန့ဝ့ၫ ဘဲၫၥ့ၪလဲၪ အ့ၪပမၩန့ နးမံၩ့အ့ၬ စွါဘိၩ အထီဘဲၫယီၩ ဎရံၬနံၪ့ထၪ့ၥၫ့ နံၪ့ (၂၀၂၁)  ယီၩ ပကဘၪကျ့ၭစၨၭမၩထၪ့ဝ့ၫ အဂ့ၩထုၬလီၫ လၧကထီၩ့ဝ့ၫနံၪ့အၥၫ့ယီၩ အ့ၪပကျ့ၭစၨၭအဂ့ၩထုၬမၬနံၪ့အၥၫ့ယီၩ ကလၩ့ဂၬဘဲၫနံၪ့အၥၫ့ ဒဲလကၭဘၪ ဆၧမုၬဆၧလၩ ကအီၪဝ့ၫနံၪ့အၥၫ့နီၪလီၫ

ယမိမၩဆၧလၧ ယဂဲးဆီၪ့ဘၭဆီၪ့ လၧယွၩအဖၧၩ့လီၫ အဂဲးဘဲၫယီၩ ယဝ့ၫဒၪနီၪ မိယဲးထဲးလၩ့ ပဒုၪပဒၩလီၫ (အၪ့အူၭ ၆၀း၁၂)

အထီဘဲၫယီၩ အဲၪဒိၭဆုးလီၩဖ့ၪနဲၪအ့ၪဘၪဝ့ၫၡါလယွ့နီၪလီၫ ကကၠၪအိၩတၭ လၧနံၪ့ထၪ့ၥၫ့ ကထီၩ့ထီ ကဂီနီၪ ဖူၫ ၥၭၡါဒဲအလံၩဖိၪ ထၧၫ့ဖူၫလံၩနံၫဂၩ စဲၪ့လၫ့ဂၩဖၭ လၧဎုၬလးဖၧၩ့နီၪလီၫ ထၧၫ့ဖူၫလံၩနံၫဂၩ ထီၩ့လၧဖီၫၥၪဎုၬအလးနီၪဒၪဘၪဖီၫၥၪအဖီၫအီၪဝ့ၫကဒုၭကဒုၭဒဲအထိအဖီၫ အီၫဝ့ၫအၪမၬအကၠီၩ့ လံၩလဂၩစံၭထၪ့ဘၪအဖူၫဖူၫ ဖူၫဖူၫဧ့ လၧကထီၩ့ဝ့ၫနံၪ့ထၪ့ၥၫ့ယီၩ ဖီၫၥၪအထံၭလဖၪနီၪကၥၪဝ့ၫအၪမၬ တၡါၡါလ့ၬလီၫ ယိစိၩအထံၭအဘီၩ့ဘ့ၩ အထိအဖီၫလဖၪဂုထၪ့ဝ့ၫအၪမၬ မွဲအ့ၬဧၪ မွဲဘဲၫနီၪၥိၭအကၠီၩ့ ဖူၫၥၭၡါလဂၩ စံၭဆၧၫ့ထဲၩ့ဘၪအလံၩ မွဲလံၩဧ့ ဖီၫၥၪအထံၭလဖၪယီၩ အ့ၪအဆၧအုၩ့လၩ့ဂုးခၧၫ့နီၪ ကၥၪဝ့ၫအဒုၭဒုၭလီၫ အဲၪကွံၩဘၪထၧၫ့ဖုဝဲမုၪခွၫထံၩၥိၭ ၥၭဘၪ့ဖိၪၥံၪဧ့ ဖူၫ ၥၭၡါလဂၩစံၭထၪ့ဆၧ ဘဲၫယီၩၥိၭနီၪ လံၩခွၫလဂၩ နၪလၥ့ၪဘၪ အခီၫပယီၫနီၪလီၫ ဆၧနီၪအကၠီၩ့ ဖူၫလဂၩ ဆုးလီၩ့ထဲၩ့ဘၪ အခီၫပယီၫ အ့ၩ ဘယီၩလံၩဧ့ မွဲဝ့ၫအထိအဖီၫနီၪ ဖီၫၥၪကၥၪအဂး ဖ့ၪအ့ၪဝ့ၫ  ဘဲၫၥိၭဆၧအုၩ့လၩ့နီၪလီၫ လါနၫ့ဂၩ အထိအဖီၫ လနၩ့နၩ့ လၥၪဒံၭဘၪအထီ လၩ့ဎွံၪလၩ့လဲၩဝ့ၫ ဒဲလကၭဘၪ ဆၧအချံၪ့အ့ၪနၭထၪ့နီၪ လၩ့ယံၭလၩ့ဘဲၩဝ့ၫတၭ ၥၪထၪ့အထီနီၪ အထိအဖီၫ အီၪထးဝ့ၫဒၪဖိၭဖၫ့နီၫလီၫ

ဆၧနီၪအကၠီၩ့ လံၩဧ့ နံၪ့ထၪ့ၥၫ့ယီၩ မွဲဝ့ၫဘဲၫယီၩၥိၭလီၫ အ့ၪနံၪ့ထၪ့ၥၫ့ထီၩ့ဝ့ၫအထီနီၪ ၦဖ့ၪအ့ၪဝ့ၫ ဆၧအုၩ့လၩ့ အၪမံၩ့အၪမၠိၩၥ့ၪနီၪလီၫ ၦလနၩ့နၩ့ စံၭဘၪဝ့ၫ နံၪ့ထၪ့ၥၫ့ မွဲနံၪ့အၥၫ့ယီၩ ယကအီၪထဲၩ့ဂ့ၩဂ့ၩဘၪဘၪ ယကခိၭနၪထဲၩ့ မိမိ ဖါဖါအဆၧချဲၩ့ စံၭမၬချၭ စံၭထၪ့ဆၧဘဲၫယီၩၥိၭကကၠၪ မွဲဝ့ၫအဆၧအုၩ့လၩ့နီၪ ကဲၪထၪ့ဝ့ၫဒၪ အထိအဖီၫဒံၭလီၫ ကဲၪထၪ့အၥၬဒံၭအ့ၬ အ့ၬပဆၧအုၩ့လၩ့ ဂုးခၧၫ့မၬအထိအဖီၫနီၪ ကကဲၪထၪ့အၥၪလီၫ

အဲၪကွံၩဘၪ ထၧၫ့ဖုဝဲမုၪခွၫထံၩၥိၭၥံၪဧ့ ဆၧဘဲၫနီၪၥိၭအကၠီၩ့ ဎရံၬနံၪ့ (၂၀၂၁)  နံၪ့ နံၪ့ထၪ့ၥၫ့ယီၩဘဲၫၥိၭပၥၪထၪ့န့တၡါအဂး ပက ဘၪကျ့ၭစၨၭထၪ့ဆၧအၪမၬလီၫ အဆၧၫ့အထီ အ့ၪလဲၩထၪ့ၥၭ ဘဲၫၥ့ၪလဲၪလါနၫ့ ပကဘၪဖီၫၥၪထၪ့နီၪလီၫ ဆၩ့လၩ့ဝ့ၫအနၭထုၬ ဒဲ ချံၪ့ဝ့ၫအၪမၬ ထၧၩ့ထံၫကဲၪထၪ့ အခိလီၫ့ဆ့လါနၫ့ ပထိပဖီၫနီၪ ကၥၪထၪ့ကန့အဂး ပကဘၪကျ့ၭစၨၭဝ့ၫဒဲ ပကဘၪဂုးခၧၫ့လၧပဆၧအုၩ့လၩ့ကိၭနံၩကိၭဂီၩလီၫ အနီၪမၬ နံၪ့ထၪ့ၥၫ့ယီၩ ကကဲၪထၪ့ဝ့ၫအၥၫ့ဂီၩ့ကဎံၫလၩဝ့ၫ အၪအၪလ့ၬနီၪလီၫ အဲၪကွံၩဘၪထၧၫ့ဖုဝဲမုၪခွၫထံၩၥိၭၥံၪကိၭဂၩအၪ့န့ထၪ့ထဲၩ့ အဂဲးအဘၭလၧ (၁ယီ ၁၅း၅)  အယွ့ ယီၩလါဆံၭ

ယဝ့ၫဒၪယီၩ ယမွဲ စဘံၭအမုတၭ နၥံၪမွဲအထဲၩ့လီၫ ၦလၧအအီၪဂုးခၧၫ့လၧယဖၧၩ့ ဒဲယအီၪလၧအဖၧၩ့နီၪ ၥၪဝ့ၫအၪဖျိၪ့လီၫ အဂဲးဘဲၫယီၩ အ့ၪလမွဲဘၪလၧယကၠီၩ့တၭ နၥံၪမၩဆၧၥ့ၪနးမံၩ့အ့ၬ      

အထံၭး စအဲၪမ့ၪဒိၩ့  ၥူၫလ့ၫဖၩ့  လံၬအဘျံၭဖၩ ၇-၁၀