ထၪ့ၡါလၩ့ဖၩလဂ့ၩ

နခဲၫ့ကံၭနၥၭကဎိၩကဖျီးလၨၫဂီၩ့ ထၪ့ၡါဘၪအဖျဲၪလဂ့ၩႉ အ့ၪနမွဲနတဲၩဝဲၩ့ထၬနၥၭဂီၩ့ဂ့ၩဘၪစဲၪယူၭမၬ ထၪ့ ၡါမၬဆံၭႉ ပဘၪအီၪထးန့ၫကဂၩလီၫအကၠီၩ့ ပထိးဆၧၫ့ဆၧယီၩလန့ဘၪဂီၩ့ထၪ့ၡါလဂ့ၩႉ ဘၪအီၪကဂၩလီၫအကၠီၩ့ ဘၪၥံၫခွံၬၦၡၩဘနီၪ လအီၪဒံၭဘၪနးဂၩနီၪလီၫႉ ထၪ့ၡါဘၪလၧၦအဘၪမၪလဖၪနီၪမၬ အၥၭမၧၫ့ဝ့ၫဒၪလါနၫ့ အဆၧ ၥၭမၧၫ့ဘၪၥံၫဝ့ၫလီၫႉ

ပဆၧအဲၪတၩ့နီၪ ကဘျဲၩထၪ့ၥၭပၧၩ အၪ့ယိၫခဲၫ့ကံၭဘဲၫနီၪဂီၩ့ထၪ့ၡါလဂ့ၩႉ ၦလၧအအဲၪနၧၩအတီၩအလီၩ့ လ ဂၩနီၪ ကအီၪဘၪလၧနနဲၩ့ထံၭအဂး ဆၧအဲၪဆၧကွံၩအ့ၪအီၪနီၪ လၧၫ့ဎွ့ၩယူၭလီၫႉ မိဖါဘူၭထံးလဖၪအၪ့မၧၫ့ဆီၫ့ အၪ့မၧၫ့နီၩ့ပၧၩအကၠီၩ့ ထၪ့ၡါလဂ့ၩႉ ၦလၧကဘၪဂၭဖၬလၧ ဂံၪ့ဒီၪ့အဆၧၥၭမၧၫ့ဖၧၩ့ၥၭနီၪ လမွဲဘၪနမိနဖါတၭ မွဲဒၪလၧ နကဘၪဂၭဖၬဒၪနၧၩလီၫအကၠီၩ့ ဖၧၩ့ၥၭအယီၩနီၪ မၩဖိးထၪ့ဒၪနၧၩလီၫႉ

နဘၪနၥၭ ဆၧထၪ့အီၪဎုၬမုနံၩမုၬနီၪအကၠီၩ့ ထၪ့ၡါဘၪလဂ့ၩႉ ဂံၪ့ဒီၪ့အဆၧၥၭမၧၫ့နီၪ ဘဲၫၦၡၩဖ့ၪနဲၪထၬလၧ ဆၧဂၩ့ဖၧၩ့အၥိၭ မွဲလယီၫဘၪလီၫႉ လၧဆၧအီၪဎုၬလံၬစၧၩ့ဖၧၩ့ ပဆ့ၭထၬစူၪမုနီၪ မွဲမၩဂုးခၧၫ့အ့ၪပၧၩ ပဂံၪ့ဒီၪ့လဆိၩ ယၫလန့ဘၪနီၪလီၫႉ နအဲၪဒိၭန့ဘၪၦလဂၩဂၩအဆၧထူၭဆၧလၧၫ့ၥံၪအကၠီၩ့ ထၪ့ၡါဘၪလဂ့ၩႉ နထၪ့ၡါဂီၩ့ကကၠၪ ဆၧလဖၪနီၪ မွဲကထီၩ့ထဲၩ့လၧ အလးခဲၫ့နီၪလီၫႉ

အမ့ၬဎံၪယၪဘွၩအကၠီၩ့ဆ့ ထၪ့ၡါဘၪလဂ့ၩ. ရွံထၪ့ၦလၧအၥုၪ့ဂ့ၩၥၭဘွၩအီၪလဖၪနီၪဆံၭႉ မ့ၬဎံၪယၪဘွၩနီၪ ခၫ့ဆၧၫ့ခွံၬအခံၫ့လန့ဘၪလီၫႉ ၥၭအဆၧဂ့ၩဆၧဘွၩနီၪ မွဲအၪ့လဲၩ့ထၪ့ၥၭ လန့ဘၪနးဆိၭနီၪလီၫႉ ၦလၧအၥုၪ့ဂ့ၩၥၭ ဘွၩအီၪလဂၩနီၪ မၩဎံၪလၩထၪ့နဆၧၥၭမၧၫ့န့ဝ့ၫဒၪဂ့ၩဘၪစဲၪ့နီၪလီၫႉ

လီၩ့ဎွါၦလၧကမိအီၪကၠၧၫ့ကၠၧၫ့လၧနၧၩနီၪလဂ့ၩႉ ရွံထၪ့ဒၪၦလၧ အ့ၪနလအီၪဘၪအီၪန့အ့ၬ ၦၡၩနီၪဂီၩ့ထၪ့ ၡါဒၪလၧၦအနီၪလါဆံၭႉ

credit > သျှန်သျှန်လင်း