ထၧၫ့ဖုဝဲ

ပထၧၫ့ဖုဝဲနီၪ မွဲဝ့ၫကဆါယွၩဖ့ၪလၧထၬပၧၩ အဂ့ၩထုၬဆၧဆိၪဂ့ၩဆိၪဘွၩကမံၩ့လီၫႉ ပထၧၫ့ဖုဝဲအ့ၪအဲၪလိၬၥၭစွါဘဲၫမိဖါဆၧမုၬအၥၭဂီၩ့ အၥၭဎွံၪဝ့ၫအၪမၬလီၫႉ ပထၧၫ့ဖုဝဲၥံၪ ထၪ့ၡါလၧၩ့ဖၬဂီၩ့ လချဲၩ့ဒုၪ့ဘၪလိၬၥၭနီၪ ထီး ကဲၪဘၪလဂ့ၩလၧပဆၧၥၭမၧၫ့ဖၧၩ့ ပဒၪခီၩ့ဆၧၫ့ယၪ ဆၧကၪဆၧဂဲၩ ဆၧၥုၪ့အုၭၥၭအုၭလဖၪနီၪ ဖီၩ့မၬလၧပထၧၫ့ဖုဝဲ ဘူၭထံးနီၪ ၦဂူၫဂၩ အၪ့နၧၫ့ထိးဆၧၫ့အ့ၪပၧၩ ယံၬယံၬလနၧၩ့ဘၪလီၫႉ မွဲဆၧနီၪအကၠီၩ့ ပခိၭနၪၦဂူၫဂၩအဆၧချဲၩ့ဂီၩ့ ပထၧၫ့ဖုဝဲၥံၪ ၥၭဘၪလၩ့ဖၭလိၬၥၭလဂ့ၩ ဆၧလၧၦဂူၪဂၩနီၪ အ့ၪပအၪ့ပအီၩအီၪအခံၪ့အီၪလၧပနဲၩ့ထံၭဂီၩ အ့ၪပလၩ့ၡၪ့စွါဘဲၫအဝ့ၫၥံၪကစဲၪ့ဒၪခွံၬပၧၩလီၫႉ လၧပဖၫ့ခိၪအဂ့ၩထုၬနီၪ ပထၧၫ့ဖုဝဲနီၪလီၫႉ အ့ၪပဒၪဆၧကၪဆၧဂဲၩဆၧၡၪ့ဆၧနၬစွါဘဲၫမၩဆၧၩပပၧၩကိၭမံၩ့နီၪ မွဲဒၪပထၧၫ့ဖုဝဲၥံၪလီၫႉ မွဲဘဲၫနီၪအကၠီၩ့ ထၧၫ့ဖုဝဲၥံၪနီၪကဘၪအဲၪကွံၩလိၬၥၭလီၫႉ ပထၧၫ့ဖုဝဲၥံၪလဂၩဘၪလဂၩအီၪပဲၩထၬလိၬၥၭဂီၩ့ ခွံၬၡိၬထးလိၬၥၭလဂ့ၩပကအီၪဘဲၫနီၪစွါဘဲၩမီၪ့ဎီၩ့ဒၪ ပမၩၡၪ့ပမိပဖါအၥၭလီၫႉ အ့ၪပအဲၪမိဖါစွါဘဲၫပထၧၫ့ဖုဝဲၥံၪပကဘၪအဲၪလိၬၥၭ ပကဘၪမၩဆၧၩ့လိၬၥၭလီၫႉ ပခိၭနၪၦဂူၪဂၩအဆၧချဲၩ့ဂီၩ့ ၥၭလၩ့ဖၭဘၪလိၬၥၭလဂ့ၩ အီၪပဲၩထၬကၠၬလိၬၥၭလဂ့ၩႉ