Radio Veritas Asia Buick St., Fairview Park, Queszon City, Metro Manila. 1106 Philippines | + 632 9390011-15 | +6329390011-15
ထီးလူၬနီၪမွဲဒၪအဝ့ၫအဂးလီၫ
ယမုလါနခိၪနုၬဂ့ၩ ဂ့ၩဘၪစဲၪႉ အ့ၪမွဲနကဲၪထၪ့ဘဲၫနီၪဂီၩ့အခၫ နအီၪက့ၪထးခွံၬယၧၩန့လီၫႉ လါနၫ့အနီၪမွဲအရ့ၩဒိၪ အ့ၬႉ ပအဲၪဝ့ၫဒၪၦၡၩကဂၩ ဘဲၫကကဲၪထၪ့ဘဲၫနီၪဂီၩ့ ကဆၧၫ့ထုၪ့ဒၪလၧအခၪ့ကန့အဂး ယဖ့ၪဂဲးဖ့ၪဘၭမၩဆၧၩ့အဝ့ၫၥ့ၪ ထၪ့နီၪ မွဲဒၪယဆၧအဲၪလီၫႉ
ယမုလါနၥိၭနကီၩ့ၥ့ၪဎံၫဎံၫလၩလၩကိၭမံၩ့လီၫႉ အ့ၪမွဲနကဲၪထၪ့ဘဲၫနီၪယူၭစွါဘဲၫ နမိအီၪက့ၪထးယၧၩမွဲန့ဆ့ႉ လါနၫ့ အနီၪအရ့ၩဒိၪအ့ၬႉ ယအဲၪဝ့ၫဒၪနၧၩလဂၩနီၪ ၦၡၩကအၪ့အူၭအၪ့ဎၧၩ့ဘၪနၧၩအဂး ကယဲယမၩအ့ၪနၧၩန့ ယမိမၩအ့ၪနၧၩနီၪ မွဲဒၪယဆၧအဲၪလီၫႉ
ယမုလါနဒိၪထုၬကုၭဎွ့ၩ နခိၪနုၬလ့ၩဂ့ၩဘၪစဲၪႉ လါနၫ့အ့ၪမွဲနကဲၪထၪ့ဘဲၫနီၪဂီၩ့အခၫ လၧနနဲၩ့ထံၭ အ့ၪယလအီၪ ဘၪလါနၫ့ နအီၪမွဲန့ဆ့ နၥၭကဲၪထၪ့ဘဲၫနီၪၥ့ၪလီၫႉ လါနၫ့ အနီၪအရ့ၩဒိၪအ့ၬႉ ယအဲၪဝ့ၫဒၪၦလဂၩ ကကဲၪထၪ့ ၦလၧဒိၪထုၬ ကုၭဎွ့ၩႇ ၦလၧအခိၪနုၬလ့ၩကဂၩအဂး ယမိနဲၪအ့ၪဖၧၩ့ၥၭနီၪ မွဲဒၪလၧယဆၧအဲၪနီၪလီၫႉ
ဆၧလၧဆၧအဲၪနီၪမန့လဲၪအဂဲး ယလီၩဂီၩ့ယူၭႉ ဆၧလၧဆၧအဲၪနီၪ မွဲဒၪပအီၪက့ၪထၪ့အဝ့ၫအဖၫ့ခိၪ ဆၧၥၭအီၪနီၪ လီၫႉ ပဆၧအဲၪတၩ့ ကဂ့ၩဘွၩထၪ့အဂး ကလ့ၩထၪ့လ့ၩထီၫအဂး ဆၧအဂ့ၩကိၭမံၩ့နီၪ ပမုလါအဝ့ၫန့ဘၪကိၭမံၩ့ႉ ပနၫ့ဆါဒၪ ပၧၩဆ့ ဘဲၫအဝ့ၫကန့ထၪ့ဘၪ ဆၧလဖၪနီၪအဂး ဘဲၫပမၩန့အၥိၭ ပမိခိးဂဲခိးဘၭအ့ၪလၧအနဲၩ့ထံၭနီၪလီၫႉ
ဆၧလဖၪနီၪအ့ၪမွဲအဝ့ၫအီၪနီၪ လအီၪဘၪစွါဘဲၫ ပအဲၪအဝ့ၫလၧၩ့အ့ၬဧၪ မွဲဘဲၫနီၪအ့ၬႉ ဆၧလဖၪနီၪအ့ၪလအီၪဘၪ လါနၫ့ မွဲပအဲၪအဝ့ၫဆ့ႉ ဘဲၫမိဖါၥံၪ မုလါဖိၪလဖၪအဆၧၥၭမၧၫ့ကဎံၫလၩအၥိၭ ဖိၪနီၪအ့ၪမွဲအဆၧၥၭမၧၫ့လဂ့ၩဘၪဒၪလူၬ ဖိၪနီၪမွဲဒၪဖိၪလီၫႉ ဘဲၫနီၪအၥိၭ ပဆၧအဲၪတၩ့အီၪနီၪ ဆၧအဂ့ၩထုၬလဖၪ လအီၪဘၪလါနၫ့ အဝ့ၫနီၪ မွဲဒၪပဆၧအဲၪတၩ့နီၪလီၫႉ
အ့ၪမွဲပအဲၪၦၡၩကဂၩနီၪတၡါၡါစွါဘဲၫ ပလအီၪဘၪအဝ့ၫအီၪန့အ့ၬ ပမၩထၬဘၪအဝ့ၫဘဲၫနီၪၥိၭအ့ၬႉ ဘၪလဘၪ အ့ၪမွဲပလအီၪလၧၩ့ဘၪလၧအဝ့ၫအနဲၩ့ထံၭကကၠၪ အဝ့ၫယီၩကဆုးထဲၩ့အီၪမၧၫ့ၥၭပၥ့ၪလဲၪနီၪ မွဲပကဘၪဖ့ၪနဲၪ ၥီၪ့ၥၫ့ထၬအ့ၪ အဝ့ၫနီၪလီၫႉ
ဆၧလၧဆၧအဲၪနီၪ ကနံၩကကၠၪ အ့ၪမွဲပလအီၪလၧၩ့ဘၪလၧအဝ့ၫအနဲၩ့ထံၭအခၫ အနၫ့ဆါဒၪအဝ့ၫ ဘဲၫၥိၭကဆုး ထဲၩ့အီၪမၧၫ့ၥၭ အဂ့ၩထုၬကန့အဂးႇ လၧဎံၫဎံၫလၩလၩအဖၧၩ့ ဘဲၫၥိၭအဝ့ၫအီၪထးကန့အဂး မွဲပကဘၪကျ့ၭစၨၭ ၥီၪ့လိၪအ့ၪ အဝ့ၫနီၪလီၫႉ ဘၪန့လဲၪနီၪ လၧဂၪ့ခိၪချိၫ့ဖၧၩ့ ဆၧကိၭမံၩ့နီၪ မွဲအီၪလၧပစူၪဖၧၩ့အ့ၬႉ ပဆၧဘိၪ့နီၪမွဲပဒၪလၩ့ထူၬအ့ၬႉ ဆၧကိၭ အမံၩ့နီၪ မွဲလဆိလလးဖိၪလီၫအကၠီၩ့နီၪလီၫႉ
Add new comment