ထိးဆၧၫ့ခၪ့ဂၬခွံၬလၧ ဆၧနံမွံၫလါဆံၭႉ

ပဂဲၫကဲၪထၪ့ဘၪၦၡၩကဎုၬယီၩအဖၧၩ့ ပကဘၪဒၪဆၧၫ့ယၫလၧ ဆၧအဂ့ၩဒဲဆၧအအၧၩ့နီၪ မွဲဒၪဆၧအတီၩလီၫႉ ပဘၪ ဒၪဆၧၫ့ယၫလၧဆၧအဂ့ၩလဖၪဆ့ ကဂုးခၧၫ့လဆိၩယၫစီၪဘၪဘဲၫနီၪလဂ့ၩႉ ပဒၪဘၪလၧဆၧအအၧၩ့လဖၪနးဆ့ ကကဲၪထၪ့ ယံၬလ့ၬစီၪဘၪဘဲၫနီၪလဂ့ၩႉ

         ဘဲၫပထိးဆၧၫ့ ဆၧၥၭမၧၫ့အထၧးအလၧးလဖၪကန့အဂးနီၪ မွဲဘၪထွ့ၪဒၪလၧပၧၩလီၫႉ ၦၡၩကနၩ့နၩ့ဒၪဆၧၫ့ယၫလၧ ဆၧအဂ့ၩ ဆၧအမုၬအခၫနီၪ ထိးဆၧၫ့ဝ့ၫဒၪန့လါနၫ့ အ့ၪဘၪဒၪဆၧၫ့ယၫလၧ ဆၧအအၧၩ့ ဆၧၥၭအုၭလဖၪစွါဘဲၫ ထိးဆၧၫ့ဝ့ၫ လန့ဘၪဒဲ မၩၥံၫလၩ့အၥၭဂီၩ့ထိးစၪခွံၬအၥၭနီၪလီၫႉ

        ဆၧနီၪအကၠီၩ့ ထီးပလကဲၪထၪ့ဘၪဘဲၫနီၪအၥိၭအဂး တခၩကမွဲဆၧနးမံၩ့နီၪ ခၫ့ဂၬခွံၬဒၪလၧဆၧနံမွံၫလါဆံၭႉ ပဆၧၥၭ မၧၫ့ဖၧၩ့နီၪ ကကၠၪကၠၪလၩ့ဆ့ၭလၩ့ယွၩအီၪအၥိၭ လ့ၩထၪ့လ့ၩထီၫအီၪဝ့ၫဒၪႇ ဘဲၫၦၡၩကၠူၭလၩ့ပၧၩအီၪအၥိၭ ၦၡၩကကၠူၭထၪ့ပၧၩ မွဲကအီၪႇ ဘဲၫၦၡၩအၪ့အုၭပၧၩအီၪအၥိၭ ၦၡၩအၪ့ကီၪပၧၩဆ့ မွဲကအီၪနီၪလီၫႉ ပကဲၪၦၡၩကမံၩ့နီၪ ပတခ့ၭဖဝၭလမီၪ့ဎီၩ့ဘၪ လိၬ ၥၭအကၠီၩ့ ပၥုၪ့ပၥၭဆ့ မွဲကဘၪလၩ့ဎိၭအ့ၬႉ

        ဆၧနီၪအကၠီၩ့ လၧဆၧၥုၪ့ဎွံၪၥၭပျၩ့ဖၧၩ့ ပကဘၪမၩဖိးထၪ့ဒၪပဖၧၩ့ၥၭဂီၩ့ လၧပရွံထၪ့ထၬ ဆၧၥၭမၧၫ့ကဖျီၩ့ယီၩအဖၧၩ့ တခၩ ပကဒၪဆၧၫ့ယၫဘၪလၧ ဆၧနးမံၩ့ထိးဆၧၫ့ခၪ့ဂၬခွံၬလၧ ဆၧနံမွံၫလါဆံၭႉ