ဆၧအၪ့ဆၧအီၩ

ၦၡၩဒဲကယဲဆၧလၧအအီၪလၧအၥၭမၧၫ့လဖၪႇ လၧကမၧၫ့ဝ့ၫအဂးဘၪအၪ့ဆၧအၪ့ဆၧအီၩနီၪလီၫႉ ကယဲဆၧအထံၭအဘီၩ့လဖၪဆ့ လၧအဂးဒၪဝ့ၫလိၫဘၪဆၧအၪ့ဆၧအီၩဆုၬဆုၬလီၫႉ ပဝ့ၫၦၡၩလဖၪလၧပကအီၪမၧၫ့အဂးလၧပကြၨၭဒိၭန့ဘၪ ဆၧအၪ့ဆၧအီၩအလၧၫ့အဎွ့ၩ လနံၩဘၪလနံၩလီၫႉ

ဆၧအၪ့ဆၧအီၩအလၧၫ့အဎွ့ၩစံၭဆၧနီၪႇ မွဲဆၧအၪ့လၧအဆံၫ့ဝ့ၫႇ လၧအဖီၩ့ဖျ့ၭဆၧစူၭဆၧဆၫအဎိၩ့အဎါထီးအလူၬ ဒဲလအီၪဘၪလၧဆၧအစုၪအဖျါလၧအမၧၩ့ၥ့ၪပၠိၭၥ့ၪပၧၩႇ ဒဲမွဲဆၧအၪ့ၥံၪ့ဆ့ၭလၧစီၩ့ဂဲးလအီၪဘၪ နးမံၩ့အဖၧၩ့လီၫႉ ဆၧအၪ့ဆၧအီၩဘဲၫနီၪအၥိၭလဖၪ မၩဆၧၩ့ပၧၩလၧပကအီၪမၧၫ့အီၪဂဲၩလၧ ဆၧအီၪဆီၪ့အီၪချဲၫ့ႇ ဒုၭဒိၪထၪ့ထီၫထၪ့ပမိၡါဒဲ ဖ့ၪလၫ့ပၧၩဆၧၥုၪ့ထိၬၥၭထိၬနီၪလီၫႉ ဆၧအၪ့ ဆၧအီၩဘဲၫနီၪအၥိၭ ပအၪ့နၩ့ဖၭထၬၥ့ၪ ဝ့ၫၥၧၫ့ဖုၫဘဲၫယီၩအၥိၭလီၫႉ

ဆၧအခၪ့ထံၭလဖုၫနီၪႇ မွဲဆၧအၪ့လၧအဒုၭဒိၪထၪ့ထီၫထၪ့ ပမိၡါထၧၫ့ဂၩယၫလီၫႉ ဆၧအၪ့လဖၪနီၪမွဲဝ့ၫဒၪ ကယဲဆၧဖံၭဆၧယၪႇ ကယဲဘဲၩ့အၥၪလဖၪႇ ကယဲဆၧအဒံၪလၧဆၧအၪ့ဝ့ၫလဖၪႇ ၥဒၪ့ႇ ချိၪႇ ဆွ့ၪလဖၪနီၪလီၫႉ

ဆၧအၪ့ဆၧအီၩနံၫဖုၫလဖုၫနီၪ မွဲဆၧအၪ့ဆၧအီၩလၧအဖ့ၪလၫ့ပၧၩပမိၡါအဆၧဂဲးဆၧဘၭနီၪလီၫႉ နၫ့ကွ့ၩအံၪႇ ထံၫလၪဆၧၫ့ႇ ဘုၪခဲၫၥၪႇ ကၠိၩ့ထံႇ ကၠီၩ့ထံႇ ဎူၫထံႇ ဂိၫ့ကလၭထံႇ နဲၪၥံၪ့ထံႇ ဘဲၩ့ၥၪအၥိၪႇ ထီပၭႇ ဂူၪဆူၫႇ ဘုၪကၠိၩ့ႇ အဲၩ့ဒဲ ဆၧနူထံၫလဖၪႇ မွဲဆၧအၪ့လၧအဖ့ၪလၫ့ပၧၩပဂဲးပဘၭအကၠီၩ့ ပလိၫဘၪ တၡါၡါလီၫႉ

ဆၧအၪ့ဆၧအီၩၥၧၫ့ဖုၫလဖုၫ မွဲဆၧအၪ့လၧအမၩဆၧၩ့ပၧၩလၧ အကပဒၩ့ထၬဆၧစူၭဆၧဆၫလဖၪအဂးလီၫႉ ဆၧအၪ့လဖၪနီၪ မွဲဝ့ၫဒၪ ဆၧဂဲၪၥၪအၥံၪ့ၥံၪ့ဆ့ၭႇ ဂိးဒိၭႇ ဒးဒလိၫ့ဒိၭႇ ထံၫလုၩအယိၬႇ ဘၪဘီၪ့ခိၪႇ ဘၪခိၪဖီၫဒဲ ကယဲဘၪ အဒိၭအလၪႇ ခိၭၥၪႇ ယၩ့ၥၪဆဲၫ့ႇ ၥၭကျူၩၥၪအမံၫ့ႇ ၥၭကျူၩၥံၪ့ၥၪအမံၫ့ႇ က့ၭဝ့ၭၥၪႇ ၥၭၥွံၪဆၧၫ့ၥၪႇ ဘၪဝီၩထံႇ ဒဲကယဲဆၧၥူဆၧၥၪလၧအဘံၪ့ကူၩနီၩ့လဖၪႇ ဆၧၥူၪဆၧၥၪလၧအထံၫအၪလဖၪႇ ကယဲဆၧဒိၭဆၧလၪလဖၪနီၪလီၫႉ

ပအၪ့ယံၫယါမ့ၩ ဘဲၫဆၧအၪ့အမိချိးအၥိၭတၭႇ ဆၧအၪ့ၥၧၫ့ဖုၫယီၩႇ ပကဘၪအၪ့ထဲးဎုၬလၧမ့ၩလဘျၩ့လါလါလၧဆၧလအၪလၨၪၡၩလၨၪဘၪအဖၧၩ့လီၫႉ ပကဘၪအၪ့ဆၧအၪ့လၧအဆံၫ့ၥံၪ့ဆ့ၭဒဲ အဲၪ့ယဲၩဘျ့ၭဘျၭကိၭထီဒ့ၭဆံၭႉ

အထံၭ-ၦဖျိၩၡိအလံၬဖီႇ ဆၧမၩလိၪနံၫဆၫ့အဂး