ဆၧအဲၪဆၧကွံၩနီၪ အီၪဝ့ၫဒၪလၧ နနဲၩ့ထံၭလီၫ

ဖုဒ့ၩဧ့ႇ လၧဖုဒ့ၩလၥ့ၪယၫဒံၭဘၪ စီၩစီၩ အၥၭဖၧၩ့ ဆၧအဲၪအီၪဘဲၫၥ့ၪလဲၪနီၪ ဖုဒ့ၩကၥ့ၪယၫအဂး စီၩကဘၪလီၩဖျီၪထၪ့ဝ့ၫဒၪလီၫႉ အ့ၪစီၩလီၩဖျီၪထၪ့ကကၠၪစီၩနီၪမွဲဆၧအဲၪၦဒူၩဖိၪႇ အဲၪဆၧၥ့ၪထုၬ ၦလဂၩအကၠီၩ့ႇ မိဂၧၫ့ထၪ့ၥၩလၩ့အၥၭ လအီၪဘၪ ဘဲၫၥ့ၪလဲၪအကၠီၩ့ႇ စီၩကမီဒုၭၥ့ၪယၫဘၪ ဖုဒ့ၩလီၫႉ

ဖုဒ့ၩဧ့ႇ လၧဂၪ့ခိၪချိၫ့ယီၩ ၦၡၩလဖၪနီၪ ဂၧၫ့ထၪ့ၥၩလၩ့ဘၪဝ့ၫအဆၧအဲၪ ဆၧဖ့ၪဆၧနီၪ မွဲဝ့ၫဒၪ ဆၧအဲၪတၡါ တၭ ဖုဒ့ၩကနါဂၧၫ့ယုၩယါဝ့ၫလီၫႉ ဆၧနီၪအကၠီၩ့ႇ စီၩအဲၪဘၪဝ့ၫ ဖုဒ့ၩကဂၩနီၪတၭ လၧလလၧၫ့လဎွ့ၩဘၪ ဆၧၥၭမၧၫ့အလး ဖုဒ့ၩ ကဘၪအီၪနီၪ စီၩဒၪလထၪ့ဘၪနီၪလီၫႉ ဆၧနီၪအကၠီၩ့ႇ လၧလအီၪဘၪဆၧနးမံၩ့ယီၩ ကကဲၪထၪ့ဆၧလမံၩ့မံၩ့အဂး လၧဆၧအဲၪဆၧကွံၩအဖၧၩ့ စီၩတဲၩ့ဝဲၩထၬစိၩအ့ၪ ဖုဒ့ၩအဂး မွဲဝ့ၫမူၭဝၩ့ၥီၫ့ဒဲအဎံၫလၩ လၧၫ့ဎွ့ၩဝ့ၫဂၪ့ခိၪချိၫ့ယီၩလီၫႉ လၧမူၭဖိၭဖၫ့အိၩႇ ယူၩဝံၩ့ဝၩ့ဝ့ၫထိၪၥံၪလံၪၥံၪလဖၪႇ လၧထံၫဆ့ၭမ့ၬအဖၧၩ့ အဖၧၩ့ယါကွ့ၩထံၫ ယၪဖိၪလံၪဖိၪလဖၪႇ စဲၪ့လိၬကွ့ၩဝ့ၫ ဆၧဖိၪဆၧဎါလဖၪဒဲ အလွ့အလဲၫအီၪဝ့ၫ အၪမံၩ့အၪမၠိၩ ဖီၫၥံၪလဖၪနီၪ မွဲဝ့ၫဒၪ စီၩ အဆၧအဲၪလၬဆီၪ့လမံၩ့နီၪလီၫႉ

ဖုဒ့ၩဧ့ႇ စီၩဖ့ၪနၧၩလၬဆီၪ့ဘဲၫယီၩၥိၭန့လါနၫ့ဂ့ၩႇ ဆၧၥၭမၧၫ့နီၪ လမီၪ့ဎီၩ့ဘၪတၭ စီၩ အၥုၪ့ဎွံၫၥၭယီၫ လန့ဘၪလီၫႉ ဆၧမၩအၥၭဘဲၫနီၪၥိၭအကၠီၩ့ႇ ၦၡၩလနၩ့နၩ့ စံၭဘၪဝ့ၫ အၪအဲၪဆၧတၭ ကမိမၩ အၥၭမၧၫ့မီၪ့ဎီၩ့လီၫႉ ဆၧနီၪအကၠီၩ့ႇ စီၩနးဆ့ႇ အဲၪဘၪဖုဒ့ၩတၭဆၧၥၭမၧၫ့ ကမီၪ့ဎီၩ့အဂး စီၩဘၪအီၪ ဖျဲၪထၪ့ဘဲၫၥိၭဖိၪၥၪလဂၩလီၫႉ လါနၫ့ဂ့ၩ ဖုဒ့ၩလမၩၥ့ၪယၫဘၪအၥၭႇ လအၪ့ဂၬဘၪႇ လဖ့ၪဘၪအလးတၭ စီၩဘၪအီၪဖျဲၪထၪ့လၧဝံးချိၫ့ တၩ့ကုၭဖိၪအဖၧၩ့နီၪလီၫႉ မွဲဝ့ၫမုကနၩနီၪ စီၩကမိ မီၪ့ဎီၩ့အၥၭမၧၫ့ လၧဖုဒ့ၩအၪမၬတၭစီၩဂဲၫလၩ့လၧဂၪ့ခိၪချိၫ့ယီၩလါနၫ့ဂ့ၩႇ ဖုဒ့ၩအဆၧအၪ့ဂၬနီၪ လအီၪဘၪလၩ့ဝ့ၫဒၪ လၧလီခၪ့အဖၫ့ခိၪအၪမၬလီၫႉ လါနၫ့ဂ့ၩႇ ဖုဒ့ၩဧ့ႇ စီၩၥၭထၪ့နၧၩ လၥ့ၪဘၪနးဆံၭလီၫႉ လၧဂၪ့ခိၪချိၫ့ဖၧၩ့ ဆၧၥၭမၧၫ့ကမီၪ့ဎီၩ့ဘဲၫယီၩၥိၬအဂး စီၩဘၪခိၭယိလါဝ့ၫ အၪနံၪ့အၪလၩယူၭတၭ စီၩကမိချဲၩ့လၩ့ဎိၭဘၪဝ့ၫလၧ ဖုဒ့ၩကၠၧၫ့ကၠၧၫ့နီၪလီၫႉ စီၩအၥၭမၧၫ့လမီၪ့ဎီၩ့ဘဲၫယီၩၥိၭအဂး စီၩဘၪခိၭယိလါဝ့ၫ အၪနံၪ့အၪလၩယူၭတၭ စီၩကမိချဲၩ့လၩ့ဎိၭဘၪ ဝ့ၫလၧ ဖုဒ့ၩကၠၧၫ့ကၧၫ့ နနီၪလီၫႉ စီၩအၥၭမၧၫ့လမီၪ့ဎီၩ့ဘၪ လၧဖုဒ့ၩကၠၧၫ့ကၠၧၫ့အထီအိၩစီၩကမိဇံၭဘၪဝ့ၫ ဆၧချဲၩ့နီၪ ခၫ့ဖျီၫ့လၧမီၪၥံၪလဖၪအီၪ စီၩဘၪစံၭထၪ့ဝ့ၫလီၫႉဘဲၫယီၩအထီနီၪ လၧလံၬဆံၫ့ဎံၪဖၧၫ့ ဖုဒ့ၩအဂး စီၩစီၩႉႉ စီၭထၬချဲၩ့ထၬဝ့ၫ ဆၧချဲၩ့အၪမၬတၭ ဖုဒ့ၩအ့ၪအဲၪစီၩနီၪ လၧကနံၩအဖၧၩ့ အၡၩထုၬ လဘျၩ့ ဖီလံၬ ဆ့ၫ့ဎံၪတၭ ခိၭနၪစီၩအဆၧချဲၩ့နးဆံၭနဲၪႉႉစီၩအဲၪဝ့ၫနၧဧအၪမၬလီၫ ဖုဒ့ၩဧ့ႉႉဆၧနီၪအကၠီၩ့ ၦၡၩၥံၪ လီၩယုၩယါဝ့ၫ အ့ၪပအဲၪနီၪ ပမီချဲၩ့ကၠၧၫ့ကၠၧၫ့လၧပဆၧအဲၪအၪမၬလီၫႉ အိၩႉႉ ဖုဒ့ၩအမ့ၬအနၪ လၩ့ယံၭဝ့ၫအၪမၭနဲၪႉႉစီၩကမိဖ့ၪဂဲးဖ့ၪဘၭ ကမိအီၪကၠၧၫ့ကၠၧၫ့လၧဖုဒ့ၩနီၪတၭ စီၪဂဲၫလၩ့အီၪလၧကိၪဘိၪ့ဆ့ၫ့ဎံၪအဖၧၩ့နီၪ ဖုဒ့ၩအၥ့ၪယၫထုၬလီၫႉ ဆၧနီၪအကၠီၩ့ႇ ဖုဒ့ၩကဂၩအ့ၪအၥၭလၩ့ရၧးႇ လၩ့ထီၫ့လၩ့ဂီၫ့အခၫ လၧဖုဒ့ၩအတဝၫ့ၥရိဖၧၩ့ ပနဲၪ့ဖၩ့ထၪ့ ဝီၩဝၩ့ၩ အနဲၩ့နီၪ စီၩ အီၪခိၭယိလါဘၪဖုဒ့ၩလီၫႉ လါနၫ့ႇ ဖုဒ့ၩလ့ၩဆၧထဲၫ့ဆၧဘၪလၧ စီၩအဂံၪ့မ့ၬယၫကကၠၪႇ ဖုဒ့ၩနုၬလၩ့အီၪကွ့ၩ စီၩနးကၠၪအ့ၬႉႉမွဲအ့ၬဧၪႉႉဆၧနီၪအကၠီၩ့ႇ ပအ့ၪအဲၪဒါၭ ဒိၪမၬနီၪ ပမိအီၪကၠၧၫ့ကၠၧၫ့တၭ ဖုဒ့ၩကြၨၭယိခ့ၭလၩ့စိၩ စီၩနးထံၪလီၫႉ

အ့ၪဖုဒ့ၩဂဲၫလၧမုဎိၩနံၩအထီနီၪ စီၩအၥၭဎွံၫၥၭထိၭအၪမၬလီၫႉဖုဒ့ၩဒိၭန့ဘိၪ့ဆ့ၫ့ဎံၪကကၠၪတၭ ဖုဒ့ၩဒဲစီၩစီၩ အီၪန့ဝ့ၫကၠၧၫ့ကၠၧၫ့လီၫႉ ဆၧနီၪအကၠီၩ့ႇ ၦၡၩလနၩ့နၩ့လီၩယုၩယါဝ့ၫ အ့ၪပအဲၪတၡါတၭ ပမိအီၪဎုၬလိၬၥၭလီၫႉ ဘဲၫနီၪအကၠီၩ့ပၪ့ဒ့ၩဒဲစီၩစီၩ ကအီၪကၠၧၫ့ကၠၧၫ့ကန့အဂးနီၪ ဒိၭန့ဘိၪ့ဆံၫ့ဎံၪ ခိၬမၬခိၬမၬဘီၩဖုဒ့ၩဧ့ႉႉ

လါနၫ့ဂ့ၩႇ ဖုဒ့ၩလအီၪကၠၧၫ့ကၠၧၫ့ဘၪ လၧစီၩနီၪတၭ ဘဲၫယီၩဖုဒ့ၩလၩ့ထ့ၬဝ့ၫလၧစီၩလအဲၪဒိၭဘၪ ဆၧဒဲၩဘၭဖၧၩ့ယူၭ မွဲအ့ၬဧၪႉႉဖုဒ့ၩဧ့ႇ စီၩလအဲၪဒိၭဘၪဆၧဲၩဘၭလါနၫ့ဂ့ၩ မွဲဝ့ၫဆၧဒဲၩဘၭဖိၪနီၪ စီၩအဲၪထးႇ အဲၪထၪ့ႇ အဲၪဝ့ၫလဆိၩၡၩလီၫႉလၧတ့ၩၥံၪထီၫ့ဟံၪအဖၧၩ့ ဖုဒ့ၩအနၫဂၬဎိၩထၪ့ဂီၩ့ ဖုဒ့ၩအဆၧနၧၩ့အွံၪကထံၪနီၪစီၩအၥၭထဲၩ့ပၫယုၩယါဝ့ၫလီၫႉ ဖုဒ့ၩအၪ့လွ့ၫဆၧ ၥံၪဒူၭကယၫႇ ထံၫကၡူၪအဖၧၩ့ ဖုဒ့ၩနုၬဆဲဆၧနီၪ စီၩစီၩၥ့ၪယၫဝ့ၫလီၫႉလခဲၫ့ထုၬဖုဒ့ၩအဖၩ့အဆၧဂိၬဆၧကထံၪနီၪ ဆၧအဲၪမ့ၪခဲၩထၪ့ဝ့ၫတၭ စီၩအၥၭဘီၩ့ထ့ဖၭဝ့ၫနံၫကဲၩ့ မွဲအ့ၬဧၪႉႉလါနၫ့ဂ့ၩႇ စီၩကွဲၪဖျါခွံၬဝ့ၫ ထီးလူၬဖုဒ့ၩဧ့ႉႉစီၩစီၩကွဲၪဖျါခွံၬထီးလူၬႉႉ

စီၩအဲၪဘၪဖုဒ့ၩလဂၩအဂး လၧထုၪ့စူၪယၫလီၩ့ စီၩဖ့ၪအၥၭဂီၩ့ ထိးထဲၩ့တၩ့ထဲၩ့ဖုဒ့ၩန့ လၧဆၧဒဲၩဘၭအဖၧၩ့နီၪအကၠီၩ့ႇ စီၩဆၧမံၫ့ၥုၪ့မံၫ့ၥၭ အီၪထၪ့အၪအၪလ့ၬလီၫႉအ့ၪဖုဒ့ၩအၥုၪ့ဎွံၫၥၭထိၬနီၪ စီၩစီၩ ဆၧမုၬအၥၭလီၫႉ လၧပအဲၪဘၪၦလဂၩနီၪ ပမုလါအီၪဝ့ၫ မုၬမုၬလၩလၩအဖၧၩ့နီၪ မွဲစီၩအၥုၪ့အီၪၥၭအီၪနီၪလီၫႉဖုဒ့ၩမၩၥၭလၩ့ဂူၬစီၩအၥၭ အၪမၬလါနၫ့ႇ အ့ၪဖုဒ့ၩ ဂဲၫထဲၩ့လၧဆၧနီၫ့ယါနီၪစီၩအၪ့ဂၬဝ့ၫ ဖုဒ့ၩလဆိၩၡၩလီၫႉအ့ၪဖုဒ့ၩဂဲၫထဲၩ့လၧဆၧနီၫ့ယါအခၫ ဖုဒ့ၩအၥၭကဘၪမုၬၡူၪမုၬလၩဝ့ၫ လဆိၩၡၫအကၠီၩ့ႇ စီၩဖ့ၪအ့ၪဖုဒ့ၩ ဆၧအုၩ့လၩ့လီၫႉဘဲၫစီၩအဆၧအုၩ့လၩ့အီၪဝ့ၫအၥိၭႇ (မူၭခိၪဘၩ့မုး)  ဆၧအဲၪဆၧကွံၩ ဘၩ့မုးဖၧၩ့နီၪစီၩကတဲၩ့ဝဲၩထၬအ့ၪ ဖုဒ့ၩ ကအီၪအဂး ဒူၭနီၪလီၫႉ

ဖုဒ့ၩဧ့ႇႉႉဘဲၫယီၩႇ ဖုဒ့ၩကၥ့ၪယၫနၪၥ့ၪ စီၩအဆၧအဲၪယူၭအကၠီၩ့ စီၩစီၩ ဆူနဲၩ့ဝ့ၫလီၫႉဆၧနီၪအကၠီၩ့ႇ လၧပဆၧအဲၪဖိၪႉ

-ပအဲၪနီၪႉႉပမိဖ့ၪအ့ၪအဝ့ၫႉႉ

-ပအဲၪနီၪႉႉပမိမီၪ့ဎီၩ့ ဆၧၥၭမၧၫ့လၧအဝ့ၫႉႉ

-ပအဲၪနီၪႉႉပမိချဲၩ့ဎိၭလၩ့အၪမၬလၧအဝ့ၫႉႉ

-ပအဲၪနီၪႉႉပမိအီၪကၠၧၫ့ကၠၧၫ့လၧအဝ့ၫႉႉ

-ပအဲၪနီၪႉႉပမိအီၪဎုၭလၧအဝ့ၫႉႉ

-ပအဲၪနီၪႉႉပမိထိးထဲၩ့တၩ့ထဲၩ့အဝ့ၫႉႉ

-ပအဲၪနီၪႉႉပမိၥုၪ့မုၬၥၭၡူၪလၧအဝ့ၫႉႉဆၧလဖၪယီၩ မွဲဝ့ၫဆၧအဲၪအစူၪဒီၩ့ (၇) ထံၪအဖၧၩ့ စီၩ့ဖၧၪအ့ၪဖုဒ့ၩန့နီၪလီၫႉဆၧဘဲၫနီၪၥိၭအကၠီၩ့ႇ အ့ၪဖုဒ့ၩအၥၭလၩ့ရၧးအထီး အဂဲးဆါဘၭဆါအထီ စဲၪ့ထၪ့လန့လၧ ဆၧဒဲၭဖၧၩ့ အခၫ ပကိၭဝ့ၫဒၪလၧ (အ့မၫနွ့ၫလၭ)  အအဲၪဆၧၥ့ၪထုၬ လဂၩနီၪ အီၪဝ့ၫလၧဖုဒ့ၩအနဲၩ့ထ့ၭလဆိၩၡၩလီၫႉဖုဒ့ၩအဆၧဆၫႇ အဖၧၩ့လးလဖၪ ကဘၠၩ့ဘျၪဝ့ၫဒဲ ကဖ့ၪဂဲးဖ့ၪဘၭထၪ့ဖုဒ့ၩႇ ကမၩမုၬမၩၡူၪထၪ့ဖုဒ့ၩနီၪ လၧဆၧဆူနဲၩအဖၧၩ့နၪ့ထၪ့ဘၪ စီၩစီၩ လါဆံၭႉႉ