ဆၧဆူနဲၩလၩ့ၥၭကအီၪထၪ့အဂး ပကမၩကၠၭပၥ့ၪလဲၪ

ပကဲၪၦၡၩလဖၪယီၩ အၪဒၪဆၧနီၪ မွဲပစီၪဆံၭလၩ့ပၥၭၥ့ၪနီၪလီၫႉ အ့ၪမွဲၦၡၩအၪ့မၧၫ့ပၧၩ ဆၧမၩဎိၩဎိၩဒိၪဒိၪကမံၩ့ယူၭ စွါဘဲၫ ပစီၪဆံၭလၩ့ပၥၭဂီၩ့ ပမၩမိဘၧၫ့အ့ၬႉ ပနဲၩလၩ့ပၥၭအ့ၬ  ဆၧနီၪအကၠီၩ့ ပနၫ့ဆါဒၪပၧၩ ဆၧဆူနဲၩလၩ့ၥၭ ကအီၪထၪ့ အဂးနီၪ ပကမၩကၠၭပၥ့ၪလဲၪ ဘၪထွ့ၪလၧဆၧအဂဲးယီၩနီၪ ယအဲၪဒိၭလီၩၥ့ၪယၫအ့ၪဘၪနၥံၪ Myanmar Excellence institute CEO ဆရၫပြည်ခိုင်အဂဲး ကဆံၭနီၪလီၫႉ

အဝ့ၫအဖါဖါနီၪ မွဲလၧၦၥီၪ့လံၬဆရၫကဂၩလီၫႉ ကနံၩအဖါအၪ့မၧၫ့အဝ့ၫ အဝ့ၫကဘၪထၪ့ချဲၩ့လၩ့လၧ အဖါအထံၩ အဖျဲၥံၪအမ့ၬယၫနီၪလီၫႉ အဝ့ၫကဘၪထၪ့ချဲၩ့လၩ့အဂးဖ့ၪလၫ့ထၬအ့ၪအဝ့ၫအခိၪတၩ့နီၪ မွဲလၧ ဆၧၥုၪ့ဎွံၪၥၭယီၫအဂဲးနီၪလီၫႉ အခၫနီၪအဝ့ၫယီၩအၥၭဆံၭဒံၭဒဲ ကဘၪထၪ့ချဲၩ့လၩ့လၧအဖါအထံၩအဖျဲၥံၪအမ့ၬယၫအကၠီၩ့ အဝ့ၫယီၩ အၥၭခိဝီၩနၭလ့ၬတၭ မိထၪ့ချဲၩ့လၩ့ဝ့ၫအ့ၬအဂဲး လီၩထဲးအ့ၪအဖျါအမံၩ့မံၩ့လါနၫ့ အဝ့ၫအဖါဖါနီၪ အၪ့မၧၫ့အဝ့ၫထၪ့ချဲၩ့လၩ့ထၧၩ့အဘၭနီၪလီၫႉ အဝ့ၫကဘၪထၪ့ချဲၩ့လၩ့ကနံၩနီၪ ကဘၪမၩဝ့ၫပၥ့ၪလဲၪအဂဲး အဝ့ၫလၥ့ၪယၫဘၪအကၠီၩ့ အဝ့ၫအဖါဖါနီၪ လ့ၩစံၭအဝ့ၫ နံမွံၫ ထၪ့ထၬ ဘဲၫနီၪလီၫႉ အနီၪအခၫအဝ့ၫယီၩ ခိၭအဖါအၪ့မၧၫ့အၥိၭ လ့ၩထီၩ့လၧဆၧမ့ၬယၫအခၫ အဆိၪထုၬနံမွံၫထၪ့ဒဲ လီၩ့ယိထၪ့ၦၡၩလဖၪအမ့ၬနီၪလီၫ အနီၪအခၫအဝ့ၫအဆၧဆူနဲၩလၩ့ၥၭနီၪ ဂဲၫအီၪထၪ့ကဆံၭဖိၪနီၪလီၫႉ

ဆၧနီၪအကၠီၩ့အ့ၪမွဲပမုလါ ဆၧဆူနဲၩလၩ့ၥၭဂဲၫဒိၪထၪ့နီၪ အဆိၪထုၬ ပကဘၪနံမွံၫထၪ့ ႇ ၂မံၩ့ကမံၩ့နီၪ ပထၪ့ၥဖၠး မွဲဂ့ၩႇ ပထၪ့ဆၧအီၪကီၪ့ဎိၭလၩ့မွဲဂ့ၩ ပကဘၪအီၪဝ့ၫဒၪလၧအမ့ၬယၫထုၬအလးႇ ၃မံၩ့လမံၩ့နီၪ ပကဘၪယိထၪ့ၦၡၩအမ့ၬၥၪ ထံၪထံၪဆၭဆၭဂီၩ့ ပကဘၪချဲၩ့ဝ့ၫဒၪ ပကဘၪအၪ့စၪ့ဝ့ၫဒၪႇ ၄မံၩ့ကမံၩ့နီၪ ပဂၬဖၭအခၫ မွဲပကဘၪဂၬဖၭအဖျဲၪလၧဆၧ ၥုၪ့ဎွံၪၥၭယီၫဖၧၩ့လီၫႉ ပဂၬဖၭဖျူၭဖျူၭဖျါဖျါနီၪဆ့ မွဲဆၧဆူနဲၩလၩ့ၥၭဂဲၫဒိၪထၪ့န့ဆ့လီၫႉ လခဲၫ့ထုၬကမံၩ့နီၪဘိၭ နုၬလၩ့ချဲၩ့ဎိၭ လၩ့လၧဆၧအလး ကိၭစီၪအဖၧၩ့နီၪဆံၭႉ ဘၪထွ့ၪလၧထံၪဂဲးခးဂဲးမွဲဂ့ၩ ဒိၩ့မုတဝၫ့အဂဲးမွဲဂ့ၩ ဆၧဖံၭဆၧမၩအဂဲးမွဲဂ့ၩ ဂံၪ့ဒီၪ့အ ဂဲးမွဲဂ့ၩနီၪ နုၬလၩ့ချဲၩ့ဎိၭလၩ့လါဆံၭ အနီၪစွါဘဲၫပနၫ့ဆါဒၪပၧၩ မွဲဆၧဆူနဲၩလၩ့ၥၭကဂဲၫဒိၪထၪ့နီၪလီၫႉ

ဆၧအဂဲးလဖၪယီၩနီၪ မွဲဆရၫ ပြည်ခိုင် ဖ့ၪကိၪ့ဖ့ၪတဲၩ့ထၬပၧၩဒဲ ဘဲၫအဝ့ၫကကဲၪထၪ့ ၦလၧအလီၩလၩ့လါလၩ့ဆၧ လၧဆၧဆူၩနဲၩလၩ့ၥၭအီၪဝ့ၫအဂး အဝ့ၫဂဲၫထဲၩ့ၥိၭထၬဝ့ၫဒၪ အကၠီၪအဖျီၩ့လဖၪနီၪ ယအၪ့နၩ့ဖ့ၪၥ့ၪယၫစိၩထဲၩ့နၥံၪလၧ ဆၧအဲၪ ဆၧကွံၩအဖၧၩ့နီၪလီၫႉ

နးအဲၪဖီၫဘွၩ