ဆၧချဲၩ့လၧ လန့ခိးန့တၩဘၪလဖၪနီၪ ယိဖၭခွံၬလါဆံၭ

ပကဲၪၦၡၩလဖၪယီၩ အၪဒၪဆၧ ဆၧချဲၩ့လၧ လန့ခိးန့တၩဘၪလဖၪနီၪ ပခိၭနၪဂီၩ့ ပထံၭလၩ့ထၬလၧ ပခိၪ နူၬဖၧၩ့ၥ့ၪနီၪလီၫႉ အၡါမၪ ဆၧချဲၩ့ဘဲၫနီၪလဖၪနီၪ ပဘၪထံၭလၩ့ထၬလၧပခိၪနူၬဖၧၩ့ မွဲလလိၪဘၪဒဲ ပကဘၪယိဖၭခွံၬ ဝ့ၫခီၫႉ ပဆၧၥၭမၧၫ့ဖၧၩ့ ကယဲပနါဂၧၫ့ဘၪ ဆၧချဲၩ့လဖၪနီၪ ဘဲၫပဘၪချဲၩ့ဆၧၫ့ထဲၩ့ လလိၪဘၪအၥိၭ ပဘၪကိၩ့လၩ့ခိၪ ထိးဆ့ မွဲလလိၪဘၪလီၫႉ

ၦၡၩအဆၧချဲၩ့ကနၩ့နၩ့ ပဘၪချဲၩ့ဆၧၫ့ထဲၩ့လလိၪဘၪဂီၩ့ ထဲၩ့ဂီၩ့လီၩ့ဒၪဝ့ၫဘနီၪ မွဲအီၪဆ့ႉ ဘၪကကၠၪကၠၪ ပချဲၩ့ဆၧၫ့ထဲၩ့မၬ ဒံၩ့ဘံၪဘူၪထၪ့အၥၭဘနီၪ ကဲၪၥ့ၪလီၫႉ ပဘၪလီၩ့ခိၭနၪဆၧချဲၩ့ထီးလူၬလဖၪ လလိၫဘၪဒဲ အကၧၩ့ ဒိၪနီၪ အီၪဒၪ ပဘၪမၩအီၪလဖၪ ပကဘၪမၩထၪ့နီၪလီၫႉ

အ့ၪမွဲပဆၧဖံၭဆၧမၩတီၩလီၩ့နီၪ ပဘၪချဲၩ့လလိၪဘၪ ဒဲ ဆၧဖံၭဆၧမၩနီၪ ကချဲၩ့ထၪ့လၧပဂးလီၫႉ ဘဲၫနီၪအ ၥိၭ ဆၧချဲၩ့ကနၩ့နၩ့နီၪဘိၭ ပဘၪလီၩပျၩ့ဖ့ၪနဲၪထဲၩ့လိၫဝ့ၫဒၪနီၪလီၫႉ ပလီၩ့ပျၩ့ဖ့ၪနဲၪထဲၩ့နီၪ လမွဲဘၪပချဲၩ့ဆၧၫ့ထဲၩ့တၭ ပလီၩ့ပျၩ့ဖ့ၪနဲၪမၬ အဝ့ၫၥံၪကၥ့ၪယၫထဲၩ့ ဂဲးဖးတၡါလဖၪဂီၩ့ ကကဲၩ့ဒဲကကဲၩ့ ဆၧန့ခိးန့တၩလဖၪ လလၩ့မါလၧၩ့ ဘၪတၭ ဆၧနၪၥ့ၪလိၬၥၭ ကအီၪထၪ့ထဲၩ့နီၪလီၫႉ ဆၧနီၪအကၠီၩ့ ဆၧချဲၩ့ကနၩ့နၩ့နီၪ မွဲပကဘၪ လီၩ့ပျၩ့ဖ့ၪနဲၪထဲၩ့ လၧ ဆၧၥုၪ့ဆၧၩ့ၥၭဆၧၩ့အဖၧၩ့ လိၫဝ့ၫဒီၭလီၫႉ

အကၧၩ့ဒိၪထုၬနီၪဘိၭ တခၩဆၧချဲၩ့ကဂဲၫနးမံၩ့ ပကဘၪထိးဆၧၫ့ထၧၩ့အန့ဂီၩ့ အ့ၪမွဲအခိးအတၩ အီၪလၧ ပဂးနီၪ ပကဘၪထိးဆၧၫ့ဒဲ အ့ၪမွဲလန့ခိးန့တၩဘၪနီၪဘိၭ ပကဘၪယိဖၭခွံၬနီၪလီၫႉ ဂၪ့ခိၪချိၫ့ဖၧၩ့ယီၩ တခၩပမၩ ဆၧဂ့ၩဂ့ၩနီၪ ဆၧချဲၩ့အၧၩ့လဖၪနီၪကဂဲၫဆီးပၧၩႉ ၦအအၧၩ့လဖၪအအီၪ ဆၧချဲၩ့ဖျိၪ့အဎံၪအလၩလဖၪ မွဲအီၪဆ့အကၠီၩ့  အ့ၪမွဲပကလီၩ့ခိၭနၪဆၧချဲၩ့ကိၭမီၪ့စွါဘဲၫ အနီၪ ကမွဲဒၪပဆၧဘၪမၪလီၫမွွဲအ့ၬဧၪႉ

မနာပဒါယီ အရှင်ဝိစိတ္တ (ဒိုက်ဦး)