ခိၭၥၧၫ့နံၩ

ပအီၪလၧဂၪ့ခိၪချိၫ့ယီၩအထီ ပဘၪဒၪဝ့ၫထၧၡၪ့ဆၧနၭဆၧကၪထၧဂဲၩအၪအၪနၭနၭလ့ၬလီၫႉ ကကၠၪကၠၪတၭ အ့ၪဆၧဖံၭဆၧမၩလကဲၪထၪ့ဘၪမွဲဂ့ၩႇ မၩထၪ့ဘၪ ဆၧဘၪမၪလမံၩ့မံၩ့မွဲဂ့ၩႇ ၦဂူၫဂၩ့ၥံၪ ၥူၭဝံၪၥူၭလၩဆၧၥ့ၪအၪမၬနီၪလီၫႉလနၩ့နၩ့ဘၪဒၪခီၩ့ဆၧၫ့ယၫ ဆၧကၪဆၧဂဲၩ ဆၧလဖၪနီၪတၭအၥုၪ့ၥၭဂၭဂီၩ့ဒဲလကၭဘၪ ၦလနၩ့နၩ့မၩ့ၥံၫလၩ့အၥၭၥ့ၪနီၪလီၫႉ

အဲၪကွံၩ့ဘၪထၧၫ့ဖုဝဲမုၪခွၫထံၩ့ၥိၭၥံၪဧ့ႇ ပဘၪဒၪခီၩ့ဆၧၫ့ယၫဆၧကၪဆၧဂဲၩမွဲဂ့ၩႇ ၦလဖၪၥံၪ ၥူၭဝံၪၥူၭလၩလၧၩမွဲဂ့ၩႇ ပလအဲၪဒိၭဘၪလါနၫ့ႇ ကြၨၭၥုၪ့ဂၭဂီၩ့ၥၭဂၭဂီၩ့လအီၪဘၪဒဲဆၧၥုၪ့လၩ့ဂီၫ့ၥၭလၩ့ထီၫ့ဆ့ႇ ကြၨၭလအီၪဘၪနီၪလီၫႇ ဆၧဘဲၫနီၪၥိၭထၭႇ ပယၩ့အဆၧချဲၩ့ဒီၩ့အီၪဝ့ၫ ၦအၪ့အူၭနၧၩ ကနၧၩ့ဝ့ၫ နွ့ၫၥၫ့ႇ အ့ၪအၪ့ကီၫနီၪဆ့ ကနၧၩ့ဝ့ၫဒၪနွ့ၫၥၫ့လီၫႇ အခံၫ့ဘၪနီၪ အနိၭကဖီၭဘံၭထၬအၥၭလီၫႉ ခိၪလၩဘွၩခီၫႇ ဆၧချဲၩ့ယီၩကွ့ၭထၬဝ့ၫ (Wait for three days) ခိၭၥၧၫ့နံၩ နီၪလီၫႉ

ကကၠၪအိၩႇ မုအဆၧခိဎံၫလၩဝ့ၫအတုၬမုနံၩကနံၩနီၪ ၥၫ့ခၫလဂၩလၧဆၧၥုၪ့ဎွံၫၥၭထိၭအဖၧၩ့ စဲၪ့ထၪ့ဂၭဖၭဝ့ၫဒၪလၧ အကၠီးဝးဖၧၩ့နီၪလီၫႉ အနီၪတၭႇ လၧအကၠီးဝးႇ အခိၪထိၬနီၪ အဝ့ၫဒၪထၪ့ ၦအၪ့ဆၫဖီၫ ဖံၫမုၪၡါလဂၩနီၪလီၫႉ အဝ့ၫအမ့ၬအနၪနီၪၡါယူၭလါနၫ့ႇ အဆၧၥိၭဆၧကီၩ့ႇ အဆၧနံမွံၫလဖၪနီၪ  မၩလၩ့ဘၪ့ အဝ့ၪနီၪလီၫႉ

ၥၫ့ခၫလဂၩ ယိထၪ့ဖံၫမုၪၡါနီၪအထီ နံထၪ့ဂီၩ့စံၭထၪ့ဝ့ၫ မိဂါဧ့ႇ ကနံၩယီၩနမုၬလၩၥၭဎွံၫမၬလဲၪႉႉနနံနၧၩ့ႇ နချဲၩ့နၧၩ့ႇ ဒဲလကၭဘၪ နဆၧၥိၭဆၧကီၩ့နီၪဆ့ႇ ဖဲးထၪ့ဒဲအၪမၭ ဘဲၫပမ့ၭၥၪဎံၩ့နဲၪႉႉ အနီၪတၭႇ ဖံၫမုၪၡါယီၩ စံၭထဲၩ့ဘၪဝ့ၫ မွဲမၩ့ကၠဲၭဧ့ႇ ဆၧဆီၪ့ဆၧချဲၫ့အီၪထီးလူၬဘိၭ ပၥၭဎွံၫန့လၥၨၩႇ ၥၫ့ခၫနီၪ ဖျါလၩ့အခိၪယူၬယူၬႉႉတၭ စံၭဆၧၫ့ထဲၩ့ဘၪဝ့ၫ မိဂါဧ့ႇ နဂဲၫ အၪ့ဆၫဖီၫလၧယီၩ ယံၬဝ့ၫအၪနံၪ့အၪလၩယူၬႇ ယဒၪနၧၩကိၭကၠၪ နနံနၧၩ့ကိၭကၠၪနဲၪႉ ယဒၪနဆၧၥုၪ့အုၭၥၭအုၭအီၪပနီၪနးကၠၪအ့ၬႉႉ လၩ့ဂၭဆၧၡၪ့ဆၧနၭ နထိးဆၧၫ့န့ဧၩဘိၩႉႉ လၧမွဲဘၪ နဒၪဆၧၡၪ့ဆၧနၭ ဎိၩဎိၩဒိၪဒိၪနးကၠၪအ့ၬဧၪႉႉ ဖံၫမုၪၡါယီၩ နါဂၧၫ့ဘၪဆၧချဲၩ့နီၪတၭ နံဝ့ၫဒၪ လၩ့ချုၭလၩ့ဒၪနီၪလီၫႉ ဂီၩ့ကကၠၪတၭႇ စံၭဆၧၫ့ထဲၩ့ဘၪဝ့ၫႉႉအီၩႉႉကၠဲၭဧ့ႇ ပခိၪဘွၩၥွၫဖိၭယူၭမၬ ပဒၪခီၩ့ဆၧၫ့ယၫ ဆၧကၪဆၧဂဲၩ ဆၧၡၪ့ဆၧနၭအ့ၬနီၪ ဘၪကအီၪၥ့ၪဒံၭဧၪႉႉလါနၫ့ဂ့ၩႇ အ့ၪယဒၪခီၩ့ဆၧၫ့ယၫ ဆၧကၪဆၧဂဲၩကကၠၪ ယအီၪက့ၪထယၥၭ မွဲမုကနံၩယီၩ အၥၧၭနံၩ ဖၭဒိၪလီၫႉမုနံၩအနီၪ ကဆါဎရံၬဘၪထိးၥံၫအၥၭလၧ ထုၪ့စူၪယၫလီၩ့အမုနံၩဘီၩႉႉ

ကဆါဎရံၬဘၪထုၬဆၧဖျၩထၪ့ လၧထုၪ့စူၪယၫလီၩ့ ဘၪၥံၫဝ့ၫမုနံၩနီၪ အၥၧၭမုနံၩ ဖၭဒိၪလီၫႉဂၪ့ခိၪချိၫ့ယီၩ ဆၧယိလါလၩ့မါဝ့ၫဘဲၫမုနံၩအနီၪ ကအီၪဒံၭဧၪႉႉလါနၫ့ဂ့ၩႇ ဖီၩ့ခွံၬဝ့ၫၥၧၫ့နံၩဂီၩ့ကကၠၪ ထီၩ့ထဲၩ့ အံၫစတၫမုနံၩဘီၫႉႉမုနံၩအနီၪ ကဆါဎရံၬ မၧၫ့ထၪ့ယူၬႉႉလၧဂၪ့ခိၪချိၫ့ယီၩ ဆၧယိလါ အၥၫ့ အီၪထၪ့ထဲၩ့နီၪ မွဲဆၧမုၬလၩၥၭဎွံၫ ကအီၪဝ့ၫဘဲၫၥ့ၪလဲၪႉႉစံၭဝ့ၫဘဲၫနီၪၥိၭလီၫႉ

အဲၪကွံၩဘၪထၧၫ့ဖုဝဲမုၪခွၫထံၩၥိၭၥံၪဧ့ႇ မွဲဝ့ၫဖံၫၥၭၡါ အဆၧချဲၩ့ယီၩ ပကဘၪအၪ့န့ထၪ့အဒီၩ့ဂီၩ့ ပကဘၪနၪ့ထၪ့ထဲၩ့ကဆါဎရံၬ အဆၧအဲၪကွံၩနီၪလီၫႉ အ့ၪပဒၪခီၩ့ဆၧၫ့ယၫ ဆၧကၪဆၧဂဲၩႇ ဆၧၡၧၫ့ဆၧနၭလမံၩ့မံၩ့ယူၭစွါဘိၩႇ မုကနံၩယီၩ မွဲဝ့ၩအၥၧၭမုနံၩဖၭဒိၪနီၪလီၫႉထိးဆၧၫ့ထၬဆံၭႉႉအယံၬထုၬၥၧၫ့နံၩလီၫႉအံၫစတၫ မုနံၩကထီၩ့လီၫဘီၩႉႉပဆၧယိလါ လလၩ့မါဘၪဒဲ ပကဘၪခိၭဝ့ၫဒၪၥၧၫ့နံၩလီၫႉ အ့ၪပအၪ့န့ထၪ့ပဂဲးဘဲၫနီၪကကၠၪ တခၩဒၪဆၧကၪဆၧဂဲၩ ဆၧၡၪ့ဆၧနၭႇ ဆၧၥၭမဲၪၥၭဖျဲၩ့ ဆၧနးမံၩ့ နၧၩ့ထၪ့ပၧၩန့အ့ၬလီၫႉအၪ့ဝၬထၪ့ပၧၩ န့အ့ၬလီၫႉ

ၦလၧဘၪဒၪခီၩ့ဆၧၫ့ယၫဆၧကၪဆၧဂဲၩ ဆၧၡၪ့ဆၧနၭလဖၪအထီ ကဆါယွၩကဆီၫ့မီၫ့ဆီၫ့မၬႇ ကမၩဆၧၩ့ထၪ့အဂး အီၪခိၭယိလါဝ့ၫနီၪလီၫႉ

မုၪခီၩလဲးနီၪ အ့ၪမၩဒူၪမၩဒၪပၧၩတၭႉႉအယံၬထုၬန့ၥၧၫ့နံၩလီၫႉ အ့ၪၥၧၫ့နံၩဖီၩ့ထၪ့နီၪႉႉႉ

Add new comment

5 + 8 =