ၦမုၪနၩ့ဎံၪလၩဒဲ ဖူၫထၪ့ၦၡၩ (၃)

ၦမုၪဖိၪနံဝဲၫ့လၫ့ကၫကၫတၭ နဲၪစိၩအစူၪနိၩ့ဖိၪခီၫ ချဲၩ့ဆၧဘယီၩခီၫႉႉႉဝ့ၩ နအီၪလၩ့ဆိၭလၩ့ဆဲၩဘယီၩနီၪ နကလ့ၩဒၪ ယမိယဖါပၥ့ၪလဲၪႉ အဝ့ၫၥံၪ ကထုၪ့ဘံၩခွံၬနၧၩ တၡါလ့ၬႉ နကဘၪလ့ၩၥိၭန့ ဆဲၫ့ၥံၪ ၡၪ့ၥံၪမၬဆံၭ ကဂ့ၩလၥၨၩႉ

နါဂၧၫ့ဘၪဆၧချဲၩ့ၥံၪယီၩတၭ ဖူၫထၪ့ၦၡၩယီၩ မ့ၬမဲလၩ့အၥၭဒိၪဒိၪလ့ၬႉ ခဲၫ့ကံၭ ၦမုၪနၩ့ဖိၪယီၩ အမိအဖါၥံၪ လထိးဆၧၫ့ဘၪအဝ့ၫတၭ အမ့ၬလၩ့ယၧၫ့ခွံၬကထုၪလီၫႉ ၦမုၪဖိၪ ချဲၩ့လၫ့ဒီၭ လါနၫ့ဂ့ၩ အ့ၪနဂဲၫထဲၩ့ဆိၬန့အ့ၪယၧၩ ပထုၪ့အမုအၪအၪနီၪ ယကထၭအ့ၪနၧၩ ဆဲၫ့နးဘံၪ့ ကိဆၧဖၩ့လၫ့ခိၬ ဂဲၫထဲၩ့ထ့န့အ့ၪယၧၩအီႉ

ဖူၫထၪ့ အၥၭဎွံၪထၪ့ဎွ့ပၥ့ၪလဲၪနီၪ ယလီၩ့မိၥ့ၪထီးယၫလၧၩ့အ့ၬဘယါႉ ဆၧမုၬအၥၭနၭလၨ အီၪကယုကစုၩန့လၧၩ့အ့ၬႉ ထၪ့စဲၪ့လၩ့ ထၪ့စဲၪ့လၩ့လၧ အၥံၪ့ဖၭဒိၪအလီၩ့နီၪ ကနၩခၧၩ့နၩႉ တၭကလၭ ဆၧဖၩ့လၫ့မိချုၬအ့ၬ ဖူၫထၪ့လ့ၩစဲၪ့ထၪ့ လီၩ့ဎွါပထုၪ့အမုၥံၪလ့ၬႉ ပထုၪ့အမုၥံၪကဲၪထၪ့ လအိၩကဝၩ့ လယီၩကဝၩ့ လၧခိၪလီၩ့ခၪ့ထံၭဝၫဝၫနီၪႉ မွဲလၧဆၧယီၩလၫ့ထီအခၫအကၠီၩ့ ပထုၪ့မုၥံၪနီၪအီၪအဖူၪအဖီၫ ဘွၩဝီၩဝီၩဖိၪၥံၪယူၭႉ ဖူၫထၪ့ဖၭဒိၪယီၩ ကန့ဘၪအမၪဂ့ၩဂ့ၩဖိၪလီၫဘိၭ လ့ၩဆၧဎံၩ့လးဂီၩ့ ဒၪမွံၪစိၩအတလၭမူၭမုၪအလီးဖိၪနီၪ လီၩ့ထ့ၬပထုၪ့မုၬမုၬလ့ၬနီၪလီၫႉ