ၦဖျိၩ့ဆၨၩဖိၪၥံၪ အအီၪလၧ ၥဲၫ့ထံၫခးလဖၪဒဲ ၦဖျိၩ့ဆၨၩအဂဲး (၃)

ဖိၭဘိၭ နံၪ့ ၁၉၇၀နီၪ ၥဲၫ့ပကိၪ့ၥ့ၪလဖၪ ၦဖျိၩ့ဆၨၩဖိၪၥံၪလဖၪအဖၫ့ခိၪ စၭထၪ့အၪ့ဎၬထၪ့ဝ့ၫဒၪ နၭထၪ့နီၪလီၫႉ လၧခၠ့ၩမဲၫ့နီၪ ဖိၬလိၬဝဲထၪ့ထၬ ဘၪထွ့ၫလၧဆၨၩဆၬဆၧလီၩ့ဎွါအၪ့ဎၬလးကျဲၩ့ ကဒုၩနီၪလီၫႉ စၭထၪ့လၧအထီနီၪ ၥဲၫ့ပကိၪ့ၥ့ၪလဖၪ လ့ၩစဲၪ့လၩ့ အၪ့ဎူၪအၪ့ဎၬဆၧလၧ ၦဖျိၩ့ဆၨၩဖိၪၥံၪလဖၪ အီၪအလးအကျဲၩ့ႇ လ့ၩအၪ့ထုၪ့ၡၩအဆၧဝံဆၧနၭၥံၪလဖၪ မၩထၪ့ဝ့ၫဒၪနီၪလီၫႉ ဘဲၫၦဖျိၩ့ဆၨၩၥံၪလဖၪ အီၪလၧ ခးပယၩ့ယီၩအၥိၭ ဖျိၩ့ၥံၪအအီၪလၧ ၥဲၫ့ထံၫခးၥံၪလဖၪနးဆ့ အီၪဘူၭလၧ ၥဲၫ့ဆၨၩၥံၪ ၦဖျိၩ့လဖၪနီၪ အီၪဘဲၫၥိၭၥဲၫ့ဆၨၩၥံၪနီၪလီၫႉ ဖျိၩ့ဆၨၩၥံၪအအီၪလၧ ရၭဘူၫရံၫနီၪ ဘၪအီၪကၠၧၫ့ကၠၧၫ့ဝ့ၫဒၪလၧ ၥဲၫ့ဆၨၩၥံၪနီၪလီၫႉ ၥဲၫ့ ဒဲ ၦဖျိၩ့အကျၩ ဆၧကၪဆၧဂဲၩ အီၪနးမံၩ့အ့ၬႉ ၥဲၫ့ဆၨၩဖိၪၥံၪအၪဒၪဆၧနီၪ အီၪက့ၪၦဖျိၩ့ဆၨၩဖိၪၥံၪလၧ အဘူၭအထံၭနီၪလီၫႉ လါနၫ့ ၥဲၫ့ခး လံၩခံၫကကဲၩ့ခီၫ ၥဲၫ့ဒဲ ၦဖျိၩ့အဆၧဖံၭၥိၭနီၪ ၥဲၫ့ၥံၪနီၪ မိစီၪဆံၭ ဖျိၩ့ဆၨၩဖိၪၥံၪနီၪလီၫႉ ၥဲၫ့ၥံၪနီၪ စီၪဝ့ၫ ၦဖျိၩ့ၥံၪနီၪ အဆၧကိၪ့ၥ့ၪကိၪ့ဘၪၡၩ ႇ ချဲၩ့ ၥဲၫ့ဆၧချဲၩ့ ဘၪဂ့ၩဂ့ၩအ့ၬ ႇ ဆၧအီၪဆံၪ့ဖျ့ၪၡၩဝ့ၫဒၪၦလၧအီၪလၧ ၡိၬကျၩ ႇ မွဲၦလၧလမွဲဘၪဘုၭဒၭ ဆၧဘိၪ့ဆၧဘၩဖိၪၥံၪအကၠီၩ့ စီၪ့ဆံၭဝ့ၫဒၪၥ့ၪနီၪလီၫႉ လါနၫ့ အီၪလၧၥဲၫ့ခး မိၫ့ဆၨၩၥံၪလဖၪနီၪ မွဲလမီၫ့ဎီၩ့ဘၪလၧ ၥဲၫ့ၥံၪတၭ မိၫဒဲ ၦဖျိၩ့ အဆၧဖံၭၥိၭမုၬဂ့ၩမၬနီၪလီၫႉ

ဖျိၩ့ၡိဒဲ ဖျိၩ့ၡၩ့နီၪ မွဲၦဖျိၩ့ဆၨၩအရ့ၩဒိၪထုၬ ဆၨၩဆၬနံၫမံၩ့ဂီၩ့ အီၪအလးအကျဲၩ့ လမီၪ့ဎီၩ့ဘၪအကၠီၩ့ ဂဲၫကဲၪ့လၫ့ထဲၩ့ ဆၨၩဆၬဖိၪၥံၪအၪမၬနီၪလီၫႉ ပအၪ့နၩ့ထၪ့ ကန့လၧ ခိၪလီၩ့ခိၪ ဖျိၩ့ၡိဒဲ ဖျိၩ့ၡၩ့ ဒဲ ဖံၬဒၩလး ဖျိၩ့ၡိဒဲ ဖျိၩ့ၡၩ့နီၪလီၫႉ ဖျိၩ့ဆၨၩၥံၪအအီၪလၧခိၪလီၩ့ခိၪလဖၪ အဆၧဆၧးဎံၫဆၧးလၩၥံၪနီၪ မွဲလၩ့ဘူၭထဲၩ့လၧ ၥဲၫ့ဆၨၩၥံၪလဖၪဒဲ အီၪလၧဖံၬဒၩလး ဖျိၩ့ဆၨၩလဖၪၥံၪနီၪဘိၭ အဆၧဆၧးဎံၫဆၧးလၩလဖၪ မိလဲၩ့မွံၩထၪ့အၥၭလၧ မိၫ့ ဒီၩ့ဝိၩ  အလုၫအလါနီၪလီၫႉ ဖျိၩ့ၡၩ့အီၪလၧခိၪလီၩ့ခိၪ လဖၪ ဆၨၩဒီၪ့ကဒီၪ့ဒဲကဒီၪ့ ဘၪလ့ၩကၪဂဲၩအကၠီၩ့တၭ ၥိၩ့ထၪ့ လၨၪဆၧချဲၩ့မီၪ့ဎီၩ့လူၬအ့ၬနီၪလီၫႉ ဘဲၫနီၪအၥိၭ ၦဖျိၩ့ၡိၥံၪအီၪလၧ ဖံၬဒၩလးကကဲၩ့မွဲဝ့ၫ ထံၫထၪကျိၩ့ ဒဲ ၥထိၫ့ လဲၫ့ဘွဲ ဖျိၩ့ဆၨၩမီၪ့ဎီၩ့ လၨၪဆၧချဲၩ့ အလူစဲၪ့ထၪ့ မိမီၪ့ဎီၩ့အ့ၬနီၪလီၫႉ ဂီၩ့နီၪ အီၪလၧ ၥဲၫ့ခး ဖျိၩ့ၡၩ့လဖၪဒဲ အီၪလၧ ခးပယၩ့ ဖျိၩ့ၡၩ့လဖၪ နးဆ့ မီၪ့ဎီၩ့အဝ့ၫၥံၪနီၪလီၫႉ ၦလၧအီၪဘူၭလၧ ၥဲၫ့ဆၨၩၥံၪလဖၪနီၪ ထိးဆၧၫ့ၥဲၫ့အလုၫအလါနီၪလီၫႉ အဆိၪထုၬ ၦလၧဝံထၪ့နဲၪဖျီၪ့  ၦဖျိၩ့ဆၨၩဖိၪၥံၪနီၪ မွဲ အမ့ၫရံကၫ့န့ခၠ့ၫ ဆၧအီၪကီၪ့ဆရၫ ဖရၫ့စ့ၭမ့ၫဆၫ့ နီၪလီၫႉ အဝ့ၫလီၩ့အၪ့ဎၬထၪ့ၦဖျိၩ့ဆၨၩဖိၪၥံၪဂီၩ့ ကွ့ၭနဲၪ့ထၬဝ့ၫနီၪလီၫႉ ၦဖျိၩ့ဆၨၩဖိၪၥံၪအီၪအအၪထုၬလးကျဲၩ့နီၪမွဲ ဖျိၩ့ဆၨၩခးဒီၪ့ဒဲ လၧခဲၫ့ဖျိၩ့ဆၨၩဖိၪၥံၪအီၪအအၪထုၬလးကျဲၩ့ကဒုၩနီၪမွဲ ပထံၫထၪကျိၩ့ ခးဒီၪ့လးဝၩ့ဖၭဒိၪနီၪလီၫႉ