လူဆၧချဲၩ့ကိၪ့ၥ့ၪလၧ ၦဖျိၩ့အခၪ့ထံၭၥၫ့

ထၧၫ့ဖုဝဲထံၩၥိၭဖျိၩ့ဖိၪၥံၪဧ့ ႇ ဂၪ့ခိၪချိၫ့ယီၩ ၦၡၩၥံၪချဲၩ့ လူဆၧချဲၩ့ ဖိၬဘိၭ (၇၀၀၀) နီၪ မအီၪဂဲၫကဲၪထၪ့အခံၫ့ပၥ့ၪလဲၪယူၭလဲၪ ဆၧအၪ့စၪ့ယီၩနီၪ ကဘၪစံၭဆၧၫ့ဝ့ၫကကၪလီၫႉ  လါနၫ့ဂ့ၩ လူဆၧချဲၩ့ကိၪ့ၥ့ၪအၪဒၪဆၧနီၪ ထယၬထၬဝ့ၫ ဆၧလၧၦၡၩၥံၪနီၪ စၭထၪ့ချဲၩ့လူဆၧချဲၩ့ခီၫလၧ ထီဘဲၫယီၩၦၡၩ(ဟိုမိုဆေးပီးယမ်း)  လအီၪဒံၭဘၪ ဖီၩ့ခွံၬနံၪ့ (၆၀၀၀ ဒဲ ကခွးအထီ)  အီၪဝ့ၫဒၪ ဟိုမိုအီရပ်တပ်(စ်) ၦၡၩအထီဒံၭဒၪအိၩယူၭနီၪလီၫႉ အဝ့ၫၥံၪ စၭထၪ့ချဲၩ့ၥၫ့လူဆၧချဲၩ့အိၩနီၪ    ချဲၩ့ဝ့ၫ ကမီၪ့ နံၫမီၪ့ မွဲလထီၩ့စိၩဒံၭဘၪ လၧ ဆၧချဲၩ့ဖျီၩ့အလၧၫ့အဎွ့ၩဒံၭနီၪလီၫႉ ဆီၪ့မီၪ့ဝ့ၫလၧ ကမွဲ နဲၪစူၪနဲၪခၪ့ လူဆၧချဲၩ့ (Sign Language)နီၪလီၫႉ လူဆၧချဲၩ့လဖၪနီၪ အခံၫ့ယံၬနံၪ့ဂဲၫအၪထၪ့အခၫ အလးအကျဲၩ့လမီၪ့ဎီၩ့လၧၩ့ဘၪအကၠီၩ့ လူဆၧချဲၩ့မီၪ့ဎီၩ့လူၬလၧၩ့အ့ၬႉ ၦဖျိၩ့ဆၨၩဖိၪၥံၪအီၪအလး ခးအ့ၩၡၩလံၩထံၭမုထၪ့ကကဲၩ့ခီၫ အီၪလၧ မလ့ၩၡၩ ႇ အ့ၩဒိၫနံၩၡၩကျိၩ့ ြသစရိုနီးရှန်း ခရၧၫ့ဖၧၩ့ လူဆၧချဲၩ့လဖၪ ဂဲၫအီၪထၪ့ဂုနီၪလီၫႉ

ဆၧလၧလူဆၧချဲၩ့ကိၪ့ၥ့ၪနီၪ ဆၧလီၩ့ဎွါမၩဖျီၪ့ထၪ့ ၦၡၩဆၨၩလဖၪဂဲၫအီၪထၪ့ဖးဖီၩ့အနိၪ့နီၪ အရ့ၩဒိၪဝ့ၫဒၪ ဆၧကိၪ့ဘၪကိၪ့ၥ့ၪ ကမံၩ့နီၪလီၫႉ ဘဲၫ အာရိယန် ဒဲ ဉရောပ လူဆၧချဲၩ့မီၪ့ဎီၩ့အီၪအၥိၭ ၦဖျိၩ့ဆၨၩနးဆ့ လၧတရူၭလူဆၧချဲၩ့ ဆၧချဲၩ့ဖျိၪ့လဖၪ ႇ အလူစဲၪ့ ထၪ့လဖၪ မီၪ့ဎီၩ့အကၠီၩ့နီၪ လူဆၧချဲၩ့ကိၪ့ၥ့ၪလဖၪ ထုၪ့အၥၭနီၪလီၫႉ (ဧကဝဏ္ဏ)  လူဆၧချဲၩ့အၪဒၪဆၧနီၪ မွဲအီၪလၧ တရူၭဒဲ ဖျိၩ့ဆၧချဲၩ့နံၫမံၩ့အကျၩလီၫႉ ပအၪ့ဎၬထိၪထၧၫ့ဎီၩ့ ့ ဘၪထွ့ၫလၧအခံးအဂၩ့ ႇ ဘၪထွ့ၫလၧအၥုၪ့အၥၭ ႇ လုၫလါထူၫရူၫလဖၪနီၪဂီၩ့ ၦဖျိၩ့ဆၨၩလဖၪအခၪ့ထံၭၥၫ့အီၪအလးနီၪမွဲ ခးတရူၭအကျၩနီၪလီၫႉ မ့စတၫ လိၫဂၫ့နီၪ အၪ့ဎၬထၪ့ ဖျိၩ့ၦၡၩအဂဲးကိၪ့ၥ့ၪဂီၩ့ လီၩထၬဝ့ၫ ၦဖျိၩ့ၥံၪနီၪ မိမီၪ့ဎီၩ့လၧ အီၪလၧတံဘဲခိၪလီၩ့ ယုမၭအဆၨၩၥံၪနီၪလီၫႉ အီၪဂဲၫစဲၪ့ထၪ့လၧ ယုမၭဆၨၩဖၧၩ့တၭ ကဆၫ့ဘၪကဆၫ့ ဂဲၫထီၩ့လၧ ခးပယၩ့အခၫ ကဲၪထၪ့ထဲၩ့ ဖျိၩ့ဆၨၩအကၠီၩ့ လီၩ့ထၬဝ့ၫဒၪနီၪလီၫႉ

(၁၉) ယၩနံၪ့အလးခဲၫ ဘဲၫလူဆၧချဲၩ့ကိၪ့ၥ့ၪလဖၪ လီၩထၬဝ့ၫအၥိၭ ဖျိၩ့ဆၨၩနီၪ မွဲၦကိၭဝ့ၫ တူရာနိုစင်သီယာ တရူၭ- တံဘဲခရၧၫ့ဖၧၩ့ လူဆၧချဲၩ့ကမံၩ့နီၪလီၫႉ တရူၭဒဲ ဖျိၩ့နီၪ ခရၧၫ့အၪ့နၩ့လၫ့အၥၭ နံၫခရၧၫ့ဂီၩ့ ဖျိၩ့ၥံၪနီၪ မွဲဆုးလ့ၩအီၪထဲၩ့လၧ လံၩထံၭခီၫနီၪလီၫႉ လီၩထၬဝ့ၫဒံၭလၧ ဖျိၩ့ၥံၪနီၪ မွဲအဝဲခွၫဒဲ တရူၭၥံၪနီၪ မွဲအဖုခွၫနီၪလီၫႉ လကၭဒံၭဘၪ တရူၭအလုၫလါထူၫရူၫ လနၩ့ဆ့ မွဲမီၪ့ဎီၩ့ဒၪလၧ ဖျိၩ့ဆၨၩလီၫႉ စံၭမၬချၭ - ဘိၪ့ထၪ့ဘၩထၪ့ ဖံၫဖူၫၥံၪအဝံၪအလၩ ႇ ၦအစွၪနီၪဂူထၪ့မ့ၪဂီၩ့ ဆၧအၪ့ထုၪ့ဎွံၪ လုၫလါ ႇလၧခဲၫ လ့ၩအီၪက့ၪထၬထဲၩ့ဆၧအၪ့ထုၪ့ဎွံၪလဖၪယီၩလၧ ဎွံၪခိၪလီၩ့လုၫလါၥံၪယီၩ မွဲလၩ့ဘူၭထၪ့ဝ့ၫလၧ တရူၭလုၫလါအၪမၬ အကၠီၩ့ ပဒၪဘၪနီၪလီၫႉ ၦဖျိၩ့ဆၨၩဖိၪၥံၪလဖၪ အလၩ့ဆၫ့ထုၬ အခၨၬကမံၩ့နီၪမွဲ ၥုၭအီၪလးကျဲၩ့ဒဲၦလၧၥုၪ့ဖျၭဆၧၥံၪနီၪလီၫႉ ၦဖျိၩ့ဆၨၩဖိၪၥံၪနီၪ ခးတရူၭ ႇ ကွၫ့ယံၩလး လၧ လၫအိၫ ႇ ဂဲၫနုၬလၩ့လၧၥဲၫ့ခးလံၩခံၫဂီၩ့ ထီၩ့လၧ ခးပယၩ့ တီၫငူၫနီၪလီၫႉ မွဲဆၧဘဲၫနီၪ တီၫ့ငူၫလးကျဲၩ့နီၪ မွဲၦဖျိၩ့ဆၨၩဖိၪၥံၪစၭထၪ့ဂဲၫအီၪဂုအလးဂီၩ့ လၧခဲၫ ပျံၩပျၩလၩ့ထဲၩ့အၥၭလၧ မုနုၬကကဲၩ့ခီၫဒဲ လံၩခံၫကကဲၩ့ ခီၫနီၪလီၫႉ

လူကိၪ့ၥ့ၪလဖၪ လီၩထၬဝ့ၫဒၪ ၦလၧအီၪဘူၭလၧ ဒိၩ့ဝိၩၥံၪနီၪ မွဲ ဖျိၩ့ၡိဖိၪၥံၪနီၪလီၫႉ ဖျိၩ့ဆၨၩအအီၪလၧ ခိၪလီၩ့ခိၪလဖၪဒဲ ဆံၬဖၧၩ့လဖၪ လၧ ဖျိၩ့ၡိ ႇ ဖျိၩ့ၡၩ့ လူဆၧချဲၩ့လဖၪ ဂဲၫလၩ့ဆၫ့နီၪ ပကဒၪဘၪနီၪလီၫႉ