ဘီၪၦၡၩ (၇)

ထၧၫ့ဖုဝဲထံၩၥိၭ ၦလၧအဲၪဒိၭခိၭနၪၦဖျိၩ့ၡါဖိၪၥံၪဧ့ႇ အီၪဆီၪ့အီၪချဲၫ့ကိၭဂၩဒ့ၭနဲၪႉ လၧအဖီၩ့ခွံၬ မုနွ့ၫဒံၭဒၪအိၩ ယအဲၪဒိၭလီၩ ဖ့ၪနဲၪဘၪနၥံၪ ဘီၪၦၡၩၡါဖိၪနီၪထီၩ့လၧ ဘီၪၦၡၩၥံၪကဂဲၫထၪ့အၪ့ကံၩ့နးစ့ၩတၭ ဂါၥၨၫ့ဘံၩစူၭကီၪ့ တဲၩဝဲၩထၬ တဝၫ့ဖိၪၥံၪ-

လၧခဲၫ့ကဂီၩနီၪ ဘီၪၦၡၩၥံၪဂဲၫလ့ၬယါႉ အမိဎွါ ပဒၪဘၪဒံၭအ့ၬႉ နါဂၧၫ့ဘၪ ခဲၫၥံၪ ဒိၩ့ၥံၪအလူလၧ အယဲၩ့အိၩႉ အဝ့ၫၥံၪ အၥိၭကအီၪဆံၫဂၩၥံၪႉ ဂဲၫၥိၭထၬ ဆဲၫ့ဖၭထီၫဘၩ့ဘၩ့ အီၪထဲးလၧအထီၫ့ဖျဲၩ့အၥၧၫ့ၥံၪ အဆဲၫ့ၥံၪနီၪ ဂ့ၭနၭလ့ၬဘိၩအ့ၬဧၪႉ

ဂဲၫထီၩ့အခၫ တဝၫ့ဖိၪၥံၪနီၪ ဒုၭအၪ့အဝ့ၫၥံၪ ဆၧအွံၪဆၧဆၧၫ့ လၧတဝၫ့အဘျၪ့ဖၭဒိၪဖၧၩ့ႉ ဘီၪၦၡၩၥံၪဒၪဘၪ နိးၥံၪအီၪဎွ့ၩလၧ ဂၬထံၫအဆီၪ့ၥံၪတၭ အၥၭဎွံၪကၠၩမီးလ့ၬယါႉ အၪ့ဂီၩ့အီၩႇ အီၩဂီၩ့အီၩ ဘနီၪဘိၭ လယံၬလမီဘၪ အဝ့ၫၥံၪထီးလူၬ မၧၩ့အဆၫလၩ့ချုၬ ထၧၩ့စၪ့ထၪ့အမ့ၬၥၪ လန့လၧၩ့ဘၪနီၪလီၫႉ

အနီၪကကၠၪမၬ ဘဲၫဆၧတဲၩ့ဝဲၩထၪ့အၥိၭ ဘီၪၦၡၩၥံၪနီၪ ၦၡၩကၭထၬလၧဖျုၩ တၭ ဘၪဆၧထုၬလၫ့လၧ တဝၫ့ချိၪ့ ၡိၬဖၧၩ့ဂီၩ့ ၦၡၩထးၥံၫခွံၬလၧ နိၪခုၪကိၭဒုၩဒ့ၭနီၪလီၫႉ ၦၡၩယီၩဆ့ ထုၭဝ့ၫဒၪႉ

လၧၦဖျိၩ့ၡါဖိၪအနိၪ့ဖၧၩ့ ယအဲၪဒိၭလီၩအ့ၪဘၪနၥံၪ ဘီၪၦၡၩ ၡါဖိၪယီၩနီၪ မွဲဒၪထီးယီၩလီၫနဲၪႉ လၧခဲၫမုနွ့ၫ ယကအဲၪဒိၭလီၩဖ့ၪနဲၪအ့ၪနၥံၪ ၦဖျိၩ့ၡါဖိၪပၫလဲၪနီၪ အီၪခိၭခိၭနၪလၧ ၦဖျိၩ့ၡါဖိၪအနိၪ့ဖၧၩ့ယီၩနဲၪႉ ဆၧခိးဆၧတၩႉ