ၦမုၪနၩ့ဎံၪလၩဒဲ ဖူၫထၪ့ၦၡၩ (၁)

လၧကကၠၪအိၩ တဝၫ့ဖိၪလၧ ခိၪလီၩ့လီးဘီၩ့ကဘီၩ့အခၫ့ထံၭကစီၪ့နီၪ ၦမုၪနၩ့ဖိၪအီၪကဂၩတၭ အမံၩ့နီၪဘိၭ နးဖီၫမံၩ့ဘွၩ ဘနီၪႉ အဝ့ၫနီၪ ဂ့ၩခီၫဂ့ၩနၭလ့ၬႉ ကၬဒံၭအ့ၬ အဝ့ၫမွဲၦမုၪနၩ့အဎံၪအလၩဖိၪကဂၩဆ့ႉ အကၠီၩ့နီၪ ဖိၪၥၪခွၫအဘၪ့အၡါ လၧအမိအီၪဎုၬလၧအနၫ့ဆါ အီၪဝ့ၫအၪမၬလီၫလါနၫ့ အၥၭထၪ့ဘၭနံၫဆံၫထၧၩ့မၫဒံၭအ့ၬတၭ အမိအဖါၥံၪ မိဒုၭထၪ့ၡါအဝ့ၫအ့ၬႉ

ၦလၧကမိတၩ့ဂံၪ့တၩ့ဎၪ့ၥံၪနီၪ အၥၭကဘၪအီၪအၡၩထုၬ ၂၅နံၪ့ အနီၪမွဲ ၦဖျိၩ့လၧခီၩခီၩအိၩအလုၫအလါလီၫႉ အီၪကမံၩ့ဒံၭနီၪ အဝ့ၫမွဲ ဖိၪမုၪလဂၩဎးအကၠီၩ့ အမိအဖါၥံၪမုၫလါအဝ့ၫ အီၪမုၪနၩ့ယံၬယံၬကဆံၭဒံၭလီၫႉ ကဲၪဘနီၭဘိၭ ကယဲၦအဘူၭအယဲၩ့ လၧအဂဲၫအၪ့တရိဆၧၥံၪကဒီၪ့ ဘၪထဲၩ့ဘျံၭဒၪအၥၭ ထမၩလ့ၬႉ

လကၭဒံၭဘၪ ၦလၧအဲၪဒိၭထၪ့ၡါလၧ ၦမုၪဖိၪယီၩအကျၩနီၪ ဖူၫထၪ့ၦၡၩကဒုၩပၫထဲးဎုၬဆ့လီၫႉ အနၫ့ဆါအီၪလၧ ခိၪလီၩ့ခိၪ ၡါမုနၧၫ့ဖၪအကျၩအိၩႉ အဝ့ၫအီၪဂဲၫစဲၪ့လၩ့လၧ ခိၪလီၩ့ခိၪတၭ ယိစဲၫဂူၪၦမုၪလၧအအဲၪတၫ့ထၬ ဖီၫမံၩ့ဘွၩနီၪကိၭနံၩဒ့ၭႉ ၦၡၩစဲၪ့လၩ့ဒုၪ့ထံၫအခၫ လ့ၩအၪ့မၩဆၧၥူၪဆၧၥၪႇ ဘိၭၥံၪ့မုအခၫၥံၪနီၪလၥၨၩႉ အထံၭၥိၭမုၪခွၫအီၪလၧအၥိၭအၪလ့ၬဘိၭ  အဝ့ၫလ့ၩဘူၭလၧအနဲၩ့ထံၭဘၧၫ့အ့ၬႉ

အကနံၩ လၧမုဂၪလၩ့အခံၫ့နီၪ နးဖီၫမံၩ့ဘွၩ ဂဲၫလၩ့ဒုၪ့ထံၫ လၧအၥိၭမုၪနံၫဂၩလီၫႉ ဖူၫထၪ့နီၪ အီၪခိၭယိဂူၪဒၪဆၧ လၧၥံၪ့ဖၭဒိၪကထံၭ ထံၫဖၧၩ့နဲၩ့နီၪတၭ ဒၪဘၪဝ့ၫအၥိၭအီၪၡၩခိၬကထုၪ့ဎး ဖုၫလၩ့လၧၥံၪ့ခံၫဂီၩ့ လ့ၩစဲၪ့စိၩလၧ ၦမုၪၥံၪလဖၪအအီၪႉ ၦမုၪဖိၪၥံၪဖးထၪ့တၭ ဂဲၫန့ထၧၫ့ယၫအ့ၬႉ ဖူၫထၪ့ ဖီၪ့န့ နးဖီၫမံၩ့ဘွၩဂီၩ့ ထဲၩ့ထၪ့ထဲၩ့လၧၥံၪ့ခံၫတၭ လၧကဖျၬမ့ၬအထးဖၧၩ့ လၩ့မါခွံၬလၧၥံၪ့နိၩ့ၥံၪ့ထဲၩ့အကျၩနီၪလီၫႉ အၥိၭမုၪနံၫဂၩနီၪဘိၭ ၡါထးအလူကဒီၪ့ကဒီၪ့ လၧ ထံၫဖၧၩ့နဲၩ့နီၪလီၫႉ