ၦဖျိၩ့အဆၧးဎံၫဆၧးလၩ အခၪ့ထံၭခၪ့ဎၧၩ့လဖၪ (၂)

ၦဖျိၩ့ဆၨၩလဖၪ အဆၧန့ၥၫႇ ဆၧဆၧးဎံၫဆၧးလၩ (၅) မံၩ့ယီၩ အ့ၪပထိၪထီၫဎီၩ့ဝ့ၫဒၪလၧ ၦၡၩအဆၧမၧၫ့ ဆၧဂဲၩအဆၧးဎံၫဆၧးလၩနီၪစွါဘဲၫ ပၥၭကဖိးထၪ့နီၪလီၫႉ ပယၩ့အဆၧချဲၩ့ဒီၩ့အီၪဝ့ၫ (မျက်ကန်းလူမျိုး ပွဲမတိုး)  စံၭမၬချၭ- ပခိၪနါလဖၪ မၩလၩမၩဖၩ့ၡီၩ့ထၪ့ ဘိၪ့ (ပွ့ၩ) အဖၧၩ့ ၦၡၩလဖၪ ဂဲထုၪ့လံ မၩမုၬမၩလၩဆၧအဖၧၩ့နီၪ ၦလၧအမ့ၬဘျီၪ့နံၫခီၫလူၬလဂၩ မွဲကနုၬလၩ့ မၩမုၬမၩလၩဆၧလၧ ၦၡၩၥံၪကၠၧၫ့ကၠၧၫ့လန့ဘၪလီၫႉ လ့ၩနုၬလၩ့ ဝ့ၫၥ့ၪလါနၫ့ မွဲကမၩဆၧၩ့ မုၬလၩ ၦၡၩန့နးမံၩ့အ့ၬႉ ဘဲၫနီၪအၥိၭ ဆၨၩလဆၨၩ ပလံၬလဲလအီၪလၧၩ့ဘၪႇ ပဖီလၥ့ၪလၧၩ့ဘၪႇ ၦမၩန့ဒၪၦဖျိၩ့ဆၨၩအမံၩ့ဂီၩ့ ၦဖျိၩ့ဆၨၩအဘိၪ့အပွ့ၩဖၧၩ့နီၪ ပကဲၪထၪ့ဘဲၫၥိၭပမ့ၬဘျီၪလဂၩ အဆၧမၧၫ့အၥိၭလၧစွါဘဲၫ ကကဲၪထၪ့ ပမၩဂၭဂီၩ့ခွံၬ ၦဖျိၩ့ဆၨၩ အဆၧမၧၫ့ဆၧဂဲၩ အဎံၫအလၩဒဲ ဘၪဂၭဂီၩ့ထဲးဎုၬ ၦဖျိၩ့အဆၧဆၧးဎံၫဆၧးလၩနီၪလီၫႉ

ဘဲၫနီၪအၥိၭဆ့ လၧဆၧထံၪလၩ့ဒီၪလၩ့ မုၬလၩၥၭဎွံၫဖၧၩ့နီၪ ဘဲၫဆၧချဲၩ့ဒီၩ့လၩ့အီၪဝ့ၫ ( နူတ်အ နားပင်း ပွဲမသွင်း) ၦလၧအနါအၧၩ့နံၫခီၫလူၬႇ ချဲၩ့ခီၫၥ့ၪအ့ၬ ငၭငီၩငၭစၪလဂၩ မွဲကလ့ၩနုၬလၩ့လၧ ၦၡၩအကျၩလဖိးႇ လန့ဘၪဒဲ ထီအၥၫ့ဘဲၫယီၩ ၦချဲၩ့ပလၨဆၧချဲၩ့လၥ့ၪလၧၩ့ ဘၪစွါဘဲၫ ကမီၪ့ဎီၩ့ဒၪ ၦနါအၧၩ့နံၫခီၫလူၬ ဆၧအဒီၩ့ယီၩ နီၪလီၫႉ

လကၭဒံၭဘၪ ဆၧၥံၫကျံၩႇ ထၩဒဲ ထၭခိၪအဂူၫဂၩလဖၪ အီၪဝ့ၫဆၨၩကိၭဆၨၩဒ့ၭအၥိၭ ၦဖျိၩ့ဆၨၩလဖၪ အကျၩဆ့ မွဲအီၪဖျီၪ့ထၪ့ဝ့ၫဒၪနီၪလီၫႉ ၦလၧအၥၭလကျၩဘၪႇ ၦအဖျုလဂၩနီၪ ဆၧၥံၫကျံၩ ထၩၥံၪ မွဲနၪဝ့ၫၥ့ၪအ့ၬ ဘိၭ နချဲၩ့နံချဲၩ့ကွ့ၩအ့ၪအဝ့ၫၥံၪလါနၫ့ဂ့ၩ ဆၧလဖၪၥံၪယီၩ ကကဲၪထၪ့အဝ့ၫၥံၪအဂးလၧ ဆၧနံနီၪလီၫႉ မွဲဆၧဘဲၫနီၪ အ့ၪနစံၭလၩ့နၥၭလၧ ဖျိၩ့လဂၩနီၪ ကျ့ၭစၨၭအီၪက့ၪလူ့ဒိၪဎွ့ၩဒိၪ ၦဖျိၩ့အဆၧအူၪဆၧဒံၩ့ႇ ၦဆၨၩအလုၫအလါႇ ဆၧကီၩ့ ဆၧၥိၭဒဲ ဆၧဂဲထုၪ့လံတိၩ့ၥံၪအကၠီၩ့ ယအဲၪဒိၭပဂၨၪထၪ့ဘၪနၥံၪလၧ ဆၧအဲၪကွံၩဆၨၩဎိၩဒိၪအဖၧၩ့နီၪလီၫႉ