ၦဖျိၩ့ဆၧပိၩ့ထၪ့ ဘၪဂဲၫကဲၪထၪ့အဂဲး

ထၧၫ့ဖုဝဲထံၩၥိၭဖျိၩ့ဖိၪၥံၪဧ့ႇ ၂၀၂၄နံၪ့ လၩ Jauyary 31 ၥၫ့ယီၩ ဘဲၫထၧၫ့ဖုဝဲဖျိၩ့ဖိၪၥံၪၥ့ၪယၫထၬအၥိၭ မွဲ ထီၩ့ထဲၩ့ယူၭလၧ (၇၅) ဘျၩ့လဘျၩ့ ၦဖျိၩ့ဆၧပိၩ့ထၪ့မုနံၩအကၠီၩ့တၭ ယမိအဲၪဒိၭအၪ့နၩ့လီၩဖ့ၪနဲၪဘၪနၥံၪ ဘၪထွ့ၫလၧ ၦဖျိၩ့ဆၧပိၩ့ထၪ့မုနံၩယီၩ ဘၪဂဲၫကဲၪထၪ့အဂဲးကဆံၭကခ့ၭဖိၪနီၪလီၫႉ အဆိၪထုၬနီၪ KNDO ခိၪနါလဖၪဒဲ ကိၫမၠူၪန့ခိၪနါလဖၪနီၪ လၧကၠဲၬထိၫဝံးဒီၪ့ ၦဖျိၩ့တဝၫ့လဖၪနီၪ ၥၭလၩ့ဎိၭဆ့ၭစူၪမုဂီၩ့ ကၠဲၬထိၫနီၪ မွဲကိၫမၠူၫန့လဖၪမွဲဂ့ၩ ႇ ဘံၩလ့ၩနီၪ မွဲ KNDO မွဲဂ့ၩ ဒုၭထၪ့အၪ့န့ဝ့ၫန့အကၠီၩ့ ထုၬထၪ့ဆၧပရၧၫ့နီၪလီၫႉ ဒိၩ့ပၥံၪ့ ဖျိၩ့ၡၩ့ ဆၧအီၪကီၪ့လးဝၩ့ ကိၩၥံၩ့ဒူၩယၫ့လးကျဲၩ့နီၪ မွဲ KNDO ၥံၪအၪ့န့ထၬန့နီၪလီၫႉ နံၪ့ ၁၉၄၉နံၪ့ လၩ January ၁၂ၥၫ့နီၪ ဟၫ့ၥၫဝတံၫခးရ့ၫ ႇ လၧတိၫ့တ့ၩ ခးစၧၩ့ကီၪ့ ၥုၭဒူၩယၫ့လး (၄) နီၪ မွဲဂ့ၩ ႇ ပၩ့တနီၫဝံးဒီၪ့ လၧဒီၭကၠံၩ ခးစၧၩ့ကီၪ့ၥုၭဒူၩယၫ့လး (၁၅) မွဲဂ့ၩ KNDO စၭထၪ့ဒူၭဝ့ၫနီၪလီၫႉ လၩ January ၂၀ နီ ကဲၪထၪ့ ပၩ့တနီၫ ထၧၫ့ဝံးယၫလီၫႉ လၩ January ၂၂ၥၫ့နီၪ စၭထၪ့ဒုၭ မအူၪပ့ၫခးရ့ၫ ႇ မၭလဲတိၫတဝၫ့နီၪလီၫႉ လၩ January ၂၇ ၥၫ့နီၪ တီၫငူၫ ႇ ထၩ့တပ့ၫ ဒဲ ဖၠူၩ နီၪ မွဲ KNDO ဒဲ ကိၫမၠူၫန့ ၥံၪအၪ့န့ထၪ့န့ဂီၩ့ လၩ January ၂၈ၥၫ့နီၪ ထၪ့အၪ့န့ ဒိၩ့ပၥံၫ့န့နီၪလီၫႉ ၁၉၄၉ နံၪ့ January ၃၁ၥၫ့နီၪ ပဒိၪၥံၪအၪ့ကံၩ့ထဲၩ့ စူၪဝဲၩၥံၪလါနၫ့ အီၪလၧအ့ၩစံၫ့ KNDO ၥံၪလဖၪ လခွံၬလၩ့ဘၪစူၪဝဲၩ့ဒဲ စၭထၪ့ ဒူၭထၪ့ထဲၩ့ ပဒိၪၥံၪနီၪလီၫႉ ကထုၪ့ဎး KNDO ၥံၪနီၪ အၪ့န့ထၪ့ ဒိၩ့ပၥံၫ့ လါနၫ့ လၩ့ Feb ၄ၥၫ့နီၪ ပဒိၪအၥုၭၥံၪထၪ့အၪ့န့ထၪ့ထဲၩ့န့နီၪလီၫႉ ၁၉၄၉နံၪ့ စၭထၪ့လၧ လၩ Feb နီၪ KNDO ၦဖျိၩ့ခရၧၫ့ဒဲ ပဒိၪအၥုၭလဖၪ စၭထၪ့ဒုၭလိၬၥၭလၧ အ့ၩစံၫ့နီၪလီၫႉ ထၧၫ့ဖုဝဲဖျိၩ့ဖိၪၥံၪဧ့ႇ စၭထၪ့လၧ ၁၉၄၉နံၪ့ လၩ Jan ၃၁ၥၫ့နီၪ ၦဖျိၩ့ဖီၪ့ထၪ့စူၪဝဲၩ့ဆၧပိၩ့ထၪ့ စၭထၪ့ဂဲၫကဲၪလၫ့အကၠီၩ့ ၦဖျိၩ့ဆၨၩခရၧၫ့ဒိၪ (KNU) အီၪက့ၪဂုးခၧၫ့ဝ့ၫနီၪလီၫႉ ၁၉၄၉နံၪ့ လၩ Jan ၃၁ၥၫ့ လၧမုနၩခီၫနီၪ ဝံးတခိၩႇ အလိၫ့ ၦဖျိၩ့ဆၨၩဖိၪၥံၪအီၪအလးနီၪ ပဒိၪအၥုၭၥံၪလဖၪ ခိၬထၬဆၧထီၩ့အဎံၩ့ဒဲ ဖိၭဖၫ့မုလိးအခံၫ့နီၪ စၭထၪ့ခၬၦဖျိၩ့ၥံၪတၭ ဖျိၩ့ၥံၪဒုၭဆၧၫ့ထဲၩ့ ဆၧဒုၭၥုၭကဲၪထၪ့ဖၭဒိၪတၭ မ့ၪအၪ့ထဲးဎုၬ စီၩဘၭအူၩကၠံၩအဂံၪ့ဒဲ ၦဖျိၩ့ၥံၪအဂံၪ့ဖိၬဘိၭ အဖျိၪ့ (၅၀) နီၪလီၫႉ ၁၉၄၉ နံၪ့ လၩ့ Feb ၃ၥၫ့နီၪ လၧ မၠၫ့မါအလ့ၩ လံၬပရၧၫ့ဖၧၩ့ ခးပယၩ့စၧၩ့ကီၪ့ခးခိၪဒိၪ ထုၬထၪ့ထၬ ၦဖျိၩ့ဆၨၩခရၧၫ့ KNDO နီၪ မွဲ ခရၧၫ့လၧ လနုၬဘၪၥနိၪ (တရားမ၀◌င်အသင်း) အကၠီၩ့ နီၪလီၫႉ အထီနီၪ ၦလၧအမူၩဒၩအီၪ ပဒိၪအၥုၭပၧၩ့ခိၪဒိၪနီၪ မွဲ ၦဖျိၩ့ဆၨၩ ၥုၭခိၪဒိၪ စမ့ဒိၩ့နီၪလီၫႉ ခီၫလၧ ဖစပလ ပဒိၪထုၬထၪ့ ၦဖျိၩ့ဆၨၩ KNDO ခရၧၫ့ လနုၬဘၪၥနိၪနီၪ ၥုၭခိၪဒိၪယီၩခဲၫ့ကံၭအဆၨၩဖိၪၥံၪကစီၪဘၪမၪအဝ့ၫတၭ ထံၭလၫ့လံၬလၧ ပဒိၪအီၪ အဝ့ၫကအီၪပွံၭဆၧမၩနီၪလီၫႉ လါနၫ့ ကထုၪ့ဎး မွဲခၩ့ခိၪဒိၪ အူၩနုဒဲ အခရၧၫ့ဖိၪၥံၪ လထိးဆၧၫ့ဒံၭဘၪလီၫႉ အၡါမၪနီၪ ပဒိၪၥံၪစၭထၪ့ဒုၭ KNU လးမိထုၪ့လၧ ဝံးတခိၩ့နီၪ ၦလၧအၪ့န့ထၪ့ထၬမူၩဒၩလၧ ထံၫခးအဂးၥုၭခိၪနါဒိၪၥံၪမွဲဝ့ၫ ၥုၭပၧၩ့ၥိၫ့ခိၪဒိၪ (စစ်ဉီးစီးချုပ်) ၥုၭခိၪဒိၪ စမ့ဒိၩ့ဒဲ ၥုၭပၧၩ့ၥိၫ့ခိၪဒိၪနံၫဂၩလဂၩမွဲဝ့ၫ စီၩကၠၪဒိၩၥံၪ ၥ့ၪယၫဘၪဆၧနးမံၩ့အ့ၬနီၪလီၫႉ ဆၧအဂဲးအဖးဂဲၫထၪ့ ဘဲၫယီၩၥိၭနီၪ ၥုၭပၧၩ့ၥိၫ့ခိၪဒိၪ စမ့ဒိၩ့ ဘၪအၪ့စၪ့စိၩ ခၩ့ခိၪဒိၪ အူၩနုလၧ ခွ့ၩဒိၭနါနီၪလီၫႉ လယံၬလမီဘၪအဖၧၩ့ ၥုၭပၧၩ့ၥိၫ့ခိၪဒိၪ စမ့ဒိၩ့အလးနီၪ ခၩ့ခိၪဒိၪ အူၩနု အၪ့လဲၩ့ဒူၭထၪ့ထဲၩ့ အူၩန့ဝ့ၩနီၪလီၫႉ ၦဖျိၩ့ KNDO ၥုၭဖိၪလဖၪနီၪ မွဲအဝ့ၫၥံၪဒုၭထၪ့ယံၫယါဆၧလၧ ခိၪလၩဘွၩၥုၭအဖၧၩ့တၭ ဒုၭဆၧၥ့ၪဂ့ၩဘၪဆဲၪ့ဒဲ လၧဆၨၩဆၬအဂး အဝ့ၫၥံၪအၥၭဆီၪ့နၭမၬလီၫႉ လၧခဲၫ့ ၁၉၄၉နံၪ့ လၩ အ့ၫပရၧၫ့ ၄ ၥၫ့နီၪ အ့ၩစံၫ့ထၧၫ့ဝံးယၫ ဆၧဒူၭဆၧခၬ အီၪပထုၬအၥၭကဆိတၭ အထီနီၪ ခးခိၪဒိၪ ခၩ့ဒိၪဒဲ စီၩဘၩအူၩကၠံၩခရၧၫ့ၥံၪလဖၪ ဒၪလၩ့ဎိၭလိၬၥၭလၧ ဆၧမုၬဆၧရူၪအဂးနီၪလီၫႉ အထီနီၪ KNDO ခိၪနါဒိၪနီၪမွဲ မၩ့ဘၭဇၫ့လီၫႉ လၧဆၧဒၪလၩ့ဎိၭအဖၧၩ့နီၪ အ့ၪမွဲဖျိၩ့ၥံၪကမိမၩ ဆၧမုၬဆၧၡူၪနီၪ ကဘၪဖ့ၪလၫ့ထၬ ပဒိၪၥံၪအစူၪဝဲၩ့ထီးအလူၬအကၠီၩ့တၭ ၦဖျိၩ့ဆၨၩခရၧၫ့ KNU ဒဲ KNDO ခိၪနါလဖၪ မွဲလဆ့ၭဘၪစူၪမုတၭ ခးစၧၩ့ကီၪ့ပဒိၪၥံၪလဖၪ ထိးထၧၫ့မိန့အ့ၬနီၪလီၫႉ လၧဆၧဒၪလၩ့ဎိၭဖၧၩ့နီၪ မၩ့ဘၭဇၫ့ ဂၬထုၪလၫ့လီၩ ပခိၪနါၥံၪလဖၪ ပဂဲၫဒၪလၩ့ဎိၭလိၬၥၭနီၪ မွဲပကခွံၬလၩ့စူၪဝဲၩအဂးအ့ၬ ပၥိၭနံၫကဲၩ့လူၬ ပကအၪ့န့ဆၧမုၬဆၧရူၪဂီၩ့ ထီးဆၧဒုၭလိၬၥၭအီၪလဂ့ၩအဂးလီၫႉ ဆၧဒူၭၥုၭဘၪကဲၪထၪ့ အကၠီၩ့နီၪ ပမိမၩပဆၨၩခးဒီၪ့ အကၠီၩ့ KNU ခိၪနါ လီၩထၪ့ထၬအ့ၪနၥံၪဂီၩ့ယူၭ ပခိၪနါၥံၪလဖၪယီၩ ပကဘၪခွံၬလၩ့စူၪဝဲၩနီၪ ပထိးဆၧၫ့န့အ့ၬအကၠီၩ့ လီၩဝ့ၫထ့ၬထ့ၬဖိၪလီၫႉ ထီးနီၪ ပဒိၪအခၩ့ခိၪဒိၪအူၩနု စံၭဆၧ ယိဒၪနၥံၪအ ခ့ၫအၫ့ယူၫ ခိၪနါဒိၪ စီၩဘၭအူၩကၠံၩ အဆၧလၩဆၧဖၩ့ခလူၬအခၫ ခိၪနါဒိၪ မၩ့ဘၭဇၫ့နးဆ့ ယူၭယၫ့စီၩဘၭအူၩကၠံၩနီၪကကဲၩ့ႇလါနၫ့ စံၭဆၧၫ့ထဲၩ့ခၩ့ဒိၪနီၪ အ့ၪမွဲနမိမၩ ဆၧမုၬဆၧရူၪနီၪ ယီၫယီၫလီၫ ဖျိၩ့ၥံၪအၪ့ကံၩ့ဖျိၩ့ဆၨၩခးဒီၪ့နီၪ နဖ့ၪလၫ့အ့ၪစွါဘဲၫ ဆၧလဖၪၥံၪယီၩ ဘၪဆုးကဲၪထၪ့အဂဲး အီၪနးမံၩ့လၧၩ့အ့ၬနီၪလီၫႉ လါနၫ့ ထီးမုဆၫကနံၩယီၩ ဆၧအၪ့ကံၩ့ယီၩ ပန့ဘၪဒံၭအ့ၬနီၪလီၫႉ ထၧၫ့ဖုဝဲဖျိၩ့ဖိၪၥံၪဧ့ႇ ဘဲၫပဆၨၩဒၪပၧၩ ပဆၨၩခးဒီၪ့ကအီၪအဂး ၦဖျိၩ့ခိၪနါၥံၪဒဲ ဖံၫဖူၫၥံၪလၧဖျိၩ့ဖျိၩ့အိၩကဆၫ့ဘၪကဆၫ့ ဂဲၫထဲၩ့အၪ့ကံၩ့ထၪ့ ကျ့ၭစၨၩခိးဂဲးခိးဘၭ ဖ့ၪလၫ့လၩ့အၥၭလဖၪ အီၪဝ့ၫအနံၪ့ (၇၅) နံၪ့ယူၭတၭ ၦဖျိၩ့မၫတုရၫၥံၪလဖၪယီၩ မွဲပဝံဎီၩ့ကဂၩ ကဘၪလၧၩ့အ့ၬနီၪလီၫႉ ၇၅ဘျၩ့လဘျၩ့ ၦဖျိၩ့ဆၧပိၩ့ထၪ့မုနံၩယီၩ မွဲပကနၪ့ထၪ့ ယူၭယၫ့ဘၪ ၦဖျိၩ့ခိၪနါဒဲ မၫတုရၫၥံၪလဖၪထီးအလူၬနီၪလီၫႉ