ဘီၪၦၡၩ (၁)

လၧကကၠၪအိၩ ၦဖျိၩ့ထၧၫ့ဖုဝဲမုၪအီၪနံၫဂၩႉ အမံၩ့နီၪ မွဲ နးစ့ၩ လၧနးထီၫ့ႉ ၦထၧၫ့ဖုဝဲမုၪနံၩဂၩယီၩ အမ့ၬဎံၪ အယၪဘွၩနၭလ့ၬစွါဘဲၫႉ လါနၫ့ဂ့ၩနီၪ အဝ့ၫၥံၪ အထၧၫ့ဖုဝဲအခွၫအီၪနးဂၩအ့ၬႉ အဖါဖါၥၭဘီၩ့နီၪခီၫ မွဲအီၪဆီၪ့ဘိၭ ကဲၪၦမုၪဖိၪၥံၪလါနၫ့ဂ့ၩ အဝ့ၫၥံၪဘၪလ့ၬဖ့ၬဎုၬ ဘၪမၩဆၧမၩ ၡၪ့ၡၪ့ယါယါနီၪလီၫႉ
အကနံၩ လ့ၩဖ့ၬပျၩ့ဆၧလၧဎုၬဖၧၩ့အခၫ နးစ့ၩနီၪ လီၩအဖုနးထီၫ့ဘယီၩႉ နထီၫ့ဧ့ႇ ပဘၪဖ့ၬနၪ့ ဆၧပွံၭယၥၭၥဲၩနီၪဘီၪႉ အထီဘဲၫယီၩ ၦၡၩဂဲၫဖ့ၬအ့ၪယၧၩနၪ့ အ့ၪမွဲအီၪဘီၪ အ့ၪယဘၪထဲၩ့ဖိၬအခဲၫ့ ယကထဲၩ့ဖိၬအခဲၫ့ၡါမၬလ့ၬႉ အဖုစံၭထဲၩ့ ဝ့ၩ ချဲၩ့ဆၧချဲၩ့ဘနီၪလဂ့ၩဘီၪႉ လၧၡိၬဖၧၩ့ၡၩ့ဖၧၩ့ယီၩ ဆၧကဒၪန့ ထံၫန့န့ၩဒီၭႉ လါနၫ့ဂ့ၩ နးစ့ၩနီၪ ၥၫ့ၥဲၫထၪ့ဒၪ ဆၧချဲၩ့နီၪႉ
လၧအထီနီၪ ၦၡၩအခွၫလဂၩ ဂဲၫဖိးလၫ့လၧ အဝ့ၫၥံၪအလးခဲၫ့ႉ ၦၡၩနီၪ အခံးအဂၩ့ဘၪနၭလ့ၬဘိၩအ့ၬဧၪႉ ၦခွၫနီၪ စံၭအဝ့ၫၥံၪဘယီၩႉ ဧ့ၩႉႉခွၫမုၪၥံၪ နၥံၪလီၩဆၧမနီၫလဲၪႉ ၦထၧၫ့ဖုဝဲမုၪနံၫဂၩ ခ့ၬလၩ့ယိ ၡူၬၡူၬဖျဲၩ့ဖျဲၩ့တၭ စံၭဆၧၫ့ထဲၩ့ဝ့ၫ ပလီၩဘၪနးမံၩ့အ့ၬနဲၪႉ ဆၧအအၧၩ့အၥၫ့ကမံၩ့မံၩ့ကဲၪထၪ့ယူၭနီၪ ဖျီၪထၪ့လၧ အဝ့ၫၥံၪအၥၭဖၧၩ့အကၠီၩ့ ၥၭမဲၪဆၧနၭလ့ၬယူၭႉ ၦၡၩနီၪစံၭဝ့ၫ အၪ့လီၫဆၧဒ့ၩဘီၪ ယနါဂၧၫ့ထွ့ၪထီးလူၬႉ နၥံၪမုၫလါမၩဆၧၩ့ဘိၭ ယမၩဆၧၩ့နၥံၪလၥၨၩႉ ကဲႉႉဘံၪ့ထၬဒၪမၬ နၥံၪအမ့ၬၥၪလီၫႉ ၡိၬၥံၪနၪ့ၥံၪယီၩ ယကဖ့ၬပျၩ့ခွံၬထီးအလူၬႉ
ထၧၫ့ဖုဝဲမုၪခွၫၥံၪဧ့ႇ ဘဲၫယီၩ ၦၡါဖိၪယီၩ ပကအီၪပထုၬထၬအလးထယီၩဂီၩ့ ၡါဖိၪယီၩ မကဆုးကဲၪထၪ့ဘဲၫၥ့ၪလဲၪနီၪ လၧခဲၫ့မုနွ့ၫမၬ ယကဆုးလီၩဖ့ၪနဲၪနၥံၪနဲၪႉ