နီၫဘူၫဘီၩခိၪလီၩ့ - ၃

ထၧၫ့ဖုဝဲမုၪခွၫၥံၪဧ့ႇ လီၩ့အၪ့ဆၫဝ့ၫလန့ဘၪနးစီၪ့ နီၫဘူၫဘီၩနီၪ ကၭထၬဝ့ၫအခၪ့ဂီၩ့ ဖီၪ့ထၬဝ့ၫဒၪလၧ နံၪ့ထၪ့ၥၫ့ခိၪလီၩ့ခၪ့ထံၭနီၪလီၫႉ နီၫဘူၫဘီၩနးဆ့ အီၪက့ၪအၥၭချံၫ့ချံၫ့ဂီၩ့ အဝ့ၫအဆၧအဲၪဆၧကွံၩ အဆၧဂုးခၧၫ့ လဖၪ အီၪက့ၪထၬဝ့ၫဒၪဂီၩ့ အၪ့ကံၩ့ဘၩဆိၪထၪ့ဝ့ၫလၧ ဆၧအၪ့ကံၩ့ဘၩဆိၪဖၪဆၧခိၪလီၩ့နီၪလီၫႉ အဝ့ၫအုၩ့လၩ့ အၪ့ကံၩ့ဘၩဆိၪဖၪထၪ့ဆၧနီၪမွဲဝ့ၫ ဆၧအလးထယီၩ လၧခဲၫ့ ဂဲၫကဲၪထၪ့ဒၪဝ့ၫ တခၩဒၪဆၨၩနးဆၨၩ အဆၧအၪ့ကံၩ ့ဘၩဆိၪဖၪ လၧၫ့ဎွ့ၩဝ့ၫဒၪအလးနီၪလီၫႉ

နီၫဘူၫဘီၩလဂၩ ဆၧၫ့နၩ့အၪ့ကံၩ့ဘၩဆိၪဖၪထၪ့ဆၧလၧ လိးချီၪ့လဘံၪ့ အဖၫ့ခိၪလီၫႉ အဝ့ၫအၪ့ကံၩ့ဘၩဆိၪဖၪဆၧအလး ဆၧအၪ့ကံၩ့ဘၩဆိၪဖၪခိၪလီၩ့နီၪ အထီဘဲၫယီၩ ၦၡၩၥ့ၪယၫအၪ လၧ နီၫဘူၫဘီၩခိၪလီၩ့နီၪလီၫႉ နီၫဘူၫဘီၩလဂၩ ၦၡၩမၩၥံၫဘၪဒံၭအ့ၬ အၪ့ကံၩ့ဘၩဆိၪဖၪဆၧအထီ အဝ့ၫအၥၭ ၥံၫခွံၬနီၪလီၫႉ

            ထၧၫ့ဖုဝဲမုၪခွၫၥံၪဧ့ႇ နီၫဘူၫဘီၩခိၪလီၩ့နီၪ အီၪလၧ ၦဖျိၩ့ဆၨၩခးဒီၪ့ ၥၫ့တီၫ့ကၠံၩဝံးနီၪလီၫႉ ထီးနီၭ နီၫဘူၫဘီၩအၪ့ကံၩ့ဘၩဆိၪဖၪထၬဆၧအလး လိးချီၪ့ဖၭဒိၪအီၪဒံၭစွါဘဲၫႉ လါနၫ့ လၧနီၫဘူၫဘီၩခိၪလီၩ့အခံၫနီၪ ဆၨၩကိၭဆၨၩ အၪ့ကံၩ့ဘၩဆိၪဖၪဆၧအလး အီၪနီၪလီၫႉ ၦဖျိၩ့ဆၨၩဖိၪၥံၪလဖၪ မၩလၩမၩဖၩ့ၡီၩ့ဆၧနၪ့ထၪ့ကိၭနံၪ့ဒ့ၭ လကၭဒံၭဘၪ ဂၭထလ့ၬနဲၪဒံၭ နီၫဘူၫဘီၩ ၡါဒံၭစွါဘဲၫႉ

            နီၫဘူၫဘီၩနီၪ မွဲဝ့ၫဒၪ ၦဖျိၩ့ဆၨၩဖိၪၥံၪလဖၪ လၩ့ယၫ့ၥၭၡါဖၧၩ့  ဎံၫလၩမုၪလဂၩနီၪလီၫႉ အဝ့ၫနီၪ မွဲၦလၧ အယိထွ့ၫၦဖျိၩ့ဆၨၩဖိၪၥံၪလၧအီၪအလးထနီၭ ဘုၪ့ႇ ဂုဆၫလဖၪအၪထၪ့ဂီၩ့ ဆၧချံၫ့မုၭရူၪဘၩအီၪထၪ့အကၠီၩ့ ၦဖျိၩ့ဆၨၩဖိၪၥံၪလၧအအီၪအလးထနီၭလဖၪ နဲၩ့ထၬဝ့ၫဒၪနီၪလီၫႉ နီၫဘူၫဘီၩၡါယီၩ မွဲၦဖျိၩ့ဆၨၩဖိၪၥံၪလဖၪ အၪဒၪ ဆၧ ကၥ့ၪယၫထၬဝဲၩ့ယူၭနီၪလီၫႉ