နီၫဘူၫဘီၩခိၪလီၩ့ (၂)

ထၧၫ့ဖုဝဲမုၪခွၫၥံၪဧ့ႇ မွဲဎံၫလၩဝ့ၫဂီၩ့အစီၩ့အမၩ့အီၪဝ့ၫဒၪ နီၫဘူၫဘီၩယီၩ လၧနီးဖၧၩ့ ပၧၩလနၩ့နၩ့စီၪဘၪအဝ့ၫ လၧ မုၪခီၩလဲး ၥၭမဲၪကၠၭဝ့ၫဒံၭစွါဘဲၫႉ ကနံၩနီၪတၭ စီၩၥီၩယီၩခွၩလဂၩ ဘဲၫကိၭကၠၪကၠၪအိၩအၥိၭ လ့ၩဒုၭၥုၭနီၪလီၫႉ အဝ့ၫထၪ့ယဲထၬ အမၫၥၭဘီၩ့ဖ့ၪလၪ့ထၬ ထီၫ့ၥံၪ့ခွံၫနီၪဘိၭ ဒူၪဒၩၥံၪလဖၪ စၪအဝ့ၫထီးအလူၬလၥၨၩႉ အထီနီၪ အဝ့ၫစီၪဘၪ ဒူၪဒၩၥံၪလဖၪ ၥံၫလူၬယူၭတၭ အၪ့ထုၪ့လၫ့ထဲၩ့ၥံၪ့ခွံၫနီၪ ထံၭလၪ့ထဲၩ့ဝ့ၫလၧ အခိၪဎွံၪလီၩဘိၭ ၥံၪ့ခွံၫယီၩ ဖၩ့ထၪ့ ဒူၪဒၩလၧလၥံၫဒံၭဘၪကဂၩနီၪ ဒၪစီၩၥီၩယီၩခွၩကထုၪ့ဎး မၩၥံၫခွံၬဝ့ၫဒၪနီၪလီၫႉ
အနီၫတၭ စဎွၩဖိၪ စီၩၥီၩယီၩခွၩဘၪၥံၫ ဆၧပရၧၫ့ယီၩ ထီၩ့လၧ စဎွၩဒိၪစီၩကံၩကူၪအီၪနီၪလီၫႉ ပကိၪ့လိၬဆၧ (မှူးမှတ်)လဖၪနီၪ မွဲဒၪ နီၫဘူၫဘီၩအိၭအ့ၬဘိၭ လီၩ့ဆ့ၭစူၪဆ့ၭခၪ့လၧ စဎွၩဒိၪအီၪ နီၫဘူၫဘီၩနီၪ မွဲဝ့ၫ မုၪခီၩလဲးအကၠီၩ့ ၦလၧဆၧဒုၭၥုၭလစၪယံၩယါဘၪနးကၠၪနီၪ ထီၫ့ၥံၪ့ခွံၫအကၠီၩ့ ဘၪၥံၫဝ့ၫဒၪ ခိၭလီၩ့ဝ့ၫဒၪ ခိၪမၪခိၪမၪ ဂီၩ့နီၪ အၪ့မၧၫ့စဎွၩမၩၥံၫခွံၬ နီၫဘူၫဘီၩနီၪလီၫႉ လါနၫ့ စဎွၩယီၩ အဲၪနီၫဘူၫဘီၩမီၪ့ဎီၩ့ အဖိၪမုၪကဂၩလၥၨၩတၭ မၩၥံၫဝ့ၫထၪ့အ့ၬနီၪလီၫႉ အနီၭဘိၭ စဎွၩယီၩ ခွံၬလၩ့အလူလၧ အၪ့ဆၫခွံၬ နီၫဘူၫဘီၩနီၪလီၫႉ လါနၫ့ နီၫဘူၫဘီၩယီၩ ကျ့ၭစၨၩလီၩ့အၪ့ဆၫကၠၭဝ့ၫလါနၫ့ အၪ့ဆၫဝ့ၫန့နးမံၩ့အ့ၬစွါဘဲၫႉ
လၧကံၩကူၫခိၪလီၩအနဲၩ့ ပကိၭဝ့ၫ ဘွဲၪဎံၫခိၫ ခိၪလီၩ့အီၪဝ့ၫနံၫဖျိၪ့လီၫႉ ကဖျိၪ့နီၪ မွဲဝ့ၫ ဆၧအၪ့ကံၩ့ဘၩဆိၪ ဖၪဆၧခိၪလီၩ့ (ဆုတောင်းတောင်)ဒဲ လၧခဲၫ့ကဖျိၪ့နီၪ မွဲ နံၪ့ထၪ့ၥၫ့ခိၪလီၩ့ (နှစ်သစ်ကူးတောင်) နီၪလီၫႉ ဆၧအၪ့ကံၩ့ဘၩဆိၪဖၪဆၧခိၪလီၩ့နီၪ မွဲဝ့ၫ အဖၫဒဲ နံၪ့ထၪ့ၥၫ့ခိၪလီၩ့နီၪ မွဲအမိလီၫစွါဘဲၫႉ
https://youtu.be/eJhIkFJ2f-o