ခွဲၩကဘၩ့ခိၪလီၩ့ဒဲ ၦဖျိၩ့ထၧၫ့ဖုဝဲဖိၪနံၫဂၩ (၂)

အနီၭအခၫ ပၧၩလၧဆၧဒဲၩဘၭလအီၪဘၪ မွဲဝ့ၫ စၫ့စ့ၭဖိၩဒဲ နီၫမူၩမၫ့ၥံၪ အထၧၫ့ဖုဝဲနံၫဂၩ ဂ့ၩဘွၩဝ့ၫဒၪ အၥုၪ့အၥၭလဖၪ ဆၧၥၭမဲၪၥၭဖျဲၩဆၧႇ ဆၧခိဆၧဝီၩ ဂဲၫချုၭဘံၭလၫ့ယူၭနီၪလီၫႉ အီၪထၬဝဲၩလၧ ဆၧချံၪ့မုၬၡူၪဘၩ အဖၧၩ့ ဂံၪ့ဒီၪ့နီၪ ဂဲၫအီၪထၪ့လၧ ဆၧဆိၪဆၧဆံၭဆၧႇ ဆၧဎၪလိၬဆၧႇ ဆၧၥၭထၪ့ၥၭဖျဲၩ အလူၥံၪနီၪလီၫႉ

            အဖါဖါၥၭဘီၩ့ လအဲၪဒိၭဘၪ ဂၬထံၫဂၬနီၫ့နီၪ အဖါယါလဂၩစဲၪ့လၩ့လၧဂံၪ့ဖၧၩ့လၧၩ့အ့ၬ အဝ့ၫအဆၧၥၭထၪ့ ဆၧဆိၪဆၧဆံၭအဖၫ့လၬ အထၧၫ့ဖုဝဲနံၫဂၩ ဘၪအီၪၥၭမၧၫ့ဝ့ၫဒၪလၧ မ့ၬထံၫမ့ၬနီၫ့အကျၩနီၪလီၫႉ လၧခဲၫ့ထုၬ နီၫဖီယါနီၪ မွဲဆံၭဝ့ၫနၭဒ့ၭ အဖိၪမုၪဒဲ အဖိၪခွၫနံၫဂၩနီၪ ဘၪအၪ့မၧၫ့ဝ့ၫယိဆၧမံၩ့ကထံၪထံၪႇ ထီးဘုၪ့ကထံၪထံၪ မိကဂၩ အၪ့မၧၫ့ဝ့ၫလမိထၪ့ဘၪနးဆ့ ဘၪအၪ့မၧၫ့ဝ့ၫဒၪနီၪလီၫႉ

            ကနံၩနီၪတၭ အထၧၫ့ဖုဝဲနံၫဂၩနီ အဖါယါလ့ၩကိၭန့လၧ ဆံၬဖၧၩ့တၭ လ့ၩလၧဖၧၩ့ၥၭအထီ ထီၩ့လၧခိၪလီၩ့ စီၩ့ခိၪဖၭထီၫ့နီၪ ဆၫ့လၩ့ထ့ၬဖိၪၥၪနံၫဂၩယီၩဂီၩ့ ဂဲၫထဲၩ့ထဲၩ့လၧဂံၪ့ကဂၩလီၫနီၪလီၫႉ အထၧၫ့ဖုဝဲနံၫဂၩယီၩ လၩ့ထ့ၬလၬ လၧ ခိၪလီၩ့ခိၪအထီ နၪ့ထၪ့စိၩခွဲၩကဘၩ့ကၠဲၬ အၪ့ကံၩ့ဘၩဆိၪဖၪထၪ့ဝ့ၫလၧ ကထိးထဲၩ့တၩ့ထဲၩ့အဝ့ၫၥံၪတၭ လၩ့ထ့ၬဘၪလၧ ခိၪလီၩ့ဖၫ့လၬဝၪဂိၩ့အဖၫ့ခိၪတၭ အၥၭဘၪၥံၫခွံၬအ့ၬနီၪလီၫႉ