မုအီၪပွံၭနံၩ မုနွ့ၫ (၁၂)

ၦလၧအဆူနဲၩယွၩႇ အဖိၬယ့ၫၡုၬအခဲၫ့ႇ ယ့ၫၡုၬအထံၩအဖျဲလဖၪနီၪ ကဘၪဒၪခီၩ့ဆၧၫ့ယၫ  ဆၧၡၪ့ဆၧနၭႇ ဆၧမၩအၧၩ့မၩနၭႇ ဆၧစ့ၩရၫ့အထီနီၪ အထံၩအဖျဲလနၩ့နၩ့  ဘဲၫၥိၭ ကဖီၩ့ဖျ့ၭလၧဆၧမၩအၧၩ့မၩနၭႇ ဆၧၥံၫအဂးႇ အဝ့ၫၥံၪ ကမီၪ့ဘံၭအဝ့ၫအကၠီၩ့နီၪ ယ့ၫၡုၬၥ့ၪယၫဆိၪဝဲၩဝ့ၫလီၫႉ ဆၧနီၪအကၠီၩ့ ယ့ၫၡုၬၥီၪ့ထဲၩ့ၥၫ့ထဲၩ့ႇ ဖ့ၪဂဲးဖ့ၪဘၭအထံၩအဖျဲလဖၪ ဘဲၫယီၩၥိၭလီၫႉ ယ့ၫၡုၬစံၭထၬဝ့ၫႇ 
ၦလၧအမၩၥံၫၦနးခီၫ့တၭ, မၩၥံၫၦၥၭၡီၩ့လၥ့ၪဘၪနီၪ, ထီးၥၭမဲၪလဂ့ၩ, အ့ၪမွဲၦလၧအမၩဂၭဂီၩ့ၦၥၭၡီၩ့ ဒဲၦ နးခီၫ့လၧလရၬဖၧၩ့ၥ့ၪလဂၩနီၪ, ၥၭမဲၪအဝ့ၫဒၪအၪနဲၪ့အနီၪဆံၭ. 
ကယဲၦလၧအအုၩ့လၩ့ယၧၩ လၧၦၡၩၥံၪအမ့ၬယၫလဂၩဂၩနီၪ, ယမိအုၩ့လၩ့အဝ့ၫနီၪ လၧယဖါအီၪလၧမူၭခိၪအမ့ၬယၫဆ့လီၫ. 
အ့ၪမွဲထီးဒၪၦလၧအမီၪ့ဘံၭယၧၩ လၧၦၡၩၥံၪအမ့ၬယၫလဂၩဂၩနီၪး ယမိမီၪ့ဘံၭအဝ့ၫနီၪ လၧယဖါ အီၪလၧမူၭခိၪအမ့ၬယၫဆ့လီၫ. 

အဲၪကွံၩဘၪထၧၫ့ဖုဝဲမုၪခွၫၥံၪဧ့ႇ 
ပအီၪလၧဂၪ့ခိၪချိၫ့ဖၧၩ့ယီၩ ဆၧလၧအမၩၥံၫပနးခီၫ့ဒဲပၥၭၡီၩ့ႇ ဆၧလၧအမၩဂၭဂီၩ့ပၧၩႇ ဆၧလၧအမၩလၩ့မ့ၬမဲပၧၩလဖၪ မွဲဝ့ၫႇ ဆၧအၧၩ့ဆၧၥၫ့ႇ ဆၧလတီၩလလီၩ့ဘၪႇ ဒဲ ဆၧဒဲၩဘၭလဖၪနီၪ ပကဘၪမၩႇ ပၥၭမဲၪဆၧမိၥ့ၪလၧၩ့အ့ၬႉ ဆၧမ့ၬမဲပၥၭမိၥ့ၪလၧၩ့အ့ၬႉ လါနၫ့ဂ့ၩ ဆၧအဂ့ၩအဘွၩႇ ဆၧတီၩဆၧလီၩ့ႇ ဆၧမၩဘိၪ့မၩထးဆၧႇ ဆၧထိးအၥၭ လၧဆၧဆူနဲၩအဂဲးႇ ဒဲဆၧအုၩ့လၧကဆါယွၩ လၧပၥၭမၧၫ့မုကိၭနံၩအဖၧၩ့လဖၪနီၪ ပဘၪမၩ ပမိမ့ၬမဲလီၫႉ  

လၧၦၡၩကိၭဂၩဒ့ၭအၥၭဖၧၩ့နီၪ ယွၩဖ့ၪလၫ့ထၬ ကၩ့ၡၧၫ့လီၫႉ ဘဲၫၥိၭ ပကၥ့ၪယၫမၩဆၧဂ့ၩဆၧဘွၩ ဒဲပကဘၪဂၭဎ့ၭဆၧအၧၩ့ဆၧၥၫ့အဂးနီၪလီၫႉ လါနၫ့ဂ့ၩ လၧၦနၩ့နၩ့အဖၧၩ့ အကၩ့ၡၧၫ့ၥံၫအကၠီၩ့ႇ ဆၧအၧၩ့ဆၧၥၫ့ႇ ဆၧလဂ့ၩႇ ဆၧလကြၨၭမၩဘၪလဖၪနီၪ မၩဝ့ၫအခၫ ၥ့ၪယၫမ့ၬမဲလၧၩ့အ့ၬႉ 

ပကဲၪဎြံၬဖိၪၥံၪလဖၪယီၩ လၧပဆၧဆူနဲၩအဂး ပကဘၪဒၪခီၩ့ဆၧၫ့ယၫ ဆၧကၪဆၧဂဲၩ ဒဲဆၧမၩအၧၩ့မၩနၭလဖၪလီၫႉ
လၧဆၧလဖၪနီၪအကျၩႇ    ဆၧအၪ့ယိၫႇ ဆၧၥၭမဲၪဆၧအကၠီၩ့ႇ ပမၩထၪ့ဖျီၪပဆၧဆူနဲၩႇ ပဆၧထိးပၥၭ လၧၦၡၩခမျၧးအမ့ၬယၫ မိဘုၪ့အ့ၬႉ 
ဆၧနီၪအကၠီၩ့ႇ လၧလံၬဆံၫ့ဎံၪကနံၩယီၩအဖၧၩ့ႇ ယ့ၫၡုၬဖ့ၪဂဲးဖ့ၪဘၭပၧၩႇ စ့ၭထၬဝ့ၫႇ  "ထီးၥၭမဲၪဆၧလဂ့ၩႉ” အၪ့ယိၫခဲၫ့ကံၭဆၧလဂ့ၩႉ 

အဲၪကွံၩဘၪၦဆူနဲၩဖိၪၥံၪဧ့ႇ 
အ့ၪပဆူနဲၩႇ ပဒိၭနဲၩ့ၥၭလၧ ဖါကဆါယွၩနီၪ ႇ ဖါယွၩကမၩဆၧၩ့ပၧၩႇ ကယိထဲၩ့ခွါထဲၩ့ပၧၩလီၫႉ 
ဆၧလၧပမိမၩႇ ပမိဒိၭန့ဘၪကိၭမံၩ့နီၪႇ ယွၩလဖ့ၪလၫ့ဘၪပၧၩလါနၫ့ဂ့ၩႇ ဆၧလၧပဘၪလိၫလဖၪနီၪ ယွၩကဖ့ၪလၫ့အ့ၪပၧၩႇ ကမၩဆၧၩ့ပၧၩ ကိၭကၠၪဒ့ၭလီၫႉ 

စၭထၪ့ခီၫ့လၧပဒိၭန့ဆၧၥူၫဝၭဆံၫ့ဎံၪမုနံၩ ပအုၩ့လၩ့ၥၭႇ ပမၩဖျီၪထၪ့ပဆၧဆူနဲၩလၧနၫ့ဆါၥၧၫ့ဂၩယွၩလဂၩႇ  လၧၦၡၩခမျၧးအမ့ၬယၫ ဒဲပအုၩ့လၩ့ပၥၭႇ ပခွံၬၡိၭခွံၬ မုၪခီၩလဲးႇ အဆၧဖံၭဆၧမၩႇ ဒဲဆၧအၧၩ့ဆၧၥၫ့လဖၪနီၪလီၫႉ ပဆၧအုၩ့လၩ့နီၪ မွဲကနံၩဎးကၥၫ့အဂးလၧၫ့ လကၭလၧၩ့ႇ ပကဘၪအုၩ့လၩ့ယွၩ လၧပၥၭမၧၫ့မုကိၭနံၩဒ့ၭအဖၧၩ့ႇ ထီးပၥံၫကကၠၪလီၫႉ