ဆၧလီၩလၩ့လၬလၩ့ ဆၧၥၭထိၬပရၧၫ့ႇ ဝီအဆၧၫ့အထီ မုနွ့ၫ (၃)

ထၧၫ့ဖုဝဲမုၪခွၫၥံၪဧ့ႇ ပဝ့ၫဒၪၦၡၩထီးလူၬယီၩ ဘၪဆၧတဲၩ့လၩ့ထၬဝ့ၫ ဘဲၫယွၩအဂ့ၩအၥိၭလီၫႉ ၦၡၩအမိၡါနီၪ မွဲဝ့ၫဒၪ ယွၩအဆၧလုဂံၪ့လီၫႉ လၧဆၧၥၭထိၬပရၧၫ့ကနံၩယီၩအဖၧၩ့ ယ့ၫၡူၬစံၭဝ့ၫ ၦယုဒၫဖိၪၥံၪႇ ရိလၩ့ဎီးခွံၬဆၧလုအဂံၪ့ယီၩတၭႇ ၥၧၫ့နံၩအထးဖၧၩ့နီၪ ယမိမၩထၪ့ထဲၩ့ထီးအဂီၩ့လီၫ. လံၬစပီလူၫကွ့ၭန့ ၦကိၫရံၫ့ဖိၪ အခၪ့ထံၭလဘံၪ့ ၆:၁၉ နၥံၪအမိၡါမွဲၥၭမုဆံၫ့ဎံၪလၧအအီၪလၧနၥံၪအဖၧၩ့ လၧနၥံၪန့ဘၪလၧယွၩလခီၫ အဆၧလုအဂံၪ့တၭႇ နၥံၪလမွဲဘၪနၥံၪအဆၧဒၪနၥံၪဝ့ၫနီၪႇ နၥံၪလၥ့ၪယၫဘၪဧၪႉ လါနၫ့ဂ့ၩ ဘဲၫလၧယ့ၫၡူၬအခံၫ့ဒၪအိၩ ၦၡၩၥံၪမၩစံၪစၪႇ မၩၥၭလိၪယွၩအဆၧလုဂံၪ့အၥိၭႇ ထီမုဆၫကနံၩယီၩဆ့ႇ ၦၡၩၥံၪမၩၥၭလိၪႇ မၩလၩ့ဎီးခွံၬယွၩအဂံၪ့လဖၪလီၫႉ ဆၧဒုၭဆၧခၭအထီႇ ၦၡၩမၩပျၩႇ ဘၩလၩ့ဎီးယွၩအဂံၪ့ႇ မၩၥၭလိၪ ဆၧအလးဆံၫ့ဎံၪလဖၪလီၫႉ ဒဲလကၭဒံၭဘၪႇ လၧခီၫၡၩအဂးမွဲဂ့ၩႇ လၧဆၧၥၭထၪ့ႇ လၧမ့ၬလဲၩၥၭဂဲၫအကၠီၩ့မွဲဂ့ၩႇ ၦၡၩမၩနိၫ့မၩနၭႇ မၩၥံၫမၩဆၫလိၬၥၭလီၫႉ ထၧၫ့ဖုဝဲမုၪခွၫၥံၪဧ့ႇ လၧဝီအဆၧၫ့အထီဖၧၩ့ယီၩႇ ယွၩကိၭဖံၭၥိၭပၧၩႇ ဘဲၫၥိၭပဂဲၫဘိၪ့ထၪ့ဘၩထၪ့အဝ့ၫႇ အၪ့ကံၩ့ဘၩဆိၪဖၪဆၧအၪအၪႇ လၧလုဂံၪ့ဖၧၩ့လကၭလၧၩ့ႇ မွဲပကအီၪဆံၫ့ဎံၪယွၩ လၧပဆၧအီၪကီၪ့အဖၧၩ့ႇ လၧပဂံၪ့ဒီၪဖၧၩ့ႇ ဒဲလၧပနၫ့ဆါဒၪအမိၡါလဖၪအဖၧၩ့နီၪလီၫႉ