ဆၧလီၩလၩ့လၬလၩ့ ဆၧၥၭထိၬပရၧၫ့ႇ မုအီၪပွံၭနံၩ မုနွ့ၫ (၂၅)

အဆိၫထုၬႇ ဆၧချဲၩ့ဒီၩ့လၩ့ယီၩ လီၩနဲၪဖျီၪထၪ့အ့ၪပၧၩႇ ယွၩအၡၩခမျးၦအံၫစရ့လၭဖိၪ ဒဲ ၦလၧအလမွဲၦအံၫစရ့လၭဖိၪၥ့ၪအဂဲးလီၫႉ 
ၦလၧအလ့ၩမၩဆၧမၩ လဂီၩနၪခုၬလဖၪနီၪ မွဲဝ့ၫဒၪ ၦအံၫစရ့လၭဖိၪလဖၪလီၫႉ ယွၩကိၭန့ရွံန့ႇ အဆိၫထုၬႇ စံၭမၪခလါႇ ၦကွ့ၭလံၬႇ ၦဖၫရစံၫလဖၪလီၫႉ ၦလၧအလ့ၩဆွံႇ အလးခဲၫ့လဖၪနီၪ ႇ မွဲဝ့ၫဒၪ ဆၨၩအဂူၫဂၩလီၫႉ 
ၦအံၫစရ့လၭႇ ၦယုဒၫဖိၪၥံၪလဖၪနီၪ မွဲဝ့ၫၡၩခမျၧး လၧကိၭန့ႇ ရွံန့အကၠီၩ့ႇ အဝ့ၫၥံၪအၥၭထၪ့ထီၫႇ စီၪဎိၩလၩ့ၥၭဂီၩႇ စီၪဆံၭၦၡၩခမျၧးအဂူၫဂၩလီၫႉ အဝ့ၫၥံၪဆီၫ့မီၪ့ဝ့ၫလၧ ယွၩအခိးအတၩႇ အဆၧထိးထဲၩ့တၩ့ထဲၩ့နီၪ ပကဘၪမွဲဝ့ၫန့ၫ ၦအံၫစရ့လၭဖိၪအဂးႇ မွဲလၧၦဆၨၩအဂူၫဂၩၥံၪအဂးအ့ၬႉ 
လါနၫ့ဂ့ၩ ယွၩအဆၧဆီၫ့မီၪ့ႇ ဆၧထိစိၩႇ ယွၩအၥၭနီၪ လၩ့ဂၬလၧအဝ့ၫၥံၪအဆၧဆီၫ့မီၪ့ႇ ဒဲပဆၧထိစိၩအ့ၬႉ ယွၩနီၪ မွဲဝ့ၫဒၪ ၦခမျၧးထီးလူၬအယွၩအကၠီၩ့ႇ ယွၩအခိးအတၩႇ အဆၧထိးတဲၩ့တၩ့ထဲၩ့နီၪ မွဲဝ့ၫၦၡၩထီးလူၬအဂးလီၫႉ လၩ့ဆၪ့ဒၪဆၧႇ မွဲဝ့ၫၦလၧအခိၭနၪႇ ထိးဆၧၫ့ယွၩလဖၪအဂးလီၫႉ 
နံၫထုၪလထုၪႇ ဆၧချဲၩ့ဒီၩ့လၩ့ယီၩ ၥီၪ့လိၪနဲၪလိၪအ့ၪပၧၩ ကဆါယွၩအဆၧအီၪက့ၪၥုၪ့အီၪက့ၪၥၭႇ ကဆါယွၩအၥုၪ့အီၪၥၭအီၪႇ အဆၧအဲၪႇ ဆၧယၫ့ၥုၪ့ယၫ့ၥၭႇ အခိးအတၩအဂဲးလီၫႉ 
ယွၩအၥၭႇ ဆၧဆီၫ့မီၪ့နီၪ မီၪ့ဎီၩ့လၧ ၦၡၩအဆၧဆီၫ့မီၪ့အ့ၬႉ 
ယွၩနီၪလၧၫ့ဎွ့ၩဝ့ၫ လၧဆၧတီၩဆၧလီၩ့ႇ ဆၧဘၪလိၬဎွ့ၩဎီၩ့ႇ ဆၧအဲၪဆၧကွံၩႇ ဒဲဆၧယၫ့ၥုၪ့ယၫ့ၥၭလီၫႉ 
ၦၡၩကိၭဂၩဒ့ၭ မွဲဆၧဒဲၩဘၭဖိၪအကၠီၩ့ႇ ကြၨၭလၧယွၩနးဂၩအ့ၬႉ ဘဲၫၦၡၩကြၨၭအၥိၭႇ ဘဲၫၦၡၩအဆၧဒဲၩဘၭအီၪဝ့ၫအၥိၭႇ ယွၩအ့ၪစ့ၩရၫ့စွါဘိၩႇ ၦၡၩထီၩ့လၧဆၧထိးထဲၩ့တၩ့ထဲၩ့ၥ့ၪနးဂၩအ့ၬႉ 
ၦၡၩထီးလူၬ လၥ့ၪယၫအၪ့ဎၬဘၪယွၩလါနၫ့ဂ့ၩႇ ဘဲၫၦၡၩထီးလူၬ ကဒိၭန့ဘၪဆၧထိးထဲၩ့တၩ့ထဲၩ့အဂးႇ ယွၩနီၪ လီၩ့ဎွါႇ အၪ့ဎၬၦၡၩကိၭအဆၧၫ့အထီဒ့ၭလီၫႉ 
လၧယွၩအမ့ၬယၫနီၪ ပကဲၪဎြံၬဖိၪအကၠီၩ့ႇ ပစီၪဎိၩလၩ့ပၥၭဂီၩႇ ပစီၪ့ဆံၭၦၡၩအဂူၫဂၩႇ ဆၧဘိၪ့ဆၧဘၩအဂူၫဂၩန့အ့ၬႉ ဘၪနီၪလဲၪစွါဘိၩ ယွၩအၥၭမုဆံၫ့ဎံၪနီၪ အီၪလၧႇ မၩဆၧမၩ လၧၦၡၩကိၭဆၨၩဒ့ၭႇ လၧဆၧဘိၪ့ဆၧဘၩကိၭမံၩ့ဒ့ၭအဖၧၩ့အကၠီၩ့လီၫႉ 
ဘၪထွ့ၫလၧ ဆၧဘိၪ့ဆၧဘၩကမံၩ့ႇ ပမၩဆၧဂ့ၩဆၧဘွၩႇ ပမၩဘိၪ့မၩထးဆၧအကၠီၩ့ႇ ပစီၪဎိၩလၩ့ၥၭန့အ့ၬႉ ပမၩယွၩအခ့ၫအၡၩဆၧမၩအကၠီၩ့ႇ ပဖိၬယ့ၫၡူၬအခဲၫ့အကၠီၩ့ႇ ပကြၨၭန့ဘၪဎွ့နီၪဎွ့ယီၩႇ ပယိလါန့အ့ၬႉ ၦလၧအဖ့ၪလၫ့ပၧၩ ခိၪဖါႇ အလံၩ့အလဲၫ့နီၪ မွဲယွၩလီၫႉ ဘဲၫယွၩအၥၭအီၪအၥိၭႇ ကဖ့ၪပၧၩလီၫႉ ယွၩနီၪ တီၩလီၩ့လၧအချဲၩ့အဖၫ့ခိၪ ဒဲ လၧၫ့ဎွ့ၩဝ့ၫ လၧဆၧယၫ့ၥုၪ့ယၫ့ၥၭလီၫႉ 
ယွၩကိၭၦၡၩကိၭဂၩဒ့ၭႇ လၧအစဘံၭလးဖၧၩ့လီၫႉ ပဝ့ၫဒၪ လၧအမၩဆၧမၩကၠၧၫ့ကၠၧၫ့ လၧယွၩအစဘံၭလးလဖၪယီၩ ပကဘၪၥ့ၪယၫ ယွၩအခိးအတၩႇ ကဘၪယူၭယၪ့မၩဆၧၩ့လိၬၥၭႇ ဒဲကဘၪနၪၥ့ၪကွဲၪဖျါခွံၬလိၬကိၭဂၩဒ့ၭ လၧဆၧဆၪ့လၩ့ၥုၪ့ဆၪ့လၩ့ၥၭအဖၧၩ့နီၪလီၫႉ